أشباه الرجال 🫀مكتملة🫀

🫀الجزء 7🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الأول:جرح الروح🫀
°●الجزء: السابع(7)●°

فاقت من سهوتها فاش دفعها خيري دخل و كايغمز فيها باش تفهم راسها حس بيها شوهاته قدام الرجالة  وكتر كاع حيت لابسة غير بيجامة ديال الدار دخلات بزربة لكوزينة عند نادية و حليمة  ..

حليمة: شكون فالباب؟

ياقوت: خيري لي كايدوق ..! (كاتغمز فنادية تجي عندها) ..

حليمة: سكوت!! يسمعاك تاتعيطلو بسميتو مغايسكوتشي علينا ..

ياقوت حركات ليها كتافها ماعلابالهاش .. ماحسو غير بيه هو وقف عليهوم مخاطب حليمة ..

خيري: حليمة ! صونالي خالد سيمانة الماجيا غايدجي .. نتينا ماصونالكشي ؟

حليمة: صونالي ابا ! .. (شافت فياقوت ورجعات شافت فيه ) .. قالي نواجدو فالخوطبة بيما يدجي ! ..

خيري(لقى نظرة على ياقوت بنص عين): ان شاء الله ! ..كولتشي عليا ماتهزيشي الهم لوالو ! ..

حليمة: يانا نتكلاف غير بياقوت ابا ! .. الضيوف و الماكلة تكلاف بييوم تينا ! ..

خيري(حرك ليها رأسه و قال قبل مايخرج من عندهم):
ان شاء الله  ! ..

ياقوت عاجبها الحال بهادشي كامل لي كايدار على قبلها .. حليمة جلسات حداها فوق ديك السدارية فين تايجلسو فالكوزينة..

حليمة: نمشيو لتطوان تشري لقفاطن ؟ ..

ياقوت: نخيطوم حسن! .. و بذوقي

حليمة: مغاتقدكشي سيمانة يتخايطو فيا ، شريوم، حسن ! ..

ياقوت: صافي واخا ماعنديشي موشكيل ..

حليمة(جبدات التيليفون من طيب الطابلية): شني بانلك دتجي عمتك تنقشلك ؟

ياقوت(شافت فيها بنظرة فرحة وشافت يديها):
بصاح؟ ماكرهتشي نقاش ..!

حليمة(صونات عليها): راوا كيصوني ..

مجات فين تجاوبها ياقوت حتى تشد الخط و سمعات "آلو" بنبرة مستفزة ! ..

حليمة(تقادات فجلستها و التيليفون فوذنيها ):
سلام عليكم ، لباس عليك ؟

***(من هضرتها تميز أنه محاملاش الإتصال معاها):
نقولو بيخير .. شني كاين ؟

حليمة(كاتشوف نيشان في ياقوت ):
حمد الله على كل حال! .. العواول و الراجل صحتوم بيخير ؟

***(ماكرهاتش تقطع فوجهها لكن حبسها الفضول تعرف علاش صونات ليها):
بيخير أختي بيخير ! ..

حليمة(ماعجبهاش الحال كي كاتهضر لكن الواجب عليها ! ): صونيت لك دجي لخطوبة ياقوت نهار 2 فشهر و تينا عمتا لازم تنقشلا ! ..

***(كاتأفف من ورا تيليفون): مسافرة و ماعنديشي كيندير ندجي ، الله يعاونك ! ..
(نطقات بنبرة خافتة لكن حليمة سمعاتها) .. بقالي غانقاش لدايك المنحوسة !

قطعات عليها و حليمة ماتسرطاتش ليها كي هضرات معاها ندمات حتى لي صونات ليها ! .. لكن عندهم عادة وحدة هو العروسة تنقش ليها عمتها أخت باها على أقوالهم هوما فاش تنقش ليها عمتها غايكون خير عليها ولكن المسكينة مكاين حتى واحد باغي ليها الخير كولشي كايلومها على لي وقع و ماعندها هي حتى ذنب فيه! .

ياقوت غير من تعابير حليمة فهمات البلان حاوطات يديها على ظهر حليمة ..

ياقوت(كمشات عيونها و نطقات بكلام مسطنع):
والله اخالتو مابقاتشي هضرتوم كاتهامني ! .. (باست راسها ) .. ماتقلقشي ربي عارف نيتوم و نيتنا ..

- عنقاتها حليمة كاتحصر حيت ماعندها مادير أصلا! .. الياقوت من صغرها و هي هضرة الناس و هضرة العائلة كتيرة عليها و أبسط حاجة كاتوقع ليها كايلوحو عليها كلمة "منحوسة" الكلمة لي كرهاتها فراسها و فالحياة كلها! .. تصادفات مع ناس جاهلة و معارفاش بلي اي حاجة تقدر توقع ليه فاراها قدر الله و مكتوبه .. و كايبقى الحال هو حتى واحد مكايختار عائلته ! ..

-سمعو نادية كاتعيط ليهوم يجيو يتغذاو خرجو من ديك البيت و خاطرهم مكسورة واخا ياقوت مكاتبينش ولكن داخل ديالها عامر بزااف و عاضة فالصبر ! ..

- خيري جالس كايتفرج فالأخبار و نادية مشات تجيب الماء تحطو على طبلة حيت هو لي بقى ليها سلمو على خيري و جلسو مجموعين ..

حليمة: با شني عملتي فالماكلة شوفتي شي تريتور فتطوان؟

- خيري حل الطاجين لي على الطبلة و دخاخن خارجين ماعندوش مع الدجاج المحمر و فينما كيطيبوه كايديرو ليه طاجين دياله بوحده تاع الخضرة .. كايتسنى نادية تجي من الكوزينة باش يبدا توبيخه لي على سبة ! .. حليمة فاش شافتو مجاوبهاش طمرات و بدات تقطع غالخبر .. نادية جات و حطات الماء و الكاس و جلسات حدا ياقوت .. يالاه قالت بسم الله تاكل مادة يديها فطبسيل د دجاج حتى ضربها فوق يديها تفزعات و جمعاتهم عندها ..

خيري(خنز فيها و قال بحدة): قولت لك ميأت مرة ماتحطيشي الماكلة سخونة بدزاف ! ..

نادية(شافت في حليمة و قالت مخلوعة): ماتشي أنا لي عملتو ياقوت لي عملاتو ! ..

ياقوت(وسعات فيها ياقوت عينيها و جاوباتها فالبلاصة): علاش كاتكدب؟ ..

خيري(ضرب طبلة بيديه حتى قفزو المواعن لي على طبلة و قفزو معاه حتى هوما ) : مانسماعشي حاسكووم ..

حليمة(غمزات البنات و جاوباته): سماحلينا ابا مغايتعاودشي هاتشي ! ..

- كعادته فينما بانت ليه شي حاجة بسيطة كاينوض عليها صداع ! .. شخص عصبي و زاد عليه كايكبر فعمره و كايزيد معاه النgير ..!

#يتبع🔥🔥🔥🔥