أشباه الرجال 🫀مكتملة🫀

🫀الجزء 48🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

#الفصل الثاني: إلتئام الجرح🫀
°●الجزء: خمسة و تسعون (48)●°

كلثوم(صونيت تيليفونها سمعاته و جبداته من طابلية لي لابسة): .. حسن كايصوني ! .. (جاوباته) .. آلو حسن ؟ .. واخا نص ساعة و هاحنا معاك .. (قطعات عليه و شافت ف ياسمين) .. لبسي حوايجك .. ياقوت راه واجدة (تيليفونها فيديها مداته ليها) .. قلبي ليا على نمرة خديجة ! ..

ياسمين(شداته عندها تاتقالب بين نماري): .. هاهي !

كلثوم(شدات عندها تيليفون): .. نصوني ليها تجي بلاصتي غذا لقهوة ! ..

دوزات رقمها و جاوباتها طلبات منها تجي بلاصتها حتى ترجع من دوار ..

كلثوم(رجعات تيليفونها لطابلية): .. لبسي اياسمين نمشي ندوش عليا و نلبس حوايجي .. باك غايجي دابا .. ( خرجات و خلاتهم) ..

ياسمين جمعات بيجامتها و كندورة تلبسها نهار الخطبة و المكياج لي عندها و لي بلاك و روايح .. هزات شامبوان من بين هادوك لي عندها و عطاته ل ياقوت ..

ياسمين: هاكي هادا عطيتو ليك كادو من عندي ! .. (تاضرب بيديها فالهواء) .. عرفتي شحال من وحدة طلباتني عليه نقوليها فين شريتو .. (صغرات بين جوج صباعها) .. وحدة قالت ليا نعطي ليها غير شوية زقرمت عليهوم ..

ياقوت(ضحكاتها هضرتها شداته عندها حلاته و شماتو مغمضة عيونها ): .. ريحتو مزيونة ..

ياسمين(حركات راسها): . كاتبقى ريحتو فالشعر مكاتحيدش ! ..

ياقوت(إبتسمت ليها ): .. يخاليك ليلي نتينا كاتهلا فيا ..

ياسمين(كاتحك شعرها): .. عندك الماكياج ؟ ..

ياقوت(حركات رأسها بالإيجاب): .. كولتشي عندي في دوا اختيتو ..

ياسمين(جبدات جلابة فليموني لبساتها عليها و جمعات شعرها لفوق بالمقبض): .. ياختي دواور متايكونش فيهوم التيتيز مانحتاجش نتقاد عالخاااوي ..

ياقوت(تاضحك ): .. لا غير غاتعذاب راسك .. (أشارت ليها لجلابتها ) ..هايدا أحسن مافيهشي حيتا واحيد مزيون ماتحتاجشي تعدل حالتك ..

ياسمين(رشات ريحتها على عنقها): .. داكشي نيت! .. (كاطنز عليها) .. بعدا سلامتك لي خرجتي منو و تلاقيتي مع خاك عُمر ! ..

ياقوت(ماقدراتش تحسب ضحكتها طلقاتها بجهد و حطات يديها على فمها): .. نتينا حامقة! .. (حيدات يديها كاضحك ) .. بالحق ماكدبتيشي على سلامتي خراجت من دايك جهنم الكحلة .. مافيهمشي حيتا حاجة مزيونة ..

ياسمين(مشات جلسات حداها): .. اجي منين غايجيو الناس ؟ ..

ياقوت: مين وجدة ..

تحل الباب عليهوم كانت كلثوم مدوشة و لابسة حوايجها ..

ياسمين(مخاطباها): .. دغيا دوشتي !!..

كلثوم(كاتحرك يديها ينوضو): .. درت غير الصابون .. زيدو زيدو حسن لتحت كايتسنى ! ..
...

هزو صيكانهم و نزلو لتحت لقاو حسن واقف حدا طموبيل متكي على الباب كايتسنى فيهوم ينزلو و حسين معاه راكب على الموطور .. طلعات ياقوت و ياسمين لور و كلثوم واقفة مع حسن تاتوصيه ..

كلثوم(مدات ليه فيديه الساروت د الدار): .. خليت ليك شي فلوس فوق الثلاجة قضي بيهوم راه يكفيوك .. حنا بعد غذا راجعين ! ..

حسين(شدها عندها و دارها فجيب السيرفيت لس لابس و نطق قبل مايديماري الموطور): .. صافي الواليدة ماتحاجيش توصي ! ..

ركبات كلثوم لقدام و حسن ركب كايدور الساروت باغي يديماري لكن تعكسات ليه .. حل الزاج كايعيط على دراري لي جالسين تما شادين الويفي حدا الدار يدفعو الطموبيل من لور .. غير سمعوه ناضو كاملين تايدفعو فيها و ياقوت مغطية وجها بيديها جاتها الضحكة ! .. ديمارا و خرجو من الدرب شادين الطريق لدوار .. حتى هضرات كلثوم كاسرة الصمت لي بيناتهوم ..

كلثوم: وقف حدا المارشي ناخدو معانا شي حاجة مانمشيوش بيدينا خاويين ! ..

حسن(كايصوك و تايشوف فيها بنص عين): .. ماعنديشي باش نشري ..!

كلثوم(عرفاته غايقول هكا و كانت معولة أصلا): .. غير وقف وقف ! ..

وقف حدا المارشي لي جنب الطريق .. حلات الباب و نزلات كلثوم فيديها بزطامها ..

كلثوم: نجيب لي خاص و نجي ! ..

رجعات كلثوم و فيديها التقدية و شي لي يحتاجوه و لي يديو حتى لدوار حشومة يمشيو بيديهوم خاويين ! .. دايرة إحتياطها لاتكون الدار لي قدوار مافيها والو يتحاشمو مع الناس لي غايجيو و مايكبروش بيهوم و يدرو لازم خدات المسكينة من الفلوس لي معولة تخلص بيهوم الكريدي لكن ماعندها مادير ! .. ياقوت ربيبتها و دايراها بحال بنتها القلب الصافي و الطيبوبة مخلوقة منها و ماتخوْنش ليها راسها تفرق بين ولادها و بنت راجبها كل واحد و بلاصتو .. و ياقوت عرفاتها منين كانت صغيرة كاتشوفها فتصاور .. خصوصا فاش سمعات أنه الأم ديالها ماتت ماكرهاتش كون جابتها عندها تربيها و تكبر مع ولادها و يكونو خوت دبصاح مجموعين مع الأب ديالهم بكن ماقدراتش ! .. والله دار ليها تاويل د الخير كون سكنات مع باها مغاترتاحش ماديا و معنويا .. خالتها حليمة رباتها عندها مع عائلة مناقصها خير عايشين بلي قسم الله ماعندهومش و ماخصهومش و كانو مهليين فيها و دايرينها بحال بنتهم و وحدة منهم حتى لنهار مات راجل حليمة و رجعو لدوار ! ..

كلثوم(حلات الباب د طموبيل و حطات الأكياس بعده طلعات كاتشكي ): .. كيلو د الحلوى ب 100 درهم! (هزات يديها) .. لا حول ولا قوة إلا بالله هادو خرجو كرانهوم !

ياقوت(بخجل): .. مكانشي عليك تعذب راسك اخالتو ..

كلثوم(دورات وجهها عندها): .. تستاهلي ابنتي ! .. (رجعات وجهها تاتشوف اونفاص فالطريق) .. مكاين لي معصبني قدهم هوما .. كولشي بالغلى مكايراعيو الحد!

خرجو من طنجة و الطريق عامرة طموبيلات غادين جايين ! .. الويكاند كولشي تيمشي يبدب الجو و البعض طبعا ماشي كولشي .. باقا حاسة بالدوخة د السخانة شادة فيها تتدتي الله مانقياش مع الطريق .. عدوها الردان تتكرهو و ماتصبرش ليه تيجيها قاصح و كاع جنابها تايضروها ! .. قابت أنه أحسن ليها تنعس و تغفي عيونها على مايوصلو لكن والو حاسة براسها ثقيلة و معدتها تاتضرها .. تادعي الله فخاطها ماتردش غير حتى يوصلو على الأقل ! .. حَسن نوعا ما تايصوg بالسرعة باش يوصلهم دغيا ! ..