أشباه الرجال 🫀مكتملة🫀

🫀الجزء 16🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

#الفصل الثاني: إلتئام الجرح🫀
°●الجزء: واحد و ثلاثون (31)●°

سؤاله زاد جمدها كتر هي أصلا ماتوقعاتوش يتعصب لهاد درجة بشوفاته لي خلعوها كايبقى شخص غريب عليها لكن بالها مضارش فيه أنه غايأديها و لا يدير ليها شي حاجة خايبة واخا فقدات الثقة فالجنس الذكوري لكن هدا بضبط حسات معاه بالأمان واخا غريب عليها عكسه هو و من حقه حيت هي لي طلعات كدابة ..

ياقوت(هبطات راسها حشمانة منه ): سماحلي اخاي ! .. أنا كونت بغايت نبعاد مانويتشي فبالي شي حاجة خيبة .. (رجعات كادور عينيها فداك الخلى) .. و مكانشي في بالي وجدة عاملة هايدا ..

هو والو متاقش فيها حيت كون مكان هو أصلا من الأساس فين كانت غادي تمشي واش تبات فزنقة ؟ ..

عمر(نطق بهدوء عكس كي كان قبيلا معاها):
وكون ماكنتش انا فين كونتي تروحي ؟ ..

ياقوت(طلعات فيه عيونها ): كونت غانتشوف بلاصة اخرا لكن نتينا مجيتي قودامي ! ..

عمر ماعرفش دابا شنو غايدير معاها مايقدرش يديها لدارهم حيت مستحيل هادي حاجة مايتقبلهاش العقل أنه يدخل بنت غريبة على عائلته الثيقة مابقات فحتا واحد لي يزعم و يدخل بنادم غريب عليه لداره حيت معارفش شنو غايخرج منه .. بقا واقف كايحك لحيته كعادته فباله حل واحد و هو أصلا لي غايدير حيت ماعندو حتى شي حل .. طلب منها ترجع لطموبيل هو بقا واقف تالف ديال بصاح مشى لطنجة على قبل خدمته و رجع معاه خطية ! .. طلع لبلاصته و ديمارا ماحبس حتى لقدام حي شعبي لي كايكون عامر بالحضاية و قوة العايلات لي ماعندهم شغل و لا خدمة مقابلين لي داخل و لي خارج و شادين النميمة فلي دايز حداهم .. و البراهش كايلعبو حداهم مقربلين الزنقة كتر منهم بصداعهم .. نزل هز سبقها و حتى هي نزلات كاتشوف و كاتكتاشف الدنيا لي تحرمات منا تشوفها و تعرفها كي دايرا ! .. كاتعجب من الحوايج لي منشورين فالسلوكة فبرا هي عارفة السطح بوحده لي كيتنشرو فيهوم الحوايج ! .. دخلو مع الزنقة و الناس عينيهم عليهوم و حتى هي كاتشوف فيهوم لكن بنظرات غرابة جاوها هادشي مختالف بزاف على المحيط لي كبرات فيه هي ! .. ماوقفو حتى لحدا واحد الدار بسيطة و بدا عمر كايدق فبابها لي من الحديد ..!🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

#الفصل الثاني: إلتئام الجرح🫀
°●الجزء: اثنان و ثلاثون (32)●°

بقا كايدق شوية حتى تحل الباب خرجات منه إمرأة خمسينية غير شافته تضهشرات و ضهرات إبتسامة فثغرها و عيونها كيلمعو بان ليه فهاد اللحظة غير هو مشافتش كاع ياقوت لي حداه و فنفس ..

***: سي عمر ! .. (فتحات ليه الباب يدخل) .. دخل ماتبقاش فالباب ! ..

عمر(شاف في ياقوت و رجع شاف فيها): ربي يفيض خيرو عليك مرة جايا ان شاء الله! .. مافيها باس البنت تبقا معاك شي يامات ونوليلها ؟ ...

***(عاد رضات لبال لياقوت جمعات إبتسمتها و قفات كاتعبر فيها من لتحت لفوق ): مرحبا بيها اسي عمر مكاين حتى موشكيل !..

عمر(شاف فياقوت و قال مخاطبها): ديري عقلك صاي ؟..

حركات ليه ياقوت رأسها و هي ثايقة فيه واخا هاد المرأة لي قدامها مارتاحتش ليه غير من الشوفات ولكن على الأقل حيدات عليها الحمل و لقات فين تجلس ..

***(باقا كاتعبر فياقوت بشوفات غريبة):
دخلي ابنتي الدار دارك ! ..

دخلات ياقوت و بقا عمر مع ديك المرأة كايوصيها ..

عمر: الفاميلة ماتوصلهومش لخبار ....شياختنا تبقا بيناتنا !

***(إبتسمت ليه): كون هاني اسي عمر و البنت على راسي و عيني ..

هو مشى و هي سدات الباب مابغاش عائلته تعرف حيت غايبغيو يعرفو منين جابها و شنو كادير معاه و هوما عائلة محترمة مغاديش يتقبلوه مع وحدة مابيناتهوم زواج و غريبة عليهوم و ماشي من عائلتهم هو فقط فكر لهكا حيت جات ناقصة يكون مع وحدة ماشي من دمه هو دار لي عليه و ماخلاهاش فزنقة و هادشي كافي بالنسبة ليه ..

ياقوت غير دخلان لدار بان ليها الصالون جلسات على السدارية متبتة و ساكتة حتى دخلات عليها ديك المرأة .. لقات عليها نظرة و دخلات نيشان لواحد البيت خلاتها تنا بوحدها حتى داز شوية عاد خرجات عندها ..

***(إبتسمت ليها): شنو سميتك ابنتي ؟ ..

ياقوت(بادلاتها الإبتسامة): ياقوت ! ..

***: متشرفين ابنتي .. عيطي عليا حفيظة ..! (مشات جلسات حداها ) .. قولي ليا ابنتي فين كاتعرفي سي عمر ؟ ..

ياقوت(إبتسمت ليها): جابولي الله في طريقي ! ..