أشباه الرجال 🫀مكتملة🫀

🫀الجزء 17🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: السابع عشر  (17)●°

تسمع صوت الباب كيدق  مشات حفيظة حلات الباب و ياقوت يحسابليها عمر لي رجع حتى دخلات عليها حفيظة هي و بنت عشرينية .. البنت كاتشوف فيها و ياقوت حتى هي ماحيداتش عينيها ..

حفيظة(نغزات البنت): سيري ا مينة لبيتك غانجي دابا  ..

داكشي لي دارت دخلات مينة و تبعاتها حفيظة مخليين ياقوت كاتعجب فيهوم .. جراتها لداخل لبيت و سدو الباب باش ماتسمعش ليهوم ياقوت ..

حفيظة(مخرجة عيونها مظهشرة): عرفتي هادي لي هنا شكون جابها !..

مينة: شكون ؟؟ جاوبي خلاص ؟؟

حفيظة: سي عمر! .. باقي مصدومة والله عومرو جا عتب هنا من نهار تخطبتو ! (عاد ردات البال لشعرها لي طالقاه و داك المكياج و القصيصة لي مقطعة ) .. اويليييي حيدتي الزيف ؟ (كاتدورها قدامها) .. خرجتي هكا ؟

مينة(باقا حالة فمها مصدومة): خلينا من هادشي اماما دبا ! .. واش متأكدة عمر نيت لي جابها ؟ (صغرات عيونها و قالت حاقدة) .. دابا زدت تأكدت بلي مكانعني ليه والو !  ..

حفيظة(ضربات فخدها مفقوصة): من نتيك ؟ .. هو لي خلاك و لا نتي وا دوي ؟ دوي ؟ لاش ساكتة ..

مينة(قالت بنفس مخنوقة): ماما الله يخليك لي فيا كافيني ! .. عيت صابرة ليه حتى مابقا صبر .. عارفاه غايرجع ليا ! .. ولكن مغانرجع ليه نيت حتى ندمو .. (قبضات تعابيرها) .. واش اعيباد الله حتى قهوة مكايدني ليها ؟ و ماخداش نمرتي غير نهضرو بعدا بينما تزوجنا هادشي راه بزاف عليا ! بلا داك الحجاب لي فرض عليا .. هضرنا مرة وحدة الراس فالراس فاش مع واليديه يخطبني ! ..

حفيظة(بقات غير كاتشوف فيها فقصاتها ديال بصاح):
حياتك كاملة و نتي كاديري الزيف تخطبتو و فسختي الخطوبة ! .. عاد بان ليك الشعر ؟ .. حتى إلى شافك هكا مغايرجعش ليك!

مينة(حكات شعرها): غير باش نختابرو وصافي! إلى شافني هكا و غار عليا راه مزيان غانعرفو بغاني ! ماشي كي قبل بحالا ماشي أنا هي خطيبتو ! و فاش كانطلب منو نخرجو بجوج كايقول ليا خدام ! .. و كون ما الحاجة لي عطاتني نمرتو نبقا نصوني عليه كاع مايجي يبادلها معايا

حفيظة(خنزرات فيها): و فكري غير فالحاجة لي بغاتك ليه و دارت المستحيل باش تكوني معاه .. و كون ما هي كاع ماتجمعكم لا هضرة لا خطبة ..

مينة: ماما راه كنبغيه و كيعجبني ولكن شخصيته مكاتعجبنيش و ماشي من داك نوع لي تقدري تبدليه كي ما بغيتي ! ..

حفيظة: هي دابا نتي مابقيتيش باغاه ؟ .. حتى تديه ليك شي وحدة !

مينة(خنزرات فيها): ياربي السلامة ! أنا دابا غير باغاه يفهم راسو بلي مكيعجبنيش كي كايتعامل معايا ..

حفيظة(شافت جيهة الباب): بعدا مارتاحيتش لديك البنت لي جاب ! ..

مينة(حابسة الضحكة): غاتكون غير شي بنت صاحبو خلاها ليه ! البنت قاصر ماتخافي منها والو باقي صغيرة ..(حلات الباب دالبيت).. انمشي نشوفها ..

قبل ماتخرج عيطات عليها حفيظة..

حفيظة: شوفي غذا الجمعة راه كايكون فالدار حيت كيتجمعو على الغذاء جي عندي باش تشوفيه و تهضري معاه ! ..

حركات ليها مينة راسها بالإيجاب و مشات خرجات عند ياقوت لقاتها كيما خلاتها جالسة مشات جلسات حداها ..

مينة(كاضحك ليها): الكتكوتة فين كاتقراي؟ ..

ياقوت(بإبتسامة كعادتها): مكنقراشي ! ..

مينة: و شحال فعمرك ؟ ..

ياقوت: عوشرين عام ..

مع قالتها مع دخلات حفيظة سمعاتها و مينة تصمرات بلاصتها و كايشوفو فبعضياتهم ياقوت مابقاتش مرتاحة فهاد الدار بغات غير يرجع عندها عمر هو لي جاها ثقيل و لايقيا راحتها معاه حيت مكايتسوقش ليها و مكايكترش عليها الأسئلة ..

مينة(بلعات ريقها و قالت قابضة تعابيرها): و شنو كاديري مع سي عمر ؟ ..

ياقوت: خاي عمر غير وقاف معايا أختي ! ..

مينة ناضت و هي ماعجبهاش الحال كيفاش قدر يجيب معاه وحدة حتى لعندهم الغيرة بدات تاكل فيها مامتقبلاهاش منه بتاتا حيت فالأول يحساب ليها صغيرة و لكن فاش عرفاتها تقريبا نيت قدها بيناتهم غير عام ماحملاتش الوضع خصوصا فاش ركزات معاها شافتها زوينة و عاطية العين خصوصا عويناتها لي فالعسلي كايجدبو و واضحين بزااف فوجهها .. حفيظة مشات عند دايرة ليها إبتسامة صفرة أكيد غادي تكون مع بنتها ماشي مع وحدة برانية عليها ..

حفيظة: نوضي إلى بغيتي ترتاحي و تنعسي ! ..

ناضت ياقوت هزات صاكها و تبعاتها دخلاتها لنفس داك البيت نيت وراتها فين تنعس خرجات و خلات ياقوت تما هزات من الصاك بيجامتها لبساتها و طلقات شعرها و قادات الفراش بغات غير تنعس حيت الطريق عياتها .. غير حطات راسها على المخدة طاحت مهدودة بالنعاس ..