أشباه الرجال 🫀مكتملة🫀

🫀الجزء 31🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء:  (31)●°

زاينة فهمات أنه هوما لي قطعو عليها الماء و الضوء ! حيت مستحيل بجوج يتقطعو خطرة و حدة ! .. مشات تحت دروج لي فيه داكشي لي مكايحتاجوهش و دوك الجلالق القدام .. لقات قراعي د 5 لتر فيهوم الماء كانو كيعمروهم على حسب طموبيل .. هزاتهم و خواتهم فالسطل بدات تمسح فالغبرة و خرجات السدادر و الفراش برا باش تحيد منو الغبرة .. ماسلات حتى كان ظهرها غايتقسم ! .. صيفطات واحد من دراري لي كيلعبو فالزنقة يجيبو ليها الشمع .. سالات تسياق الدار و نقاتها حتى رجعات حسن بعدا من الأول .. رغم أنه صغيرة لكن كانت صعيبة عليها بحكم كانت موسخة بزاف فيها مراح و بيت صغير و كوزينة و طواليت كانت كافياها هي و ولادها المهم ماتلاحش لزنقة واخا هي براسها مغاديش تخرج من هاد الدار حيت عندها فيها الحق ماشي غير غاتجي تخرج منها غير هكك الدار عندها فيها الحق الكامل ماشي غير النص ! فسمية راجلها و و لدها تموت و ماتخويش ليهوم هنا و فالأصل المرحوم راجلها هو الكبير فخوته و خلاو ليه دار و الإخوة فرعايته لكن غير دفنوه تحت تراب عراو على نيابهم و بينو شرهم لمراته ! فلول ضعافت و قالت أحسن تخرج منها و تخليها ليهوم يربحو بيها لكن لا ! .. مكايناش السيبة باش تخليها ليهوم واخا نزلات لتحت و هادشي كامل لي دارو ليها لكن مابغاتش تصرع غاضرب ليهوم من تحت الدف ! .. بعد تفكير طويل و هي مشغولة طاحت جالسة كلها عرقانة مهدودة دبصاح .. كاتخمم و هازة الهم لضوء و الماء لي قطعو عليها ! .. العوينة فين غاتعمر الماء بعيدة شوية عليها .. و الضوء راه عندو الحل غاتقضي بالشمع ! .. شافت جيهة بنتها لي ناعسة مرتاحة مهازة لهم لوالو باغا تاكل و تنعس و تلعب صافي ! .. مشات هزاتها قادات ليها بلاصتها فداك البيت و شعلات الشمع .. ناضت تسد باب الدار لقان البواني مهرس من لداخل! .. شدات فمها ماعرفات مادير و الرجالة معاهم فالدار .. دفعات الباب و خدات وسادة مكالية بيها الباب غير باش يبان بلي مسدود ! .. رجعات بلاصتها حيدات حوايجها بقات غير بي بيجامتها تكات حدا بنتها و حطات راسها على يديها .. كانت عيانة و مهدودة طاحت طيحة وحدة مع بدا يديها نعاس فيقاتها يد كاتلمس فرجليها و لسان كايمر وسط صباع رجليها ! ..

ماعرفات باش تبلات ناضت بغوتة وحدة نقزات من فوق السدارية لي ناعسة عليها الشمع باقي ماطفاش كان باين شكون واقف وسط البيت كان لوسها ! .. تصدمات ماضناتهش ابدأ غادي يدخل عليها وسط بيتها و هي لابسة غير بيجامة و الخايبة كاع هي أرملة و ماكملاتش حتى العدة ديالها ! .. كانت ريحة الشراب كاتفوح منه دايخ معارف شنو كيدير و هي الأعصاب بداو يطلعو ليها .. بنتها حلات عويناتها فاش سمعات الغوات ديالها بدات تبكي حتى فيقاتها هي أيضا من سهوتها كان واقف كيشوف فيها كايضحك بسرعة هزان جلابتها لي كانت حطاتها حداها هي وشالها لبساتهم دغيا و بزربة مشات جراتو من كتفه باغا تخرجو من لبرا ..

زاينة: خرررج خررج ! واشا بغيتي عندي خرررج !!!  ..

بدا كيقرب منها حتى حسات بيده تحطات على خصرها .. هنا بدات تفقد سيطرتها ماحسات براسها غير حتى هزات يديها لفوق عطاتها ليه لوجهه حتى رعف من نيفه .. بقات كاتغوت بكاع جهدها ..

زاينة: خرج السكايري خرج عليا ! .. (بانت ليها الشطابة قدامها هزاتها هرساتها عليه حتى تقسمات على جوج فوق ضهرو) .. خرااااااااج عليا ! ..

عائشة بدات تبكي فاش شافت داك المنظر لي فوق عمرها الصغير ! .. سمعو صداع من الفوق نزلو كاملين كيجريو العكوزة و بناتها شافو خوهم طايح لأرض شاد ظهره كايغوت .. مشات وحدة فيهوم كاتجري عند زاينة باغا تجبدها من شعرها .. حتى هزات عليها زاينة داك راس شطابة لي بقا فيها ..

زاينة(خرجات فيها عينيها): تجي جيهتي مايعجبك حال ! .. نفلݣها على ظهرك كيما درت لسكايري دخوك ! ..

وقفات خايفة على راسها ! .. زاينة عارفينها مزيان نهار تطلع عليهوم مكايبان ليها حد ! .. العكوزة و بناتها كيخنزرو فيها معاونين خوهم ينوض يطلعوه لفوق حيت تهرس من ظهره ! ..

العكوزة: جمعي صوالحك دروك تخرجي من داري ! ..

زاينة(ضحكات بفقصة): خلاها ليك باك؟ .. (خرجات فيها عينيها حتى خلعاتها مغوتة فوجها) .. داري و دار راجلي و دار ولادي ! .. إلى مافرقتوش جرتي نتوما لي غاترماو لزنقة  .. (طلعات صبعها قدامها) .. راني ݣولتها ليك ماتغانيش معايا! ..

العكوزة(خسرات ملامحها): نتي لي بغيتي الغنان .. يابيا يابيك فهاد دار ! ..