ဗီလိန်ကြီးပေါင်ပဲဖက်ပါရစေ (ဘာသာပြန်)

အပိုင်း ၅၁

Unicode

ပို၍ ပို၍ များပြားလှသော အစိမ်းရောင်အလင်းအစက်များက ယုံးဝူမင့်၏ ခန္ဓာကိုယ်တစ်ဝိုက်မှာ စုဝေးလာသည်။
　　
စန်းယွမ်ယွမ်၏ စိတ်က ဗြောင်းဆန်ထွေပြားနေလျှင်တောင်မှ သူမအနေဖြင့် အားကောင်းကာ ခွန်အားပြည့်ဝလှသာ သစ်သားစွမ်းအင်များကို ရှင်းရှင်းလင်းလင်းခံစားမိလိုက်သည်ပင်။
　　
သူက တကယ့်ကို သစ်သားဒြပ်စင်မှာ ဆရာတစ်ဆူဖြစ်နေတာပဲကိုး။
　　
ဒါက စန်းယွမ်ယွမ် မျှော်လင့်ထားသည်နှင့် သွေဖယ်နေသည်။ အစက သူမထင်ထားသည်က ယုံးဝူမင့်က မီးဒြပ်စင် သို့မဟုတ် ရွှေဒြပ်စင်ကို ပိုင်ဆိုင်လောက်သည်ဟု တွေးထားတာဖြစ်၏။
　　
ထင်မှတ်မထားစွာ ၎င်းက သစ်သားဒြပ်စင်ဖြစ်နေလေသည်။ သူမကဲ့သို့ သစ်သားဒြပ်စင်မျိုးပင်။
　　
ဒြပ်စင်တူသည့် ဆရာကြီးတစ်ယောက်ဘေးမှာ ကျင့်ကြံရတာက တစ်ဝက်လောက်အားထုတ်လျှင်ပင် နှစ်ဆလောက်အကျိုးသက်ရောက်စေပေသည်။
　　
သူက များပြားလှသည့် စိတ်ဝိညာဥ်စွမ်းအားတို့ကို ဆွဲထုတ်လာပြီး ယင်းက သူ့အနား၌ စိတ်ဝိညာဥ်မုန်တိုင်းငယ်အသွင် ဖြစ်လာစေသည်။

စိတ်ဝိညာဥ်စွမ်းအား အနည်းငယ်စိမ့်ထွက်လာလျှင်တောင်မှ နည်းနည်းဆို နည်းနည်းလေးဖြစ်လျှင်တောင်မှ သူမအတွက်တော့ ဆယ်ရက်ကနေ လဝက်လောက်ထိ ထိုက်တန်လှသော ကျင့်ကြံရေးကြီးပင်။
　　
သဘာဝကျကျပင် သူမကလည်း ထိုအခွင့်အရေးမျိုးကို လက်လွှတ်မခံချေ။
　　
သူမက ခေါင်းထဲက မေးခွန်းသင်္ကေတပေါင်းများစွာကို မြိုသိပ်ကာ အတင်းအကြပ် စိတ်ငြိမ်အောင်ထား၍ စတင်ကျင့်ကြံလိုက်သည်။
　　
စိတ်ဝိညာဥ်စွမ်းအားတို့ကို ဆွဲယူသော သူမ၏စွမ်းအားတို့က ယုံးဝူမင့်ထက် သန်မာလှသည်။
　　
နတ်သူငယ်ကဲ့သို့သော ထိုအစိမ်းရောင်စိတ်စွမ်းအားများဟာ မကြာခင်မှာ ပုန်ကန်ထကြွလာပြီး မူလက ဝဲကဲ့သို့ လုံးဝန်းနေသော စိတ်စွမ်းအားတို့မှာ တဖြည်းဖြည်း မူမမှန်ဖြစ်လာကာ ယုံးဝူမင့်အနားကနေ ပျံသန်း၍ စန်းယွမ်ယွမ်ဆီသို့ ဖြည်းဖြည်းချင်း ဦးတည်လာလေသည်။
　　
သူမသည် ထင်မှတ်မထားသည့် အလေးပေးမှုကြောင့် အနည်းငယ် မြောက်သွားသော်လည်း ကြက်သီးမွေးညှင်းတို့ အနည်းငယ်ထနေရ၏။
　　
သူမ တုံ့ဆိုင်းကာ စိုးရိမ်နေဆဲမှာပင် ရုတ်တရက်ဆိုသလို နားထဲလေမှုတ်သွင်းလာမှုကို ခံစားလိုက်ရပြီး နတ်ဆိုးကဲ့သို့သော ရယ်သံနှင့်အတူ စကားသံတစ်သံက သူမနားနားကပ်၍ ဆိုလာလေသည်။