"Hər vaxtınız şeir" ...

"Azadam"

Olsun ətrafımda qoy lap az adam.
Bilim boş həsrətdən, qəmdən azadam.

Havalar dəyişib, külək yön sorur,
Qar özün evsizin üstə qondurur.
Ya günəş qovurur ya qış dondurur,
Görmür buralarda daha yaz adam.

Biganə insançün başını əyib,
Dərdləşmək anında özü dinməyib,
Öz qəlb qırığıyla yenə dinləyib,
Nə qədər çəkməli söylə naz adam?

İtirmək qazanca həqiqi rəydi,
Nəyi itirdinsə qəlbinə dəydi.
Deyirlər təcrübə elə bir şeydi,
Darağı qazanıb qalır daz adam.

Dünya al-ver ilə doludur belə,
Pul-para dolaşır bax əldən-ələ.
Ən böyük al-verçi dünyadır elə,
Çoxa saray verir amma aza dam.

- Hümbət İsmayılov

Möhtəşəm şəkillərin ünvanı : NigarSadiq