"Hər vaxtınız şeir" ...

"Cəhd sayı"

Mən də cəhd etmişəm, olmuşam sırtıq.
Bu yolda yaranıb ayaqda yırtıq.
"Bədbindir! Bədbindir!" deməyin artıq!
Bilmirsiz boş çıxan cəhdin sayını!

Uğursuz səylərim qəddimi əyib
Nə qədər çalışsam, başıma dəyib.
Bəlkə də qismətim belədir deyib,
Qismətə vermişəm cəhdin payını...

Ömrün yaz yaşında donub ölmüşəm.
Misralar başında donub ölmüşəm.
Gördüm ki, qışında donub ölmüşəm,
Gözləyə-gözləyə cəhdin yayını...

Cəhdimi qırılan rəndə etməyim.
Özümü ağılsız bəndə etməyim.
Madam ki alınmır, mən də etməyim,
Çıxarmaq olmaz ki cəhdin zayını.

- Hümbət İsmayılov

Dərin və gözəl şəkillər üçün təşəkkürlər : NigarSadiq