"Hər vaxtınız şeir" ...

"Rəsmi ayrılıq"

Ərşədək qalxsa da fəryad fələkdən,
İstənən ayrılıq tətbiq edildi.
Gəlib eşqinizi alın ürəkdən,
Sizin müraciət təsdiq edildi!
 
Bağladıq biz artıq ürək qapısın,
Yaşamaq xoş olur minnət olmasa.
Nə qədər xatirə varsa hamısın,
Silin ağlınızdan zəhmət olmasa.
 
Tənhalıq sağ olsun, bizə dam verib,
Yalqızlıq evini biz talamışıq.
Unutmaq naminə sərəncam verib.
Yaşlı qələm ilə imzalamışıq.

Rəsmi bir məktubdur bax bu da bir növ,
Göndərin, bəlkə bu canım alacaq...
Gedənlər küçəsi, nakam adlı ev,
Gözəl, iri gözlü xanım alacaq...
 
- Hümbət İsmayılov