الحلقــــ36ــة "القســ3ـــم "
💠✴✴💠
جرات بيهم الايام ...وكل حد تلهى في همو ...أحمد وريما ...تفاهمو يسقسو على جناة أكثر وحقيقة تولين بنتها وما يعفو الا مايفهم التاڨزة كاملة ...
عبد الجليل ....الشك نخر عقلو والتاست ايلي طلبو لازمو وقت ودبارة وهو مستعد يصبر أكثر ،المهم بالنسبة ليه يشفي غليلو ويطفي نار الشك ايلي شعلت فيه من كلمة قالها اركان ....
نزهة ...حياتها وقفت بين تولين و مشاكلها ...وماعاد متلفتة لشي اخر
أركان ...كان همو واحد يحمي تولين من شر بن الرجب ...اما هي...فعقلها مقسم لانصاف ...نص يخمم في عايلتها الصغيرة وكيفاش تحميها ...ونص يخمم في البو والام ايلي جابوها وماعرفتش كيفاش توصللهم.
الدنيا تاخونا بمشاغلها ، تلهينا وتبعدنا على احبابنا والناس ايلي نحبوهم من غير مانحسو ...تسرق منا حياتنا ...وفرحتنا ...ولمتنا في غفلة منا ...وأركان كان عارف انو الايام طوالت و خطر عايلة بن الرجب مازال قايم ومازال باش ينغص عيشتو ...نهارتها ...كان في الجنينة كيف عادتو ...يتشمس ويشم في هواء مفوح بروايح ورد الجنينة ...سيلين بجنبو كيف عادتها ...ماتفارقهوش...قبل كان يتفاداها و يعمل كل شي باش يبعدها عليه...لكن بعد ماتخطفت وصار ايلي صار لان ناحيتها وتقبل قربها منو ...فارشة اللعب متاعها وشايخة بيهم ...ساعة ساعة تحدثو وهو يجاوبها بكلمات خفاف باش يقص الهدرة بحكم كان لاهي في حاجات ما اهم ...بين يديه نود تصاور وضروري يفرزهم تصويرة تصويرة ...اغلبيتهم رجال ...الاعمار متاعهم ماهيش موحدة...كيما فيهم الشباب فمة زادا الشياب ...فريد المحامي مدهملو وأكد عليه يتفقدهم في عقلو ويثبت فيهم مليح ...بين هاك التصاور اذا لقى مولى الكاميون ايلي شافو وقت الحادث...فمعناها غموض موت بوه تكشف ...والفاضل وعزوز يلقاو رواحهم في الحبس وتهم ثابتة عليهم ....
الحكاية عندها سنين ...وهو كان بين الموت والحياة ...عينين ضبابة والخوف ماكنو...شاف راجل ياقف ع الحافة ويخزر للكرهبة المقلوبة في الهفهوف تحتو... يتذكر ملامحو ...لكن موش بعد اش وعشرين عام ...
ظهر لسيلين تطور لعبها وتشركو معاها ...وهو ماكانش عندو بال ليها ...دارتلو من الجهات الكل لعل يبدل رايو ...لكن باقي مركز في التصاور وباعثها ...رجعت قعدت حذاه وخيرت ترسم على ساقيه ...لعل تستفزو وتخليه ينطق من جنابو ...صنعة امها والشي يجري في عروقها...فرتت اقلامها وبدات تفلح على ساقيه ...بحكم موش حاسس بيهم ما شلقش بيها ولا نجمت تجلب انتباهو ...كل همو ...وكل تركيزو مصبوبين مع التصاور ...رجفت صوابعو وحس ببدنو الكل يرعش وقت قابلتو هاك التصويرة ...راجل في الخمسين اكاكا ...ملامحو تظهرو قاسي و متاع مشاكل بامارة الحلة ايلي فوق حاجبو ...سنين تعدت وتبدلت فيه بارشا حاجات ...لكن هاك الخزرة وهاك العينين هوما هوما ...بلل شفايفو الجافين وحس بقلبو ينبض بقوة ويخض يحب يكسر ضلوعو ويخرج...هذا هو ...مولى الكميون ايلي كان واقف يخزرلو ...هذا هو ....قتال امو وبوه ...هذا هو...الراجل ايلي خلالو ندوب في روحو وعلى بدنو ما نجمش ينحيها .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Truyện Ngắn★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
