💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 7 : القســ4ــم💚

هذا الرجل.... أبوك💙💚
🎆الحلقة السابعة : القسم 4 🎆
***************"
وقف قدام الباب متاع بيتها ، خذى هواء وخرجو باش ينظم انفاسو من بعد دق عليها ، كانت تلبس في صبادريها وقت سمعت دقانو ،باز هو ...خذات عكازها و ديڨة ديڨة للباب من غير ما تلبس فردتها الاخرى ، طلت براسها وتهدل شعرها خلاتو يراها ملكة جمال " بونجوووووغ "
بعدت من قدامو باش يدخل " صباحو ...هاك ماتينال "
خزر لساقيها " تنحي فيه والا تلبس فيه ؟"
حبت تتبولد عليه" كنت راقدة بيه لبارح وتوا كي فقت نحيتو "
زم شفايفو " امممم "
رجعت لبلاصتها وخذات الفردة الاخرى باش تلبسها ، عضت شفتها من الوجيعة وقت حبت تثني ركبتها ، نجمش يراها في هاك الحالة من غير ما يتدخل "هات عليك "
هزت راسها مستغربة "شنوة !؟ "
طفاها وخذى من يدها الفردة ، لبسهالها وسكر خيوطها ، شوفة ساقها حافية فكرتو بيها وقت جات للتاست ، نهارتها ضربها الصباط ودمدملها رجلها ، هذا الكل وهي باهتة فيه ، شنوة ها الحنية وها الفازات ايلي يعمل فيها معاها ، هو هكا يزيد يدوخها و يزيدها علة على علة في قلبها ، هز راسو لقاها مصدومة " شنوة المشكل .. احنا اصحاب وعادي نعاون صاحبي يلبس صباطو "
مدلها يدو باش يوقفها ،تمتمت بصوت مبحوح " ايه ...اصحاب "
كايني فيقتو على حاجة كان مخبيها في بلاصة ظلام وهي ضوتها " اصحاااب !"
بلعت ريقها بالسيف ، عمال بدنها يرعش وتحس ببرودة تمكن اطرافها ، بالنسبة ليه وفات طاقة التحمل متاعو ، عمال يغرق اكثر اكثر وموش ممكن تجيه فرصة اخرى باش ينجم ينجي روحو ، شفايفها كانت اخر حاجة خزرلها قبل مايعدي يد وراء ظهرها واليد الثانية لرقبتها ، ضرب قلبها بقوة لين قريب يكسر ضلوعها ،قرب وجهو منها وغمض عينو وقت وصلتو انفاسها ، كانت موش منظمةدليل انو النار ايلي تحرق فيه قاعدة تحرق فيها ، الفكرة في حد ذاتو زادتو رغبة ،بالنسبة ليه في هاك اللحظة ...تخلى على كل شي مقابل انها تكون بين يديه ...كانت بوستها الاولى مع اول راجل في حياتها وكانت تجربتو الاولى انو يطعم شفايف مرا ...كانت المرة الاولى للزوز ...حاجة عظيمة تستحق منهم انهم يغامرو ...بالسيف باش نجمو يسيطرو على رواحهم كانت ساقيهم بالسيف هازتهم ، ممكن هو كان اقوى واعتى لكن هي معادش عندها لا حول ولا قوة ...لولا يدو ايلي ساندتها في ظهرها ماكانتش تقعد واقفة دقيقة اخرى ، خزر لعينيها وشاف فيهم بحر من المشاعر ، مااستحقش باش يسألها ولا يعرف رايها ،عينيها كفت ووفت ، كافحت باش تبعد عليه لكن ع العكس شدت فيه بيديها ،تبسم وقت قرى ايلي في افكارها....باسها مرة اخرى لكن اخف من المرة الاولى ...استوالها شعرها وضربها على خشمها " باري تستنى "
تبسمت رغم الخوف ايلي حستو ...ماتعرفش شنوة ايلي عملتو ...ولا كيفاش نجمت تعمل اكاكا ....لكن مضطرة تعمل روحها عادي كيف مايتصرف هو " فازي ...نستغلو ها اانهار قبل ما نرجعو غدوة "
خذى يدها بين صوابعو وكبس عليهم بقوة "بحكم معادش اصحاب ...عندي حق ناخو يدك موش هكا "
عقدت حواجبها " مالا شنوة احنا توا "
وقف مقابلها " تحب تعرف احنا شنوة !؟ " سكتت وخلاتو يكمل " احنا زوز كذبنا بارشا على رواحنا وعلى بعضنا ...ايه ...كذبنا وكذبنا ايلي نحسو بيه تجاه بعضنا ...وماتقولش لا ...حتى لو لسانك نكر فعينيك وبدنك فاضحينك ...كنت نعرف انو قد ما انا متمنيك انت زادا كيفي ...الصدفة خلقت منا زوز وجمعتنا اكثر من مرة ...بدينا بعركة ...ومن بعد خدمة ...وبعدها اصحاب ...وفي ها الوقت هذا الكل ...عرفت انو ...انا لقيت المرا ايلي نجمت تخليني نخمم فيها ونهتم بيها نخاف لخوفها و نضحك لضحكها ...المرا ايلي وجودها بالنسبة ليا قوة و غيابها ضعف ...هاكي علاه ...تخليت على صيفة الصاحب ...و عطيت لروحي الحق باش نحبك ...و نكون معاك ...اذا كان عندك طرف شك في مشاعرك ناحيتي ...قلي ...لانو في ها اللحظة بالذات حتى لو كذبت فباش نصدقك "
خذات يدو مرة اخرى وكبست صوابعو " بارشا حاجات نحب نسألك عليهم ونوضحهم ...وبارشا زادا حكايات نحب نحكيهملك ...اذا انت قابل تولين كيف ماهي توا قدامك ...فانا زادا باش نعطي لروحي الحق باش نكون معاك "
"مازال بارشا وقت ...اكيد باش نحكاو ...وباش نسألو بعضنا ونجاوبو ...لكن توا ...خلينا هكا ...موش لازم نفسدو ايلي عشناه بحكايات اخرى "
شاورتلو براسها ايه ، جبدو عندو و كبس عليها ...لها اللحظة مازال موش مستوعب انو ايلي يعيش فيه توا حقيقة موش خيال .

✴نهاية الحلقة السابعة ✴