🎋الحلقــ25ـة : القســــ1ـــم🎋
♥❇♥
"بنت ...أحمد ...!!"
الصدمة كانت ظاهرة على وجها ...سيناريو كيف هكاكا جامي تخيلتو ولا قرتلو حساب ...كبس ناظم على نواظرو ...ماهوش وقتو ...جيانها لفم وفي هاك اللحظة غلط في غلط...مشات خطيوتين لين ولت قدامو ديراكت ...عينيها مرشوقة فيه وباقي البهتة مسيطرة عليها "انت مضطر تفسرلي كل شي ومن الاول زادا...شنوة تقصد ببنت احمد ... "
نفخ بقلة صبر " الحكاية واضحة كيف عين الشمس...تولين واحمد عندهم بنية بيناتهم "
صرت سنونها وكمشت صوابعها على صاكها " هاذي لعبة جديدة ...رجعت للا باش تلعبها وتفكلي احمد !؟ ...ها السخطة ماتفدش ؟!..ماتعياش من الجري وراه...آخرتها تطلع بكذبة ...من الحيط وتقلو عندي بنية...كيفاش عندهم بنية ...وقتاش عملو علاقة باش يجيبو بنية !؟..."زمت شفايفها " انا نعرف كيفاش نحطلها حد...جربوع الحوم الخايخة عملت راس وطلعت فيه قرون "
وافقتها زينب وهي تحاول تنحي من بالها فكرة انو احمد بو لصغير من تولين " صحيح...هاذي ...لعبة منها هي وامها ...يحبو ...يلزموه بالسيف يعرس بيها ...اما موش وانا مازلت عايشة..."ضربت الطاولة " انا نقلك فيها ...ناظم ...شوفلي عنوان دارها ...ليوم نفض ها الحكاية "
ضيقت ريما عينيها " ماكش باش تمشيلها وحدك ...انا زادا عندي كليمتين نحبها تسمعهم "
صاح ناظم وقت معادش منجم يتحمل هداريهم التافهة " حد ...ماباش يمشيلها..."شاورلهم بصبعو "حتى وحدة منكم انتوما الزوز ماباش تمشيلها..." ڨحر لامو " خلونا انا نتصرف ...انا واحمد ...اكاهاو ...وردو بالكم تعملو حاجة من غير علمنا ...وخليكم متذكرين انو غلطة صغيرة منكم باش تكلف خويا غالي ...واكثر ملي تتصورو "
هزهم وحطهم بشطر عين ومشى ...قعدو الزوز واقفين ويخزرو لبعضهم بسكات ...كل وحدة فيهم تخمم في جهة...والزوز جيهات متاعهم يتلاقو في نقطة وحدة وايلي هي احمد.
♥❇♥
" وااااااو...تقتل " شهقت الخديمة باعجاب وهي تتلمس في قماش الروبة المحطوطة علئ اطرف الفرش ً...تربثت و وخرت خطوتين لتالي وقت سمعت صوت ساقين تولين في الكلوار جاي ناحيتها ...رمشت متوترة وزربت باش تخرج ...بزهرها جات بالضبط في وجها وعلى شوية كانت سطعت فيها ...تلعثمت " س...سامحني ..مدام "
تبسمت تولين برقة "موش مشكلة " عقدت حواجبها مستغربة اول مارات الروب " شنوة هاذي ؟!...مانتفكرش وصيت عليها "
لمعت عينين الخديمة "جات توا ...سي اركان بعثهالك وصى باش تجربها "
عوجت فمها "أركان !؟ " ضحكت وهي تقدم شوية ناحيتها ، الروب كانت موف وطويلة ...متقونة وكلاس أكثر ملي تتصور ...فبرا تاليفونها في جيب سروالها ،ايلي طالب كان اركان ،ظاهر فيه حافظ وقتو مليح ...المرة هاذي هزت وماخلتهوش يعاود يطلب "انجم نفهم سبة ها الروبة !؟ "
ضحك "صباح الخير ...الحمد الله انا صفا ...وانت ؟! "
غمضت عينيها بقلة صبر وشدت صحيح في السؤال " تنجم تقلي شنوة سبة ها الرووووبة ...بعد صباح الخير "
اركان "مريتي الغالية خسرت روب لبارح ...وهي تحب الروب اكثر من روحك ..."
ضحكت على جنب بتمسخير " تحب تقول جبتهالي خاطر قطعتلي روبتي امس "
اركان "لااااا...جبتهالك باش تلبسها الليلة في السهرية ايلي مستدعيك ليها ...تعرف عزيزتي لازم تكون بريزونتابل قدام الناس موش بروبة الاسواق هاكي"
صرت سنونها بغل وعلقت عليه ،ماعندهاش بال واسع للتمقعير متاعو ،تلفتت وراها وقت كلمتها الخديمة " مدام تولين فمة حد حاجتو بيك "
عقدت حواجبها مستغربة لانو ماعطات موعد لحد "شكون ؟! "
الخديمة "ماقاليش قال تو هي تعرفني "
وساعت عينها وقت جاء لبالها احمد "عينيه خضر ؟! والا هوما زرق ؟! "
الخديمة "لا لا عادي"
تنفست براحة "باهي ...دخلو للصالون هاني جاية "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Historia Corta★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
