💞الحلقة الثامنة عشر : القســ4ـم💞
قدمت منو نزهة بخطوات واثقة ومركوزة مليح ...ماهمهاش الڨزاز ايلي عفست عليه بشلاكتها ،واجهتو براس مرفوع تقول عليها عبد اخر موش هي ايلي كانت تندب على الفضيحة ايلي جابتهالها تولين " خلي محبتك عندك ..."
تبسم بكل برودة دم وكاينو الموضوع تافه ما يستحقش الجدية هاكي الكل " وعار بنتك وشرفها ...اش باش تعمل فيه؟! "
تحدتو بنبرة مليانة قوة وتحدي " عار بنتي انا نغطيه وشرفها موش للبيع لناس لامثالك يستقاطو على هفوات العباد "
مط شفايفو وتكلم بجدية خوفتها ورجت عرصها ايلي راكزة بيهم " الموضوع خرج من يدك يا مدام نزهة ، كنت تنجم تغطي عارها من الاول ...وتستحفظلها على شرفها من قبل ...توا فات الفوت ..معادش عندك شي تعملو ...انت عاجزة حتى باش تحكي كلمتين خوات موزونين ...لذا...مجبورة توافق وتخليني نعطي اسم ولقب لفرخ الحرام ايلي في كرشها"
ظلامت عينيها وبالسيف سيطرت على روحها ،صرت سنونها وشاورتلو بصبع الشهادة ناحية الباب "اخرج من داري ...تحرك"
مال فوقها ووشوشلها في وذنها وخذى حذرو لا توصل كلمة لتولين " تولين بن الرجب مستحقتني انا تو...واذا خرجت ...يا نخرج انا وهي ...يا تخرج انت بفضيحة كيف فضيحة بنتك "
غمزها بشطر عين وفمو مازال راسم نفس التبسيمة متاع الشر ...قعدت تخزرلو وهي جامدة ...قلبها يضغط على ضلوعها لين خنقها ونفسها تخلط في بعضو ...من سنين سكرت صندوق عايلة بن رجب ورمات مفتاحو في البحر ...كانت متصورة انو باش يتردم تحت سابع طبقة متاع ماااء...في قاع متاع محيط غارق ...لكن الموج هزو ورماه تحت ساقين ها المجهول ...الحقيقة ايلي تدفنت في قبر منسي ...جاء الوقت والريح عرى ترابو وبانت بالكاشف واضحة كيف الشمس
سألتو بصوت مبحوح يرجف بعد ما مكنها الشك ونخرلها عظامها " شكونك !؟ "
بلل شفايفو بريقو وخزر لتولين ايلي اتبع فيهم بعينين باكية وتايهة وهي موش فاهمة شي ملي يصير قدامها " ماانجمش نقلك شكون انا بالضبط ...اما تو...ما انجم نقولك كان ...." تنهد بصوت مسموع " انا القشة ايلي تستنى فيها تولين الغارقة...انا يا مدام الحل الوحيد باش ما تقتلوش روح بريئة ...والحل باش شرفكم مايمشيش تحت الساقين ...بنتك وانا ...باش نصححو وريقة صغيرة ونطيرو لسويسرا وغادي نكملو حياتنا بالرفاه والبنين ...اذا تحب تجي معانا مرحبا ...هواء اوروبا متأكد باش يوالمك ويكبسلك اعظامك ويشحطلك جلدتك وترجع ترنكوشة ...واذا قلت لا ...انت حرة...مانيش باش نكون نسيب قاسي وخايب ونمنع عليك بنتك ...في كل وقت تنجم تدز الباب وتدخل علينا "
سألتو مرة اخرى" انت تعرف ....عايلة بالرجب !؟ "
اعترف وبكل صراحة " الله غالب ...صدفة لقيت روحي نعرفهم "
ضيقت عينيها " بنتي ماهيش للعب...غلطت ...وانا من واجبي كام نستر عليها ...مانيش باش نخليهالك ....انا مستحيل ...."
قص عليها وهو يخزر لمنڨالتو " معادش بكري ...سويعة برك في يديكم ...اذا فاتني الموعد ايلي خذيتو في البلدية ...فمعناها فاتتكم فرصة من ذهب انتوما زادا ...هيا ...انتوما الزوز قررو فيسع ...ماعنديش وقت نضيعو "
💚⭐💚نهاية الحلقة الثامنة عشر 💚⭐💚
(ملاحظة : ابتداء من الحلقات الجاية باش يكون فمة تسريع للاحداث يعني باش تلقاو رواحكم بعد سنين من الحادثة هاذي )
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
القصة القصيرة★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
