🌼الحلقة 22: القسـ1ّـم 🌼
سيلين لقات الجو في جنينة نزهة ،سيبوها وهي برطعت فيها قد ما حبت ...يخزرولها من شباك الكوجينة وشايخين عليها ...فتروشة تتكعبر محلية القعدة وحسها في الدار دفاهم عاملة جو ع الاخضار وناسية امها جملة وموش ملوجة عليها...حطت نزهة الاطبقة على جنب بعد ما لمتهم من الطاولة وبدات تغسل فيهم ،صفنت تولين على ذراعاتها في نية تعاونها "خلي عليك تو انا نغسلهم ...انت تعبت باش حضرتهم تزيد تغسلهم !؟...لا عاد ما يجيش منو "
نزهة وهي تضحك وتخزرلها موش مصدقة "مثبتة انت تولين بنتي والا بدلوك!؟ ...خاطر بعمرك لا مديت يدك قبل وعاونتني وريقي يشيح باش تفرش الناب ع الطاولة "
تبسمت بمرارة تخلطت بذكريات الماضي ايلي ندمت عليه " هذاكا قبل ..تولين هاكي مشات ومعادش ترجع "
مسحت نزهة على شعرها بلين، تعرف بلڨدا داء بنتها وموش بالساهل وحدة في عمرها تتحملو " ايلي فات معادش يرجع ...انت توا مرت راجل وام لبنوتة كيف الشمس ...خمم كان فيهم...و ما...." قصت جملتها ونسات حتى اش باش تحكي وقت خزرت لمرافقها بالصدفة ...شافت زروقية بدات تظهر ،وايلي هي بلاصة صوابع اركان ،عقدت حواجبها وبدات تثبت فيهم وتقلب في ذراعها""ضربك....!؟...مد يدو عليك هالي مايسواش ...ها الحيوان..والله يا انا يا هو ليوم "
تكونت دموعها وهي تشد نزهة من اكتافها "امي ...بربي يزي ...امان ماتعملش هكا ...ايلي يصير خلي يصير انا معاد معدلة على ...لا تحكي مع اركان ولا مع غيرو ...شاهية نعيش رايضة لا عرك لا حس "
"باش تسكت كيف العادة...تولين.... بدنك ازرق حالة ...وزيد شوف وجهك في المرايا ...هاذي انت !؟...وينهي بنتي ايلي تلمع كي النجوم ...شبيك طفيت كي الشمعة ...اذا انت رضيت بها الحالة انا لا...مانيش باش نستناك تجيني في صندوق "
تمتمت بوجيعة " ديجا انا في الصندوق من سنين ...كان ع الموت ...انا ميتة ..."
خذات يدها بين كفوفها بكل حنية " طلقو ....طلق السخطة ...وارتاح ...وانا مانخليكش...لا انت تحبو ولا هو يحبك ...ولابينكم صغار ..."
"والناس ....وشرفي ....وشرف بنتي ....مانحبش حد يقلها هذي الساقطة بنت هاك الساقطة...مانحبهاش تسمع كلمة قطعة حبل جايبها واد ...امي انا مستعدة نشري شرف بنتي ومستقبلها بحياتي ،هاالزروقية تمشي مع الوقت وتبرى ...اما شرفها ذا تمسخ معادش يتنظف ...انت تعرف مليح شنوة نحب نقول "
الكلام ايلي قالتو ماعجبش نزهة "عندو بوه ...بالسيف عليه ينظفلها شرفها ويتلفت لبنتو ...والا ما زعيم كان في...استغفر الله ياربي "
دوحت براسها " خير على خير... عيلة بالرجب اذا سمعو بسيلين ...باش يفكوهوالي ..."
"فمة قانون في ها البلاد ماهيش مسيبة على ڨرنهم "
"أمي ...سيلين جات في الحرام...على اما قانون تحكي ...وحتى اذا ثبتت بنتهم ...هوما ياخذوها ويمنعوها عليا ...بوها ايلي تحكي عليه عندو حياتو تو ...خطب وموش بعيد يعرس...وغادي حد ماباش يحب سيلين...باش يقعدو يخزرولها على جنب ...وتقعد تسمع في الكلام منا ومن غادي لين تعرف حقيقتها ...يا امي موش بالساهل تعرف انك جيت في الحرام ...."
هي تحكي على روحها ...على حقيقتها ...صدمتها وقت عرفت انها متبنية ...ونزهة فهمتها ...ماحبتش تزيد تنزل ع الجرح ...ضمتها ليها وضغطتها لصدرها"اما يا تولين...ماتغلطتش غلطتي ...غدوة سيلين تكبر وتحاسبك خاطر حرمتها من بوها "
صوت بنتها من الجنينة قص عليهم لحظة الام وبنتها "مااااااا"
مسحت دموعها فيسع فيسع وطلت عليها براسها "شبي بنوتي "
شاورتلها لقطوس يدحنس عليها وهي تهرب خايفة منو "قطووووس"
ضحكت نزهة "ها الطفلة تشبهلك ...حتى في القطاطس "
لوت تولين فمها في احتجاج متاع صغار " اما انا نحب القطاطس توا "
ضربتها على خشمها " اما وانت في عمرها ...تخاف منهم "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
