💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌺✴الحلقة 1: القســ4 ــم✴🌺

هذا الرجل ....أبوك 💙💜💚
🎆الحلقة الاولى : القسم 4 🎆

تحركت تولين لوين باش تزيد تعمل تصاور اخري بمودال اخر عطاوهولها وخلات نزهة باهتة وساقيها باش تطيح بيها ، خزرت على اجنابها تتأكد انو بنتها ماهيش اتبع فيها وقت شافت المرا تقرب منها ووجها مقلوب ،وصلت قدامها وهي مصدومة وغالبتها الدهشة وبالسيف ما سألتها " انت نزهة ...موش هكا "

تمنات لو جات ذاكرتها تمحات ، والا تنجم تكذب من غير ما تتكشف،بلعت ريقها وخرج صوت خافت و مبحوح "جناة "

خطفتها جناة من يدها وخرجتها لبرا وهي تكركر فيها لين بعدتها ع الجوجمة و العباد، اختارت كلوار رايض باش تسألها السؤال ايلي خطر لبالها طول وقت شافتها مع تولين " نزهة....قلي ...رد بالك تكذب عليا ...تعرف مليح انو عينيك ووجهك يكشفوك....البنية ايلي كانت معاك ...تو....تولين ...اسمها يظهرلي ...هي نفسها ..."
قصت عليها قبل ماتكمل وهي متغششة " مدام جناة . .يعيشك...ماترجعش للماضي ...ايلي فات فات ...وانت طلبت باش ننساه و نمحيه ...ونعتبرو ماصارش ....احمد ربي انو انا رضيت نحكي معاك ....نرمالمون كنت نتعداك ونعتبرك حد غريب ...في الواقع انت توا وليت حد غريب بالنسبة ليا "
شدتها من ذراعها تستعطف فيها " نزهة ....جاوبني ....راو اذا انت ما قتليش انا انجم نعرف بطريقتي...هاك ترى في الدنيا قداش صغيرة "
كزت سنونها " اسمعني نقلك يا جناة .....رد بالك تنطق بكلمة لبنتي ...ولا تجي على حالها ...والا تقرب منها وتحاول تكون صاحبتها وهاك الفازات ..."

"ياخا ...فاش تحكي ...واعية انت ....علاش تحب تبعدني عليها ....ربي سبحانو بعثها بعد ها السنين و خلق سبة باش نراها ... يا للا باش يختاروها وتكون في الليسة الاولى ايلي باش يختارو منها العارضة الرسمية للماركة....وكل يوم باش نراها ....وانا ها الفم ما نخليهوش مسكر "
"جناة.....رد بالك تدور بيها والا تحكيلها....تنساش ....شكون ايلي باش يتلام...وشكون ايلي باش يتفضح اذا عرفت الحقيقة...لذا من الاحسن تعتبر روحك لا ريتها ولا ريتني ...وانا باش نعمل كيفك...وكان على العرض متاعكم ....انا مستحيل نخلي بنتي فيه مهما يصير "
خلات جناة واقفة مزبهلة و مشات وقبل ما تحل الباب وتدخل عرضتها تولين في الباب تلم في صاكها بزربة وكي راتها تنفست براحة " اوف يا امي ...تي وين مشيت "
استجمعت قوتها الكل "تولين....يستحيل نخليك تكمل في ها الحكاية...."

وساعت عينها"شنوة ....فاش تقصد ...علاش تحكي بالضبط "
"يعني انا مانيش موافقة انك تخدم عارضة في ها الشركة...واضح توا " نبرتها كان فيها بارشا غش وامر
ضحكت من الغلب" بربي ...امي شنوة صارلك....ليوم ....امكانية كبيرة اني نوصل للمرحلة الاخيرة ويختاروني ....جاية توا تقلي قص ....وزيد....علاش بدلت رايك...ماك كنت موافقة وراضية !؟"
"قتلك معادش فمة تصوير وفى ...تخ
تحرك نروحو "
قعدت تبحلق فيها وهي تمشي خارجة ، ماهيش مصدقة ولا منجمة تستوعب قرار امها هذا "أمي ....علاش تعمل هكا "
حقرتها وكملت طريقها " أمي نحكي معاك " قعدت اتبع فيها والاخرى عبارة ماهيش تسمع فاش تقول ، فلت من يدها صاكها بحكم كان محلول وموش مسكر مليح تفلت منو ايلي فيه ،لعنت زهرها الاحرف وهبطت تلم فيهم وهي ساعة ساعة تشوف امها مكملة من غير ما تستناها والا تهبط تلم معاها ،شبيها تتصرف هكا معاها ،لا نهار كانت حجر كيف ما وقتها ، ع العكس في العادة تهبط تمسد على اكتافها وتلمهم هي ،وزيد وعدتها تخليها تحلم واتبع حلمها ...رجعت في كلامها فيسع ...اكيد صارت حاجة من بعدها خلات امها تتصرف هكا ،كملت لمت كل شي و سكرتو ،هزت راسها تشوف فيها لقاتها معادش موجودة اكيد خرجت، خلطت تجري بكل قوتها وطالونها يتقتق في الكلوار ، وقت خطفت الدورة تسطعت وبقوة في واحد طويل وبدنو كيف الحجر يابس خلاها تسيب صاكها واطيحو مرة ثانية ، ماهوش وقتو جملة ، تاففت وهي تحاول تلقى التوازن متاعها ،حطت يدها على جبينها "يا ربي علاه يصير هكا معايا "
بالنسبة ليه جاتو الفازة فجئية ، كان يمشي خطيوة خطيوة طف تسطع فيه وحدة مانجم يرا وجها كان كيف سألها "لاباس ..."