💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

👑الحلقة 12 : القســ1ـم 👑

هذا الرجل ..ابوك💙💚
🎆⭐الحلقة الثانية عشر : القسم 1⭐🎆
💚💙
خزرت لزينب ايلي قاعدة مقابلتها تبسمت وهي تحرك في قهوتها " فرحانة بارشا انو ...نشربو في قهوة هكا ع البحر ...عندنا بارشا على قعدة هكا طا "
ضحكت " ايه ...صحيح " ثبتت فيها " سامحني ...تلهيت شوية الفترة الاخيرة و مانجمتش نلقى  وقت نخرجو فيه كي قبل "
" نعرف وعاذرتك ...اه ...قلي طا علاش حبيت تقابلني "
" بخصوصك انت واحمد "
وساعت عينها " احمد !..."
" ايه ...انا نعرف انك تحبو ...واخر مرة حكيتلي هدرة موش مفهومة تخصو هو و تولين "
مطت شفايفها " ايه ..الظاهر انو احمد مضروب فيها للعنكوش ...بحكم وين تقول اه يجريلها ...اش خلاه قعد معاها في باري و زيد وصلها من بعد لدارها ...وزيد يحري بيها للطبيب وهو هازها بين يديه تقول من دمو ...وهي ...ماقال حد لحد عاد...بربي شكون باش يلقى فرصة كيف هكا ويسيبها ...ماصدقت لربي كيفاش ركحتو ...اه مالا ايلي يقلك ...راجل بوڨوص ولاباس عليه وصغير...وزيد في دومانها ...هو عبارة المفتاح متاعها للبيبان ايلي قدامها "
"انا من رايي ...احمد ...ممكن عجبتو اما موش لدرجة انو ينسى روحو و مايعرفش شنوة يختار ...يعرف مليح انك تحبو و عايلتك وعايلتنا عشرة لسنين ...وعرسكم باش يزيد يقربنا ويقوي شركة بوك وسي الفاضل ...وولدي موش يرضع في صبعو ...يعرف مايصلح بيه...نفحة ولازم تطير "
"ماهيش نفحة طا ...بالحق احمد ...طايح على راسو معاها ...انت ديجا شفتو كيفاش يتعامل معاها وكيفاش يتعامل معايا ..."
"مالا انا ليوم هوني لواه  ....انت واحمد لازم تكون بيناتكم حاجة رسمية ...وهكا هو يمضمض عليها وهي تعرف حدها ...وزيد انا مانيش باش نجددلها الكونترا ...يعني خمسة شهور اخرين و ترجع منين جات ...وتقعد انت واحمد ...اما ...هذا الكل ما انجمش نعملو وحدي لازم انت تعاوني "
"وانا فاش انجم نعاونك "
"ساهلة... تجبد احمد ليك...كمرا ...لازم تتعامل معاه وتخليه ينسى تولين ...وانا باش نكون معاك ونعاونك في كل شي "
"طا....ياخا انت تقول هكا تصبر فيا والا تبرول فيا ...كيفاش باش نعملو حاجة رسمية وهو موش موافق "
"انا وعمك الفاضل ...تو نتصرفو ...المهم ...انت ماتسلمش ...وتحط يدك في يدي ...باش حد ما ياخو احمد منك ومني زادا "
❇✴✴✴
خلت شعرها مبلول باش تبرد بيه الغزول ايلي مازال في داخلها ، كزت سنونها وهي تخزر من البورت فوناتر  ايلي بلارو فيماي " تو نشوفو يا للا نزهة ...شكون باش ينجم يخبي اكثر على صاحبو ...تو تشوف وعلى عينك انا شنوة باش نعمل ...كنت نخمم فيك قبل ما نعمل اي خطوة ...توا باش نخليك تندم ع النهار ايلي قررت تخبي فيه عليا حقيقتي ...باش نبدا بيك انت ...ومن بعد...تو ندورو ...للام ايلي جابت والبو ايلي جاب "
تنهدت بصوت مسموع وحست بصدرها يضيق بارشا ...لدرجة قريب تتخنق بانفاسها ...قامت لبيت نومو باش تلوج حاجة من دبشو تبدل بيها المنشفة ايلي لافة بيها روحها اه مالا باش تقعد اكاكا لين يروح ....