هذا الرجل.... أبوك💙💜💚
🎆الحلقة الخامسة : القسم 1 🎆
*********
قد ماتشوف تصاورو ماتشبعش ، كل مرة تنزل بصوابعها تكبر تصويرة وتثبت في وجهو ...ساعات تنسى روحها وتتلمسو تقول حقيقة قدامها ..فمها كان راسم تبسيمة بالسيف عليها الشي ايلي خلى امها تنطق من جنابها " ايه ..ولوقتاش شتقعد شادة ها التاليفون ...برا حل حاجة اقراها ...عادك بيهم الاكزامانات بداو "
خزرتلها على جنب " عمتلي عقدة بها القرايا ...شنوة نعمل بيها بربي ...نقرى نقرى واخرها نشد سكرتيرة ....يا امي راني توا عمال نطير في السماء...انا العارضة الاولى لزينب بالرجب ...تعرف شمعناها ...!؟...يعني البيبان تحلت في وجهي ..مانيش مهبولة باش نفلت ها الفرصة "
ضربت نزهة الطاولة لين تكب شوية من الروز ايلي تنقي فيه "اسمع نقلك انت ...خليتك اتبع حاجة تحبها ...اما مانيش باش نخليك تسيب قرايتك...والله نقتلك ونعلقك في الباب "
زمت شفايفها موش عاجبها الوضع ،خزرت لامها تتفحص فيها ،هيئة عالمية "بربي امي نحي علينا ها الجبة و المحرمة ...تي محسوب انت و زينب فرد عمر ،شو انت فين وشوف هي فين ...المرا كي تراها تقول اصغر مني "
"انستك بيها للا زينب متاعك ...وانا راضية بمحرمتي وجبتي وياربي ليك الحمد ...صغري وعديتو ...وكل عمر ووقتو "
رعشت صوابعها وقت جاء لبالها سؤال ، خزرت لتولين بنظرة متشككة وفيها بارشا خوف ، تجرأت وسألتها وحاولت تبين اللامبلاة فيها "قلي تولين....وقت مشيت للفيلا متاع المصممة ...لقيت هاك المرا ايلي ريناها مع بعضنا ...تتفكرها ماهو "
عقدت حواجبها "اما مرا !؟...اه....تقصد فيلي اسمها جناة ...اي تعملي الغاز في ركايبي ...ماارمزها وماامسطها قداش تتدخل ...نافشة ريشها تقول هي مولاة المول "
رمشت بخوف " ياخا ...حكات معاك "
"لا نحكي معاها لا تحكي معايا ...شفتها هكا ع الطاير لا كلمتها ولا جيت على حالها "
"ايه...خليك اكاكا ...موش الناس الكل تحكي معاهم وتاثق فيهم "
"امي ...ياخا تعرفها المرا "
طاح قلبها من بلاصتو " ومنين باش نعرفها "
"مانعرفش اما ...وجهك كان مقلوب ومصدومة كي جات العين في العين معاها ...قلت بالكي معرفة قديمة "
"بربي منين باش نعرف خديمة زينب انا ...نمشي نركب عشايا انا ..وقيت "
رجعت تولين تبربش في تاليفونها وكاينو الموضوع مايهمهاش ، خزرت نزهة وراها تثبت فيها ...ياريتك ماتحكيش معاها ولا تسمع كلمة منها يا بنيتي ...ماانجمش نتحمل فراقك ووجيعتك .***"""***
كان وقتها مضبوط ...وتحضيرات العروض الرسمية بدات ..كان لازم عليها وعلى بقية العارضات يكون حاضرين وموجودين ، كان بارشا تعب وبارشا وقت يضيعوه وهوما يبرفو و يحسنو من ارواحهم ...رسميا باش تخرج الكولكسيون متاع ناز ...وكل مصمم باش يوري خدمتو بما فيهم صاحبة الشركة ، وقفت بجنبها جيهان ومدتلها كاتالوج صغير ورقتهولها من بعد خلاتها لاهية فيه وتلهات في حاجة غيرها ،قعدت وهي تشوف في المودالات ...كل وحدة خير من اختها ...هاكي علاه ناز هي الاولى في الموضة ...سمعت ضرب ع البلار خلاها تهز عينيها تشوف شكون ،شهقت من الدهشة وقت شافت احمد واقف وراه ويشاورلها بيدو باش تخرج ، فرفط قلبها من الفرحة لكن ...زادا ضرب من الخوف ...شنوة ردة فعل جيهان والبقية اذا خرجت من غير ماتقلهم ،خزرت وراها تشوفش حد شالق بيها ...مالقاتش حتى واحد ...عاود ضرب ع البلار و شاور بصوابعو باش تجيه ...كان مصر تخرج ...وبصراحة هي بيدها تحب تخرجلو ...هاكي علاه تهورت و مشاتلو ...عرضها في فم الباب من غير مايستنى خذى يدها وكركرها وراه لين بعدو من العينين ، حست وجها احمر طماطم من الانفعال ...يخلي فيها تتصرف تقول قاتلة روح "يا أحمد...تخيل لو جيهان عرفت ...صدقني الا مانطيح في مشكلة كبيرة ماانجمش نحلها "
تبسم خفف عليها " مادام معايا ما ينجم حد يكلمك "
ايه...مادام هي معاك ...مستحيل تعمل عقل كيف الناس ،شافتو يدخل يدو للجيب الدخلاني متاع الفاست متاعو ويمدلها ماصو ابيض ، من الاول تخيلتها فلوس لكن كانت غالطة "شنوة هذا "
"بياي .."
"بياي شنوة !؟ "
عوح فمو " ياخا فهمك قليل والا عاملة فيها بهلولة "
حمارو خدودها من الحشمة وما حكات حتى كلمة ،اضطر يفسرلها " فمة عرض لناز في باريس ....واختارو العارضات ايلي باش يمشو ...وبما انك العارضة الاولى لزينب ...فقراولك حسابك ..."
"والباسبور ...!؟."
"باش يكلموك عليه ...اما انا سبقتهم ...وقتلك "
وساعت عينها وقت بدات تستوعب " يعني انا ....باش نسافر. ..انا باش نمشي نعرض لبرا "
شاورلها براسها ايه وهو فرحان لفرحتها ، كلاتها يديها باش تعنقو وتكبس عليه لكن ...ضغطت على صوابعها باش تمنع روحها ، شاف فرحة عظيمة في عينيها ووجها نور غير العادة ...مااحلاها كي تشوف احلامك تتحقق ...عارف انو عندها رغبة كبيرة باش تعبر على فرحتها ...ومتوقع انها تعنقو ...لكن هي تحكمت في روحها ...بالنسبة ليه ياريتها ماسيطرت ...وبالنسبة ليلي وقفت قريب منهم الحمد الله ما راتهمش معنقين بعضهم . .ريما كانت متعدية بالصدفة ...لكن عينيها خطفتهم وهوما متركنين بعاد على الناس الكل، هذا يعني حاجة وجدها انو ها الزوز على علاقة ومخبينها ....ضغطت على سنونها بغل ...كانت باش تصدم عليهم وتسمعهم الكلام ...هاذي تتسمى خيانة واحمد ماعندوش ااحق ياقف والا يضحك مع وحدة غيرها طالما هو يقلب وجهو وقت تقابلو ...لكن هذاكا موش حل ...تعرف كيفاش تخليه يجيها .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Storie brevi★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
