☔الحلقة 23 : القسـ4ــم☔
💚✳💚
حاول مايبينش غشو ويحكي بالسياسة "ياااا...شنوة صارلك...وينو عقلك...هاذي وانت مراهق ماعملتهاش ...تصدم على المرا في دارها ....لا الحق كل شي نتخيلو منك الا عملة كي هكا "
ماهمهوش كلام ناظم في مخو حاجات اخرى "تولين رجعت "
الجملة سكتت ناظم وخلاتو يقعد.لحظات مثبت فيه من بعد عوج فمو "ايه....توا فهمت....ايلي هديت عليها لدارها ...تولين ...وبما انو راجلها رجع فطبيعي ترجع معاه " نفخ بضيق ، بدات عروق وجهو يتكبسو " ياخا بعقلك...المرا معرسة...وانت خاطب ...ابعد عليا...لواه راجع اتبع فيها وبعد ها السنين !؟ "
غمض عينو ورعش صوتو "عندها بنية ...تمشي وتتكلم ..."
ضحك باستهزاء" طبيعي تجيب صغير ويكون يمشي ويتكلم ...عندها اربعة سنين معرسة توا ..."
كان مركز في نقطة في القاعة من غير مايبعد عينو علينا " الطفلة ....تشبهلي ..."
تجمد ناظم في بلاصتو وماعرفش شنوة يقول ،وقف أحمد وخزرلو"نفس العينين ...نفس الشعر ...نفس الفورمة متاع الوجه....كيف تراها...تراني انا صغير "
حس ريقو حنضل في ڨراجمو "فاش تخرف ...تشبهلك!...لا انت هبلت ...كيفاش تشبهلك وهي بنت راجل اخر...انت راك تتخيل ...ودخلت بعضك...كيف ريتها مرة اخرى "مسد على اكتافو باش يخفف عليه " احمد ...يا خويا العزيز....انت عندك حياتك وهي عندها حياتها وعايلة صغيرة ...شو ...توا عندك خطيبة ،مرا في رقبتك...ماتنساش "
دخل المحامي وخزرلهم الزوز "سي أحمد....نجمنا نريڨلو الاومور ...لكن انت مضطر تصحح التزام باش معادش تتعرض للمدام "
تكلم ناظم في بلاصتو "ايه يصحح...ومستحيل يرجع لهاك البلاصة "
غمض احمد عينو بضيق ...علاش حد ماهو مصدقو ولا فاهمو....الطفلة هاكي بنتو ....الف بالماية ....احساسو قالو هكا
ريڨلو الاومور كيما قال المحامي ،صحح التزام وروح بيه ناظم ...وصلو لدارو واتهنى عليه ..وقبل مايخرج جاء جنبو وقعد"بو حميد....فاهمك....انت حبيتها بارشا ...اما هي خلاتك ومشات...كل ماتحنلها ...تفكر عمايلها...تفكر ايلي هي عرست وسافرت على غفلة منك ...يعيشك...نحيها من بالك ...كيفاش تنجم تقعد تحبها بعد ايلي عملتو..اه قلي ...خانتك...باعتك ...وماخسرتش عليك حتى ابال والا ميساج "
خزرلو بعين باردة " تولين خانتني ...و خبت عليا حقيقة انو عندي بنية كل ها السنين...وانا مانيش باش نسامحها على هذا "
نفخ ناظم بقلة صبر " اوووف احمد ...اووووف...انا وين وانت وين ...قلي كيفاش بنتك ...كيفااااش ..."عقد حواجبو " ياخا ...صارت بيناتكم ...يعني ..."
صاح "ايه....صاااار...صاااار ...واكثر من مرة ...هاكي علاه متأكد انو الطفلة هاكي بنتي ..." شد اكتافو خوه " ناظم ...انت لازم تعاوني ...لازم نثبت ايلي هي بنتي ...لازم نرجعها "
رمش شوافرو " و...كيفاش ...باش تثبت د...!؟"
بلع ريقو " مانعرفش...نطلب تحليل آ دي ان مثلا ..."
ناظم " واذا طلعت موش بنتك ؟! "
احمد "بنتي ...بنتي ...بنتي متأكد ..."
💜✳نهاية الحلقة 23💜✳
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Короткий рассказ★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
