🎭الحلقة الواحدة والعشرون : القســ1ـم🎭
✳🐋✳
ضيقت عينها وخزرت لوجهو ايلي زاد لخلخ ...صفار كي الليمونة ...فمو تحل على كبرو ولسانو تحرك في رغبة ينسج كلمات جديدة ،لكن بكم مرة وحدة ، حتى ساقيه خانتو ومعادش قادرة تهز بدنو المجمد ،طاح ع الكرسي ورشق عينو الباهتة فيها ...سهمها كان ماضي وعرفت وين تضربو ...غرستو في بلاصة صعيب يطببها ...مازال عندها سهم اخر تزيد تضربو بيه ...قلصت اكثر المسافة بيناتهم " شنوة رايك ؟!...تسخايلني ها السنين الكل وانا مانعرفش ؟!...جيتك حبلة وقتلك ولد خوك في كرشي وانت شنوة عملت ؟!..."مالت فوقو " قتلي خويا مات وحد ماباش يصدق انو ولدو...شككت في اصلو ودمو ...وانا صغيرة خفت وصدقتك وتبعتك ...قتلي نبقى معاك نخدمك ونخدم عايلتك وماترضاليش نتهان عند ناس اخرين ...طلعت خايف نبربش ونسأل بعدك على عبد الجليل ...اما لا ...جناة ماهيش سيدي تاتا ...عديتها عليا وانا صغيرة اما وانا بها العمر ماتنجمش "
بصوت مقطع وعينين زايغة " زينب تعرف حقيقتك؟!"
تبسمت "لا ...زينب لا تعرف حقيقتك ولا حقيقتي ...اما قاعدة تبربش ..وموش بعيد تعرف شكونو راجلها وشنوة عمل في صغرو ..."
حل بوتونتو شوميزتو لعل الهواء يزيد يدخل اكثر وينجم يتنفس مليح " انت ونزهة ...متفاهمين مالا...تحبو تسلبو عايلة بن رجب ..." بلع ريقو " وتولين لصقتوها في احمد ...تحبو تضربو عصفورين بحجر واحد..."
قهقهت " نسلبو ؟!....لا سي الفاضل هكا تغلط...بنتي عندها الحق في مال بوها ...واذا خذات حاجة فمن حقها موش مزية ...رغم ايلي هي ما خذات شي وانت واولادك لهفتو كل شي...ماكش باش تصدقني كيف نقلك انو دخولها لناز كان صدفة ...وانها ماتعرفش انو انا امها ...وماتعرفش عبد الجليل بوها ...وماتعرفش انو نزهة ماهيش امها ...وماتعرفش انو احمد ايلي حبتو ولد عمها ...وماتعرفش انها عندها الحق في املاك بالرجب الكل ..."
سؤال واحد عجز يعرف اجابتو " علاش يا جناة ....علاااااااش عملت هكا "
قعدت تخزرلو لثواني ،رجع بيها الوقت للسنين ايلي تعدت ، عبارة تعيش فيهم مرة اخرى ، لمعت الدمعة بين جفونها و رق صوتها ببكاء مكبوت " خاطرها بنتي ...انت زادا بو وتعرف شمعناها يكون عندك صغير ...صحيح من الاول حبيت نتخلى عليها ...نطيح الصغير ونكمل حياتي خفت لا نحل باب البلاء بحبالتي بيها وانا ماكان عندي حد ياقف معايا ويسند ظهري ...قلت مستحيل حد يصدقني ...تعرف شكون وقف معايا ؟!!...اه ...نزهة . .ايه نزهة ..المرا ايلي كانت صاحبتي الروح بالروح وايلي كانت سبب باش عبد الجليل يبعد عليا وهي نفسها المرا ايلي حبيتها انت ...موش هكاااا ؟! ..." جامد ويخزرلها تقول محنط ، كملت حديثها والغصة كبرت في حلقها " تسعة شهور حبالة وهي توكل وتشرب ولاهية بيا ...تسعة شهور وانا كيف الفار مخبية في دارها عبارة عاملة جريمة ...تعرف شمعناها هذا ؟!...تعرف شنوة عانيت انا ؟!...تعرف قداش حسيت بالنقص والمذلة وقتها ؟! ...ماتعرفش ...وماتنجمش تعرف ...خاطر مايحس بالجمرة كان ايلي يعفس عليها ..."سكتت شوية ردت نفسها و بعد رجعت تحكيلو " كيف ولدت خذاتها مني ...متخيل انت شنوة عملت ...نزهة تربي في بنت الراجل ايلي تحبو ...وانا طيشتها ورايا وهربت ...خليت ظنايا عند الناس وهربت ...من كل شي ...خاصة من عيلة بن رجب ...حيت نلوج في خبزة ناكلها انا وبنتي ...قلت نكون طرف فلوس نعمل دار تلمنا الزوز ونعيشو مع بعضنا ...تتفكر ماهو شنوة صار من بعد ...اه ...تتفكر كيفاه جبتني لهوني ؟!...تتفكر والا نفكرك "
صاح بقلة صبر وهو يسكر في وذنيه " يزززززي ...اسكت ...ماتزيدش حتى كلمة "
كملت عبارة ما سمعتوش" لقيتني انظف عند واحد من معارفك...قتلي ايجا نهزك عندي ...مانخليكش تتهان ...جبتني لهوني فيبالي باش تعطيني عيشة ماخير ...زدت هنتني ...خليتني نخدمك انت ومرتك واولادك ...ومخلية بنتي بعيدة عليا...وبدى الخنار يظهر ...وبديت نعرف في حكايات مخبية ...وعرفت انو عبد الجليل عايش ...وعرفت انو اذا سمعت ببنتي ممكن تنفيني وراء الشمس ...اما توا لا....انا وهي باش نحاربو على حقنا ...باش نفكوه ...واذا حد ماصدقني انها تولين بن رجب ...تحليل واحد يسكتكم ..."
خزرتلو من فوق للوطة " اما انجم نعطيك فرصة تصلح كل شي ...نعطيك مهلة صغيرة تخمم في عقل عقلك ...وتحكي لخوك كل شي ...والا ...انا ...نفضح ايلي عملتو انت وعزوز ..."تنهدت بصوت مسموع " من هنا لهاك الوقت ...باش نبقى جناة الخديمة...نستنى في النهار ايلي تقول فيه وبصوت عالي ...هاذي كانت مرت خويا "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Conto★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
