🎍الحلقــــ29ــة "القســـ4ــــم " 🎍
💚✴💚
في الكلوار يزرب قاصد يرجع فيسع للصال داتونت وين خلى تولين وحدها وهي بهاك الحالة خاف تزيد تتأزم وكيف ماتلقى حد معاها تنجم تعمل في روحها سبة ...يا ويحها من راجلها ويا ويحها من بنتها ...المصايب كيف تجي تتغلغل كي المرض ماتخليش بلاصة الا وتعلها ...دوب ماقرب... سمع صوتها وصياحها ...وصلتو شكوتها ...وقف بالوقت واستنى يسمع البقية ...رغم ايلي في عادتو ما يحبش هداري ومشاكل الغير ...لكن ها المرة كلامها شدو ...لزمو ياقف على بلاصتو و يركز في كل حرف تنطقو ...من جاشها ومن اعماق اعماقها نحبت وبكات ...لخصت قصتها في سطور و نقشت بيهم وجيعتها ... ودموعها حطتهم عنوان لمصايبها ...غمض عينو للحظات ...كل كلمة كانت نابعة منو ...كانت تحكي عليه ...كانت تعبر على مكنونو موش مكنونها...لكن مع شوية اختلاف ...اذا احمد ذبحها ...فخوه والظروف هوما ايلي ذبحوه هو ...ايلي نجم يفهمو من حكايتها انو احمد خطف منها شرفها باسم المحبة ...سرق فرحتها وخونها ...وهاكي كانت سبة فراقهم ...لكن فمة حاجات قعدت فلو ومانجمش يفهمها ...فمة نقاط استفهام قعدت ماتحلتش ...زاد ركز اكثر ومد وذنيه في صنعة ماكانش متوقع انو يكسب منها ...وكاينو تولين صندوق يهمو يعرف اش فيه ...
اذا نحبو نعرفو حقيقة والا سر بشر ...يا نخلوه يضحك من قلبو ...يا يبكي من جوارحو ...استناها تزيد تحكي وهي كملت بعد لحظات خذاتهم تطعم في مرارتها " انا ...من غير اركان ولا شي ...انا لولاه هو كنت توا نمسحلكم في ساقيكم ...كنتو ذلتوني اكثر ...لولا اركان سيلين كانت ماتتولدش وماتجيش لها العالم ...مزاياه ماتتعدش ...وماانجمش نرجعها ...دينو كبير..."
مازال تحت صدمتو ولسانو عكش ...اربعة سنين يلوم فيها و معتبرها خاينة واستغلالية ...بقى يحبها ...لكن مانجمش يسامحها ...توا كل شي تقلب ...هو الجاني ...وهي الضحية...هو ايلي قطع حبل الود بيدو ...هو ايلي كسر الثقة و ضيع فرحتهم ...لو وقف دقيقة وحدة وقتها وسمعها ...ماكانش صار ايلي صار ...لو عطاها فرصة وخلاها تبررلو ...ماكانش خسرها ولا عاشت بنتو بعيد...كان هو الاولى باش يسمع منها كلمة بابا موش اركان ..
شوفتو وهو مهدود وتايه شفى غليلها شوية ،ممكن فاق ورجعلو شاهد العقل ...اما روتااار وبارشا ...يمكن عرف غلطو ...لكن شنوة نفعو وقلبها تولد من جديد باسم حد غيرو ....رجعت شعرها لتالي ولعقت شفايفها " كنت عايرتني بشرفي ايلي خذيتو ...شرفي ايلي في لحظة متاع صغر وسهو عطيتهولك ...لكن وقتها وفي جنونك يا شيطان عاقبتني بيه ...عاقبتني من غير ما نرتكب حتى جريمة ..." مالت فوقو وخرجت حروفها مقطعة كيف عروق قلبها " انت ...اغتصبتني ...يا حيوااااان "
وساعت عين عبد الجليل من الصدمة ...كان متخيل انو هاك الزوز بقلة خبرتهم و طيش صغرهم جمعو بين الحب والحرام وخلطو بيناتهم...لكن ماصدقش انو احمد توصل بيه الدنائة يغتصب المرا ايلي يحبها ...اذا هو وبعظمة محبتو مانجمش يتجرأ ويشد يد المرا ايلي عشقها ...كيفاش ولد خوه يتعدى حدودو ويعمل جريمة كي هاكي مع بنية دافية كيف تولين !!
كانت عندها بارشا حديث وبارشا لوم ...نود دوسيات من اغلاطو ...بالعمل مانجمتش تستحضرهم الكل ...تنهدت بصوت مسموع وهبطت راسها " لو جيت تعرف اصلي وفصلي ...كنت زعمة تعمل عملتك هاكي ....لو كنت تعرف انو عندي بو نتكى عليه والا خو واقف في ظهري ...كنت توصل حتى تمس شعرة من شعري " ضحكت بمرارة " ماكنتش بالطبيعة...انا حكيتلك وبكيتلك وصارحتك ...حقيقة اني متبنية ...وجيت في قالب غلطة بين زوز ...وانت....خليتني نعيش ماضيا وحقيقتي بالتجراب ..."
عبد الجليل ...الحكاية زادتو صدمة جديدة...وموش عارف قداش مازالو صدمات ...تخلطت عليه ومعادش عارف عقلو منين يبدى...لكن ها المرة الحقيقة كانت حنضل...تولين ...بنية متبنية....يعني بالمختصر ...ماهيش بنت المرا ايلي حبها ...مالا بنت شكون ؟!....قالت جات في قالب غلطة ...زعمة نزهة طرف في ها الغلطة ؟!
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Conto★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
