🌼الحلقــــ34ــة"القســ2ـــم 🌼
✴⛅✴
كيف ماقتلو وسطرتلو بالضبط ...فطر كيف ماحبت هي...خذى دواه كامل ومافلت حتى حربوشة كيف ماقالت هي ...وبعدها متنتلو اكتافو بغطاء صغير قطن وخرجتو للجنينة ...ركحتلو كروستو في بلاصة دافية مقابلة الشمس و مدت ساقيها بجنبو ع الڨازون ....ربيع ساعة وجاتهم سيلين تنڨز ...الفم يضحك وفرحانة عبارة ماصار شي ...خافت منو كيف ضرب الطاولة ...اما فهمية طمنتها وفيسع ما نظفتلها مخها وبتوصيات نزهة جرات للجنينة وين كانت تولين واركان قاعدين ...باست امها من خد و خطفت من خدو بوسة و كملت تجري كي الفرططو قدامهم ...ماحبش يخزرلها وهبط راسو ...صوت ضحكاتها و دوراتها و لعبها كانو يضغطو على ضلوعو ويقطعو النفس متاعو ...موش بمعنى مايحبهاش فرحانة ...انما بعجز يقوم ويتحرك معاها وكيفها ...
تمدت تولين على ظهرها وحلت يديها وهي تخزر للسماء" ياخا السماء الحلوة والا انا نرى فيها حلوة "
مانجمش يفلت فرصة كيف هكا ويكلاشيها " عينك الحولة رجعت لبلاصتها هاذيكا هي ااحكاية "
ضيقت عينها وتلفتتلو " الساعة يقولو احلى مافيا عينيا...وانت شقولك ؟! "
ضحك بمسخرة يحاول يغطي صدق ايلي قالتو "يكذبو عليك ...غلطوك في روحك "
ضحكت بصوت حير محاينو و رجفت صوابع يدو معاه " تقول هكا خاطر قلبك واجعك ...خاطر مرا مزيانة كيفي انا رئيسة مديرة عامة وانت بطال " ضحكت بتشيطين وهي تغزل فيه بحواجبها
مانجمش مايضحكش على بلادتها " وانت بي دي جي موش خدام مخلية ناز و جاية لاصقة فيا كي الوشقة "
لوات فمها " امممم...موش انت رااااجلي ...وانا بلاصتي حذا رااااجلي ...مانحبش نخلي راااا...."
بما انها رجعتلو لبلادة لبارح فمضطر يقص عليها " ارتااااح ...ارتااااح ...راسي مكسر بطبيعتو موش لازم تغنيلي غناية راااجلي "
"وعلااش يا ...راجلي "
ضربها على راسها بكفو "خاطر خارجة من فمك كيف البصل "
صححتلو "قصدك كي العسل كيفي "
لوى فمو " عسل مغشوش "
قرصت خدو عقاب على كلامو وقصدت تشد شعرات لحيتو بين صوابعها بشماته ، تبسمت بخباثة وقبل ما تجبد موضوع اخر تترومز بيه عليه صونى تاليفونها ، كيف خزرت للايكرون لقاتو نومرو موش مسجل عندها ،استغربت ومالقات حد يجي لبالها وقتها ،هزت عليه " الو وي ...تفضل "
جاها صوت مرا " ألو تولين معايا ؟! "
جاوبت بشك" ايه ...تفضل "
" انا جناة...نستناك في القهوة ايلي تقابلنا فيها قبل ...من اربعة سنين كان تتفكر ..سويعة اخرى اكاكا"
✴🌿✴
هوما كلمتين وبعدهم علقت ...بقات تولين تبحلق في التاليفون باهتة ...جناة الخديمة متاع الفاضل ؟!..شنوة مصلحتها بيها ؟! زعمة هاذي لعبة جديدة من الفاضل و ولدو ؟! ...تنهدت وهي تاقف على ساقيها ...مهما يكون ومهما يصير هي خذات قرار معادش ترجع فيه ...تواجه عايلة بن رجب من غير خوف وماتهربش ...خزرت لاركان لقاتو بدورو يثبت فيها بعين تسأل فيها شفمة ...مسحت على شعرو بتزعبين " ماك تحب البي دي جي يخدم على روحو ويملى بلاصتو " غمزتو " ايا شوف مالا شباش يعمل "
تلفتت لسيلين " ماااماتو...هاك حذا بابا العب ورد بالك لا تطيح "
هزت سيلين راسها دوب ما خزرتلها ورجعت للعب متاعها ،قبل ماتمشي فرفشت شعر اركان قاصدة تتبولد عليه ... تبعها وهي تبعد وعلى اول ما غابت عليه ومعادش بنجم يشوفها ، جبد تاليفونو وطلب نومرو حافظو مليح" آلو ...عينك ما تتنحاش من على تولين ،خليك كيف ظلها ..."
✴✴🌿✴✴
تمايلت ريما وهي تمشي في الكلوار بنفس الخطوات ايلي كانت تتصور انها بيهم تنجم تخطف قلب اي راجل ،دوب ما وصلت للبيرو المطلوب دزت الباب ودخلت من غير حتى ما تدقو ...هز أحمد راسو يشوف شكون هالي داخل فرندسي ،نفخ موش عاجبو كيف لقاها ريما " تعلم دق البيبان يالا "
تبسمت وهي تحط يديها على بيروه وتميل ناحيتو " ندقو باب البراني اما ايلي منا فينا فنعملو ايلي عملتو انا توا بالضبط"
رجع لاوراقو يتفقد فيهم " ناز معادش متاعك ...حط ها الشي في راسك وماتنساهوش"
ضحكت " مالا متاع شكون ...الاكس متاعك ؟!/"
هز عينو فيها وصححلها " لا ...متاع ام بنتي "
كشبرت وتقلب وجهها " بنتك ؟!...عندك مايثبت! "
حط يدو على صدرو " عندي "
زمت شفايفها وهي تقعد على حافة البيرو " ونفرضو مثلا ...انها بنتك ...وطلعت بالحق بنتك ...شنوة باش تعمل ؟!...باش تعمل تصريح للصحافة وتقول هاذي بنتي جبتها في الحرام من مرت الرئيس المدير العام ...." تبسمت بشر" وقتها ...ناز ...معادش تقيملها قايمة بعد ها الفضيحة "
قعد يخزرلها من غير ما ينطق بحرف وهي لقاتها فرصة باش تزيدو " موش هذا برك....تولين ماهيش مجرد عارضة دخلت صدفة في حياتك...تولين لعبت لعبة معاك ...وحصلتك ...وموش غريب بنتها زادا لعبة "
ضيق عينو " شنوة تحب تقول بها الكلام "
ضحكت على جنب " نحب نقول بارشا كلام ...اما موش في بيروك ...اعطيني سويعتين من وقتك وخلينا نخرجو ...اسمعني للاخير وبعدها احكم "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
القصة القصيرة★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
