💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 7 : القسـ1ــم 💚

هذا الرجل ....أبيك 💙💚
🎆الحلقة السابعة : القسم 1 🎆

***************
قاعة اكبر ببارشا ملي شافتهم قبل ، مام حتى اللوج كان كبير ومنظم وماينقصو شي ...ناس همها الوحيد هي الموضة والازياء وكيفاش باش يتعدى العرض...غير هذا ماعندهمش حتى اهتمام اخر ...عكس ايلي حاضرين وقاعدين ع الكراسي ،صحيح عندهم فضول يتفرجو ويكتشفو كولكسيونات المصممين المشهورين ربما تعجبهم حاجة والا ياخذو فكرة ،فمة مصممين و اولاد الدومان ...صحافة ...رجال اعمال كضيوف وكمستكشفين ...ممثلين...سبنسورات ...ضيوف منا ومن غادي ...الحاصل على كل لون يا كريمة .
في الصف الثاني ،اختار اركان يقعد وبجنبو اختو وفاء ...في الواقع كان فادد وكاره روحو ع الاخير ..جاي بالسيف عليه لو موش هي شدت فيه وقعدت تڨنڨن شهر كامل ،في وحدها ،في ماذبيها تحضر لايفانمون كبير ،في فرصتها باش تجرب حاجة سبسيال ...لقى روحو يحضر معاها كضيف فوق من قلبو ، كلم شكون يقرالو حسابو في العرض و زيد في الصفوف القدامية ...يتفكر كيفاس وفاء مالقات كيفاش تقنعو ولت تغري فيه بفكرة العارضات والزين متاعهم وستيلهم ...مسكينة نسات انو خوها باشارة من صبعو قادر يجيب اي مودال ومهما وصلت شهرتها بسهولة لفرشو ...بحذاه قعدو زوز رجال مايعرفهمش شكون لكن من لبستهم وبرفانتهم ايلي يفهم فيها مليح وايلي تتكمندا كان بالاسامي عرف انهم واصلين وموش اي حد ...وقدامو بالضبط ...قعد احمد و معاه مسؤول من ناز ...العرض الاول كان لمصمم الماني ومن بعدو ايطالي ...صفقو الحاضرين وحكاو اهل الاختصاص بين ايلي يذم وبين ايلي يشكر ...فد رمزي ع الاخير ...بصراحة مافماش حاجة تجذب في ها العالم ...كان عيدان قصب تمشي على مسمار تحت ضوء...بالنسبة ليه حاجة ماتستاهلش ها الهيلمان والاهتمام هذا الكل ،خزر لمنڨالتو بقلة صبر ...وقتاش توفى ها الوحلة .
*****"
فركت ريما صوابعها لين قريب يخرج منهم الدم ...مكنها الغزول وبان على وجها غشها ...كل شي تخيلتو الا تولين تعمل العرض وكاينو ماعندها شي ...ولا تمشي نرمال وكاينو موش هي ايلي طاحت لبارح وتخلعت ركبتها ...وغير هذا الكل هكا هكا بيها خاصة زينب ماشية جاية عليها ...حتى من الماء تجيبلها فيها وتخدم فيها تقول هي مولات المول ...والادهى والامر انو احمد جاء تفقدها مرتين ...وفي المرتين كانت تتضيحكلو وهو في عالم اخر معاها... شمعناها ؟!...ايلي عملتو باش تبعدها وترتاح منها ...ولى سبب باش تزيد تقرب منو !؟
فيقتها جيهان " يلا ريما ...انتوما الجايين...حضرو رواحكم ...يلا اقفو في الصف ايلي تفاهمنا عليه ...نسرين ريڨل شعرك من تالي علاش اكاكا ...صفاء...ياخا الا مانعاودلك ...الفونت لازم تبان ...هي زينة الروبة هاكي ...وماتحلش ساقيك اكثر من اللازم...نرمال ...يعيشكم ...من غير اغلاط عاد "
وشوشت زينب لتولين " مثبتة تنجم "
ضحكتلها " بالطبيعة "
******
مالت وفاء ناحية خوها " ايلي بعد توانسة ...ركز ...معاهم زينب بالرجب ...امان نحب ناخو وحدة من ايلي باش تعرضهم "
تبسم بغلب ،كل مرة طالعتلو بسبة ، هز حاجب بحاجب وهو يحاول يركز "خنشوفو اولاد البلاد اش باش يعملو "
بداو عارضات ناز يمشاو ويورو في خدمة المصممين ...موزيكا كانت دوس مريميكسة شوية عطات نسق قوي للعرض ...ضوء كان مخلط بين الابيض والازرق ...تململ احمد وهو يستنى فيها تبان ...علاش كل ها الوقت باش تظهر ...غمض أركان عينو متمني توفى ها الحكايات ياسر قلق ،غلطة وماعادش يعاودها ويحضر .
ركبتها تسطر وجيعة ،للحظة حست انها ماهيش تابعة بدنها وموش باش تطواعها في المشي ، مخدرة ورزينة وممكن تعمل كارثة وسط الحاضرين ...اما لا ...احلامها ...تعبها. ..الحاجة ايلي عطاتها من روحها ووقتها ...مالازمش تاقف فم....شاورتلها زينب براسها باش تدخل ...حست بوجيعة في معدتها تهبط لكرشها وبفشلة في بدنها كامل ...وفي هاك اللحظة جات قدام عينها تصويرة نزهة ،رمشت عينها بخوف ، عقدت زينب حواجبها كيف راتها مازالت على بلاصتها "تولين !؟ " خزرتلها مفجوعة ومن بعد فهمت انها في عالم اخر ....ونزهة بعيدة عليها بارشا ...هزت راسها لفوق وخلقت تبسيمة على وجها ومشات خطوات ...بهرها الضو ...ورات بارشا وجوه فيهم ايلي نجمت تراه ع الضو وفيهم ايلي مخبي بالظلام قعد كان خيال ، لكزت وفاء خوها وكلمتو في وذنو " هاذي مودال زينب ...نتبع فيها ع الانستا "
حل عينو بضيق وخزر قدامو ....وساعت عينو وجمدت اطرافو وقت شافها تتحرك ويتحرك معاها بدنها ...قمة الانوثة والرقة ...روب طويلة سيران في الموف الغامق ، يتقاطع فيها الدنتال على جنابها وظهرها ويكشف رقبتها ،مع الضو الابيض ومكياجها الغامق خاصة ايلي في فمها...كانت حاجة تفرض روحها...الروبة كانت منها وفيها ...كايني اازوز تخلقو مع بعضهم ما ينفصلوش ...شاف فيها طابلو مزيان ....مشهد من فيلم تكون فيه البطلة مرا جبارة منتقمة ...كل خطوة ...كل حركة... كل دورة ...كل خزرة ...كل بلاصة من بدنها فلاها فليان ....معجزة ....وصارت ....المرا ايلي واقفة بهاك الروب الفيولاي ....خلات أركان يركز بكل حواسو وينسى العالم في حضورها .