🌼الحلقــ34ـة " القســ4ـم "🌼
✴🌿✴
خذات نفس طويييل وفركت كفوفها بتوتر وهي تشوف في تولين جاية ناحيتها وقاصدة طاولتها ...فرفط قلبها و جانب الامومة ايلي فيها لقاتو يحن لتعنيقة من عندها ولحضن تطفي بيه نار الندم ايلي نخر داخلها ...حركت رموشها لعل تشيح الدموع ايلي ملات عينها في وقت موش وقتو وتصنعت تبسيمة صفراء استقبلتها بيها ...مدتلها كفها تسلم لكن تولين تجاهلتها وطول قعدت ...حطت ساق على ساق وڨحرتلها بكل محقرانية" تفضل ...شنوة حاجتها خديمة الفاضل بمرت اركان سويدي "
بعمرها ماغاضتها ولا وجعتها كلمة خديمة قد المرة هاكي....لا نهار حست بصغرها وقلة قيمتها قد هاك المرة ...مستحيل تكون تجرحت جرح قد الجرح ايلي حلتو فيها بنتها ايلي من صلبها وهي تقلها " خديمة " قاصدة تهينها ...استحقت لحظات باش تسيطر على ضعفها وماتبينوش خصوصي قدامها ...بعدها دخلت يدها لصاكها وجبدت هاك الاوراق ايلي يوزنو ذهب صافي ويمكن اغلى ...حطتهم قدام تولين
""هذا علاش طلبتك خديمة الفاضل يا ...مرت اركان سويدي "قصدت تنزل على كل حرف لعل توصللها انها هي زادا تعرف قيمتها و بلاصتها.
خزرت تولين بشك للاوراق " شنوما هاذم؟!..."
لعقت جناة شفايفها "لوجت في دار الفاضل ولقيتهم ...يعاونوك باش تلقى حقك ...و حق راجلك ...وحق بنتك "
وساعت عينها بخوف "ماتقليش سرقتهم؟!...وشنوة ها الاوراق ؟! و شنوة كان في مخك وقت هزيتهم وقررت تمدهملي ...تخافش من للفاضل ؟!..تخافش تباسي..."
تنهدت جناة " ماعندي ما يباسيني ...و الناس ايلي كيف عزوز والفاضل ...تكون ديما عندهم دوسيات كحلة على جنب ...اما شادينها سيف على رقبة حد...والا مخبينها لا حد يشدها سيف على رقابيهم ..وها الاوراق ...سيف ماضي ينجم يطيرلهم روسهم اذا كشفتهم... "
دخلت تولين بعضها ومعادش منجمة تسيطر على اعصابها ورعشة يدها "وعلاش جبتهملي انا بالذات "
جاوبت بكل صراحة "باش تاخو حقك منهم ..."
دزت تولين الاواق ناحيتها في رفض انها تاخوهم " ماحاجتيش باوراق مسروقة باش ناخو حقي ...عندي الف طريقة وطريقة "
تبسمت جناة ببرودة اعصاب "ماتنجمش...اذا ماكانوش في يدك أمثال ها الاوراق...ماتنجمش تحاربهم و باش تخسر...وخسارتك ها المرة تكون كبيرة "
رعشت شفايفها وهي تسأل "و .... شنوة.... ها الاوراق ؟! "
صارحتها جناة " ليست نوار...بمعنى ...أسامي اليدين المسخة ايلي يستعملوها الفاضل وعزوز في ترافيكهم..." نقرت بصبعها ع الاوراق " اذا لوجت فيهم مليح...تلقى اسم الناس ايلي خطفت بنتك ..."
خذات الازراق بلهفة وبدات تقلب فيهم "مثبتة ؟! " خزرتلها بشك " هاذي ماهيش لعبة منك ومن الفاضل موش هكا ؟!"
سكرت جناة صاكها وقامت من كرسبها" اسأل أمك اذا انا نلعب مع الفاضل والا ضدو؟! "
تفكرت انها عندها سؤال محيرها ومالقاتلوش جواب طول هاك السنين وموش باش تلقى فرصة كيف هاكي مرة اخرى هاكي علاه زربت سألتها قبل ماتمشي "انت وامي ...شنوة ااحكاية ايلي بيناتكم ..فمة ماضي قديم يجمعكم ؟!.."
لبست ليناتها وتبسمتلها " ...زيد ...اسأل ...امك نزهة تو تجاوبك "
تعدت من جنبها خارجة ،بالنسبة ليها حكات ايلي جات على خاطرو ...ووفى ...اما تولين ...فمازالت ترعش وقلبها يخض بخوف وهي تخزر للاوراق ايلي بين يديها...شنوة باش تعمل بيهم توا ؟!...وعلاش جناة قلبت الفيستة وحبت تعاونها ؟!
🌼✴🌿نهاية الحلقــــ34ــة 🌿✴🌼
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Storie brevi★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
