هذا الرجل ...ابوك 💚💙
🎆الحلقة الحادية عشر : القسم 1 🎆
💙💚
إحساسها ايلي يقولها انو فمة حاجة خايبة باش تصير كان قوي بارشا وقتها ، بلعت ريقها بصعوبة وعينيها مرشوقة في بنتها ، شنوة ايلي باش تقولو ، خزرت لامها ولملامحها ....انت لازم تواجه ...فازي ....خرج ايلي في قلبك الكل "باش نسألك سؤال ....واحد وتجاوبني بلا ما تخبي ...جاوووبني ...تفهم فيا ؟! تجاوبني "
دق قلبها بخوف " شنوة ها الحالة متاعك هاذي !؟ وعلى ....شنوة تحب تسألني !؟/"
"انت وجنات منين تعرفو بعضكم؟ "
وساعت عينها و رعشت شفايفها مع بقية بدنها ،حطت يدها ع الحيط "ج...جنات ...وانا ...ما..."
"رد بالك....تقلي مانعرفهاش ...لانو هي ...قالت بعظمة لسانها انها تعرفك ومليح ...وانت كذبت عليا وقتلي مانعرفهاش....علاش مخبية عليا ..."
بلعت ريقها و حاولت تهديها " تولين ماما ..."
نطرتلها يدها وقت حاولت تشدها " شنوة مخبية اخر ....قلي ...فماش حاجة مخبيتها عليا ....خمم مليح....شنوة الحاجة ايلي انا مانعرفهاش ....ولازم نعرفها "
حست بشياح كبير في ڨرجومتها ، ياخوفها اذا جنات حكاتلها كل شي "تولين جنات اش قتلك ....باش عبتلك راسك "
"قتلي باش اه...."
جبدت الورقة المطوية وحلتها في وجها " مثلا بحكم بالتبني هذا ؟! "
شهقت نزهة برعب وماعرفتش شنوة تقول "قلي امي ...علاه خبيت عليا ..." ضحكت بهستيريا " ومازلت نقلها امي ...شكون انت ...وانا شكوني ....انا شكووووون ....كلمني. ..قلي جاوبني تقعدش تبكي ...حياتك الكل وانت تبكي ...يزي واقف قدامي وقول في وجهي ....قلي على بابا وامي ايلي جابوني ...ومنين جبتني ...علاش خبيت عليا حاجة كي هكا ؟!....وقتاش كنت باش تقلي ...الى متى كنت مخممة تخليني غافلة "
ترجتها " بنتي ....تولين ...اسمعني "
"جااااوبني "
"انا عملت هذا الكل على خاطرك "
"شكون بابا وشكون امي ....و جنات تعرفهم !؟ "
"يعيش بنتي ...اهدى وانا تو نحكيلك كل شي "
رعش صوتها " امي ....تخلقت نقلك امي ....نهرب من الدنيا ونجيك ....نبكي عندك ...نضحك معاك...نخاف من غشك عليا ....واذا يقولولي شبيك نقلهم كلو الا امي ....نخمم في اي حاجة قبل مانعملها لانو امي ماتحبش ...طلعت ماكش امي ....طلعت في منامة ومايجمعني معاك حتى قطرة دم ...وفقت نلقى روحي بلا بو وبلا ام ....طلعت متبنية وانت مخبية عليا .... " طيشت عليا الورقة "عمري طلع خسارة في خسارة "
"انت ...لازم تسمعني ...انا خبيت عليك لانو ....مافماش فايدة من الحقيقة ...انت بنتي انا ...قطعة من روحي ...هاذي هي الحقيقة الوحيدة ...شنوة باش تربح اذا عرفت انك متبنية وموش من صلبي !؟...شي ..يعني ...فاش قام نبربشو في الماضي "
"عيشتني في كذبة سنين طوال ..وباقي تتفلسف و تخمم انو انا بنتك....انا مانيش بنتك...علاش تهرب من الحقيقة... انا مانيش بنتك ...بنت ناس اخرين ..."
وقفتها وقت راتها خارجة " وين ماشية !؟..ماتخرجش وانت هكا !؟ "
خزرتلها على جنب " نلوج على اصلي وفصلي "
ماكانتش منجمة تخلط وراها ، تكبلت يديها وساقيها ...حتى من لسانها عكش باش تعيطلها وتمنعها تمشي في هاك الوقت والدنيا ظلمت مانجمتش...تكت راسها ع الحيط و قعدت تبكي ...حرب متاع سنين ...طلع فيها خاسرة...شنوة مستنية منها ....تسامحها وتعنقها وتقلي امي ....لا ...معادش تفرح بهاك كلمة ...موش هي ايلي مربيتها !...مالا تعرف مليح انو تولين ماتسامحهاش على شي كيف هكاكا .
خرجت وماتعرفش لوين....ماشية ...وين توصل توصل ...حركة الشارع مازالت حية والعباد مازالت ماشية جاية ...لكن هي موش معاهم ولا على بالها بيهم ....لشكون باش تمشي ...لشكون باش تحكي وتبكي ....ماعندها حد...هوني جاء كلام احمد "مهما يصير معاك ومهما يكون ...تلقاني واقف معاك ومانخليكش " لكن ياخوفي بعد ها الحقيقة مازلت تخزرلي حتى ..لكن انا شنوة ذنبي ...شنوة ايلي عملتو ...علاش انا نتحاسب موش ايلي جابوني لها الدنيا ...اه ...شنوة معملة تعمل مالا ...تقعد تدور في الشوارع ...من سابع مستحيل ترجع للدار ...ما تطيقش ثانية اخرى فم...ع الاقل في الوقت الحالي ...شافت مرا متعدية ...خطر لبالها تطلب منها تاليفونها بحكم نسات متاعها في الدار "سامحني ...انجم نستعمل تاليفونك...عندي حد لازم نكلمو "
"ايه بنتي بالطبيعة "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
