الحلقـــ36ـة القسـ4ـــم
💠✴✴💠
معادش للسكوت مكان ...ولا ضرورة ...اذا هبت ريح تعصف على كل شي وماتخيرش بين ايلي يعرضها ...وطالما السر تكشف ...فهو ايلي باش يكشف البقية موش حد آخر ...هو ايلي باش يطفي الجمرة ايلي قعدت شاعلة لسنين ...شاورلو براسو للكرسي بجنبو "اقعد"
تنفض عبد الجليل بكل عصب " احكي مايهمكش فيا قاعد والا واقف "
خذى اركان هواء مالي رواريه نظم بيه انفاسو وبدا يحكي بنبرة هادية وموزونة " موش صحيح انا عملت كل شي بخطط مدروسة كيف ماقلت ...وماعندي حتى نية خايبة وقت دخلت في حياتك ودخلتك في حياتي وفي عايلتي غير اني نقرب بينك وبين تولين ...الحكاية بدات من بنتك ايلي ماكنتش نعرف انها من دم بن الرجب ...شفتها في باريس في عرض من العروض ...عجبتني ...و تمنيتها تكون ليا ...لكن وقتها كانت تحب أحمد ولد خوك وروحها فيه ...ماحبيتش ندخل بيناتهم وجبدت روحي.... اما...هو...طلع ساقط معاها ...وعايلتو عملت المستحيل باش تبعدهم ...حسب رايهم هي ماتليقش بيهم وماتناسبش ولدهم ...عذبو تولين وعملو فيها ... لقات روحها حبلة وبلا صداق ... قدام الدين ايلي على رقبتي ومحبتي ليها ...سترتها ...ومن وقتها بدات الحرب ... الحكاية ومافيها ...عرفت انها متبنية تبعتها وسألت عليها ووصلت انها بنتك انت و جناة ...الناس الكل متصورينها بنية جات في الحرام ...وانا عملت كل شي باش نكشف حقيقتها..."
زم شفايفو وسكت لثواني قبل ما يكمل "جناة ماعرفت روحها انها حبلة الا بعد طلاقكم...وقبل ماتفهم روحها وتقرر شنوة لازم تعمل ...صار الاكسيدون ...ومشى في بالها انك متت ..مالقات حتى حل غير انها تقصد الفاضل خوك وتحكيلو ...لكن الفاضل ..."
نجم يتصور ردة فعل خوه وقسوتو هاكي علاه ماحبش يزيد يسمعو ويزيد يتوجع " ماتكملش "
لكن اركان عبارة ما سمعهوش " الفاضل شك انو ايلي في كرشها موش منك..."
مابقاتش عندو قوة في ساقيه تنجم تخليه واقف، هجم بكلو فرد المرة و جاء قاعد لوطة ، كمل اركان حديثو
" وجناة كانت طفلة صغيرة ...وحدها ...وماعندهاش حد ياقف معاها...عملت كل شي باش خوك يصدقها ويقبلها...وهو خوفها وخلاها تشك حتى في روحها ...قال ايلي حد ماهو باش يصدق انها بنتك...ولا من عايلة بالرجب ...موش بالساهل وقتها باش تثبتلو ...وهو نصحها انها تطيح ....."
ضرب عبد الجليل اجناب راسو بهستيريا " يزي ماتكملش "
كمل اركان لكن نبرتو ها المرة كان فيها نوع من الصياح "لكن جناة ماهانش عليها صغيرها خلتها لين تولدت و خممت تحطها في القرية لين تلقى خدمة و دار يسهللها انها تربيها ...نزهة كيف سمعت بالحكاية منعتها من انها تسلم فيها ...اقترحت عليها تخليها عندها هي لين تلقى جناة خدمة...لكن جناة اول مالقات الخدمة نسات بنتها ...تجبرت تنساها ...خاطرها وقتها عرفت انو ...الفاضل وعزوز هوما ايلي تسببو في الاكسيدون ....هوما ايلي دفعو الفلوس لمولى الكاميون باش يضرب الكرهبة ويكبها في الهفهوف ..."
حل فمو طالب هواء جديد لانو ايلي في صدرو وفى ومعادش قادر يتنفس والكلام ايلي يسمع فيه سكاكن تذبح فيه "يزي يا اركان ...يزي يعيشك ..."
ماحبش أركان يقص حديثو خصوصي انو قريب يوصل لاخرو "جناة من خوفها على روحها وعلى بنتها ...كذبت على الفاضل وقتلو ايلي طيحتها ...ومافاقت انك عايش الا بعد مافات الفوت "
لم ساقيه لصدرو وحط فوقهم راسو وهو ينوح كيف الصغير " مانيش ضحية خويا كيف ما قلت ...بعمري ماكنت الضحية ..." ضرب راسو على ركايبو " انا الجاااني....جنيت عليهم الكل بهروبي ...و بانانيتي ..."
رغم ايلي قلبو كان دم وهو يشوف في حالة عبد الجليل ...لكن مانجمش يسكت على اخر سر " مازالت حاجة اخرى ماقتهالكش ...جناة ...في السنين ايلي تعدو الكل ...كانت عايشة في دار الفاضل ..."
هز راسو وخزرلو بعين باكية ...عين تترجى فيه يقول كلمة خير ...يعطيه امل انو الفاضل ...فاق على غلطو ...وخلى جناة معاه في دارو وماخلهاش تضيع ...ما نجمش اركان يواجه هاك الخزرات وهرب بعينو بعيد و خرج اخر كرطوشة "...لكن ...كخديمة"
وساعت عينو بصدمة " جناة...مرتي انا....خديمة ...الفاضل الكلب ...ولسنين "
🔥🔥🌿نهاية الحلقــ36ــة 🌿🔥🔥
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
