🍓الحلقـــ38ــة القســ3ــم 🍓
✴🌹🌹✴
تربثو الاعضاء و خزرو لبعضهم...اذا اركان وعبد الجليل سحبو الاسهم ...فمعناها ناز تبرك ومن نهارها تتبخر ...تبسم أركان وهو يشوف في وجه الفاضل يشحب ويصفار كيف الميت ...قبل مايهضم ايلي شافو وايلي سمعو ...تحل الباب ..وزادتو الصدمة الثالثة كمل على مرمتو ...وقف احمد وناظم من بلايصهم موش مصدقين وهوما يشوفو في امهم واقفة ووراها عبد الجليل ...من البهتة بكشو وقعدت كان عينيهم محلولة على وسعها ...اما بالنسبة لزينب فدخلت بكل اريحية ووقفت مقابلة الفاضل ...تنطرت ريما جات واقفة وماتعرفش على روحها كيفاش تكلمت " زينب...قصدي ...طا زينب...!؟ "
من غير ماتهز عينيها على راجلها جاوبتها " ايه...زينب...ومن غير ما تعملي قدر زايف يا بنت عزوز ..."نارها شاعلة ومانجمتش تطفى ، رحت سنونها بغل وهي تقصد في الفاضل بكلامها " شنوة...مصدوم...كنت متخيلني شنعدي بقية عمري في الحبس..."
احمد ايلي من اول ما دخل ماحلش فمو نطق وهو يحط يدو على كتفها " امي ...كيفاش خرجت؟! "
نطرت يدو من غير ماتخزرلو وقعدت راشقة عينيها في الفاضل " خرجت خاطر ايلي قتل وايلي خطف...مانيش انا ...و ظهرت بريئة "
وقفت تولين من بلاصتها وواجهتها " مالا شكون ايلي خطف بنتي اذا موش انت ؟! هاذي لعبة جديدة منك "
شاورت زينب بصبعها لبو ريما من غير ماتتردد " اهوااا...سي عزوز...خطف بنتك ...باش ماتكونش عايق قدام عرس بنتو بولدي "
حلت ريما فمها وخزرت لبوها بصدمة"لا ...مانصدقش "
ركزت تولين ع الطاولة بذراعاتها تالمون ساقيها رجفت وكملت زينب عرضها ايلي حطت فيه كرهها وحقدها " ايه...صدق ...و هو و الفاضل ايلي قتلو بو اركان وامو في حادث ..." ضربت الطاولة بكفوفها ومالت عليه " انا يا فاضل ...زينب بنت الباشوات ...عقاب عمري نتوقف ...انا ...سمعتي تتوسخ...وانت ...ايلي توسخها ...انا ام اولادك...تلفقلي جريمتك ...وتزيد تغرقني بشيكات انا مصححتهم على بياض وانا عطيتهملك باش تخلص ديونك ..
اترفك بيهم وتحطهم حبل على رقبتي ..."
كل شي تقلب ضدو ...والعينين الكل تخزرلو ...واعضاء المجلس يسمعو في خنارو ...مصدوم من الحالة وزينب كملت زادت هنتلتو " زيد حل فمك ...زيد ابهت ...موت بالبهتة ...باهت كيفاش خرجت؟! ..." نفضت كفوفها " نقلك...موش جناة ايلي حبيت تقتلها ...مازالت حية..."
هزت تولين راسها موش مستوعبة ايلي سمعتو وخزرت لزينب ايلي مازالت تحكي " موش ايلي حب يقتلها ...وايلي انت بعثتو ...طاح بين يدين اركان ...و اعترفلو واعترف للشرطة بكل شي ...وتواجه مع البقية ...قصديى ...مع ايلي قتل عادل ...ومع ايلي خطفو سيلين ...وهوما زادا اعترفو..."شاورت بصبعها ليه ولعزوز ايلي يمسح في العرق متاعو وموش منجم يهز عينو في بناتو " بكلكم باش تشدو ڨلبو "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
