💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 7 : القســـ3ـم 💚

هذا الرجل ....أبوك💚💙
🎆الحلقة السابعة : القسم 3 🎆
**************
احتجت وهو يركبها في الكرهبة " لازم تفسرلي ....قلي شنوة باش نعملو توا ...احمد ؟! ...نحكي معاك "
جبد السبتة وكبسهالها ،وقفتو بيدها خلاتلو يخزرلو ، وجهو كان قريب من وجها بارشا ،انفاسو كانت سخونة كانت معبية بريحتو وفيها حاجة منو ،تلعثمت و حست بسخانة كبيرة في بدنها ، عينيها ،فمها ، شعرها ..كل حاجة منها تناديلو...لازمو طاقة كبيرة باش يقاوم رغبتو فيها ...وخر لتالي وسكر عليها الباب ،دار من الجهة الاخرى وقعد قدام الفولون ،نفخ بقوة ودار ناحيتها باش يفسرلها كيما طلبت " باهي ...نبداو....اولا....الجماعة توا في تونس ...ثانيا فاتتك الطيارة وباش تستنى الفول الجاية بعد غدوة ...ثالثا ...باش ترجع للاوتيل ترتاح غادي ...رابعا....وقت انا نقلك تبعني اسمع الكلام...لانو مانيش باش نغر بيك " عاود نفخ " خامسا ...من اليوم انت في كونجي لين يقولك الطبيب ارجع "
حلت فمها باش تتكلمها وقفها باشارة من يدو "وفى "
دور الفولون ودار بكرهبتو في طريق الاوتيل موش مستعد يسمع منها حتى احتجاج ولا تكسير كلام .
******
عدى تصاورها وحدة وراء وحدة ، طلعت احلى ملي تخيل ...نجم يلوج عليها في ليست دابوناي متاع اختو ونجم يلقاها وعرفها بتصويرتها ...صراحة الانستا متاعها كان كبير شوية وظاهر عندها بارشا فانات يحبوها ويتبعو فيها اول باول ...ماهبطت شي من نهارين وزيد مافماش حتى تصويرة والا فيديو بخصوص العرض متاع لبارح ، هز عينو يشوف في اختو داخلة تتسلسب ،مادام جاية تتمسكن باز عندها طلعة جديدة ،سكر الاي باد ورماه بجنبو ،هز حاجبو يستنى فيها تحكي ، جات بجنبو وحطت راسها على كتفو "ركووووونتي "
دوح راسو وهو يسمع فيها " انت راك احلى واحن واشب خو في الدنيا في بالك ماهو "
بعدها عليه " هات من الاخير "
"ماتتغشش!؟ "
"انا و ايلي باش تحكيه "
وخرت لتالي وهي تفرك في صوابعها "نحب نهبط لتونس بعد الاكزامانات باش نمشي لدار الازياء متاع ناز " قالتها فيسع فيسع ونڨزت بعيد عليه ،استنتو ياقف ويهد عليها ،لانو كثرت على ما وصاووها ...مرة تحب ايطاليا عجبها صباط وتحب تقيس على راحتها وماتاثقش فيهم كي يبعثوها ...ومرة تحب فواياج للصين قال شنوة فمة مهرجان يتعمل مرة في القداش ...الحاصل صيفة طلايع تجيبها يطلعوه من ملة محمد ....لكن المرة هاذي كان كالم بارشا وماعمل حتى ردة فعل ....خزرتلو مستغربة " نرمال !؟ "
قعد يثبت فيها وخافت تكون هاكي فازة ويكون يسب فيها دخلاني و باش ينفجر عليها في اي وقت "اركااان ....سمعتني شنوة قتلك !؟)"ايه ....مازلت ما طرشتش "
"ماكش باش تتغشش"
"لا ...مانيش باش نصرفڨك "
"بالكي عاملها فازة باش تغفلني وتصرفڨني "
"وبالكي انا زادا نحب نمشي لتونس ولناز "
"ههه يا وحيد قول تحب تشوف عارضة ناز ....شالقة بيك راو ..."
"شنوة !؟ "
"ملي بدا العرض وانت روحك طالعة وموش طايق شي اما ملي ظهرت هي اهوووو...ركزت بكل ماليك معاها "
ضيق عينيه " وفاااء"
جرات للباب " سي بون ...هوكا تفاهمنا مالا ...نمشاو مع بعضنا ...باااااي " تجري خرجت وسكرت الباب وراها ...

💚💙

خزرت للطاولة الطويلة العريضة ايلي محضرتها سبسيالمون لتولين ، معقول بنتها تروح وماتفرحش بيها حتى انها طيبت الحاجات ايلي تحبهم وايلي مايزيدوش في وزنها تعرفها قداش متلهية ببدنها وستيلها ، قعدت تستنى فيها كل ما يتعدى الوقت تصبر روحها انها جاية والا في الطريق والا الطيارة وخرت ،بدات تتحير ومخها يعمل في سيناريوات ، معقول تكون صارتلها حاجة ، ترجت بكلها وقت صونى تاليفونها ،جراتلو بلهفة هاذي الف بالمائة هي ، عقدت حواجبها وقت لقاتو نومرو من بر ،شمعناها مازالت في فرانسا وماروحتش ؟! "الو "
"الو....مااااا...."
"تولين ...ياخا ماروحتش!؟"
حكت شعرها " اه ....انا كلمتك باش نقلك ..انو ...مانيش مروحة ليوم...عندنا عرض صغير ...بحكم الاول كان ناجح ...و باش نروح بعد غدوة وطيارتي الصباح ...ما تتحيرش"
"وه ومنين جاء ها العرض ...تولين قلي ماصار شي "
"شنوة باش يصير امي ...عادي والله فرحانة ع الاخير ...ع الاقل نشبع محواس "
"ايه ...هذاكا علاش تلوج انت ...وين توا الساعة ..."
"هاني في بيت لوتيل وباش نرقد ...انت شعاملة "
خزرت للطاولة " انا زادا ...باش نرقد "
"باهي سكر البيبان مليح وارقد...متوحشتني نعرف وتخاف وحدك " نبرتها كان فيها تفذليك ،خلاتها تتبسم " يزي بلا بلادة...وارقد...اشبع محواس اما رد بالك يعيش بنتي "
دخل احمد وفي يدو ساشي دواء " تولين ...هوكا جبتلك ..."
تنطرت من بلاصتها وهي تعفس على ساقها ،سكرتلو فمو خلاتو مصدوم من حركتها هاكي ، هاذي ثاني مرة يدها تمس شفايفو "تولين !؟ بنتي شكون ها الراجل ...سمعت صوت راجل ...موش قتلي في بيت لوتيل "
"ايه....هذا صوت ....ايلي يخدم في لوتيل ...جابلي ...حاجة انا طلبتها "
"حسيتو يحكي تونسي"
ضحكت " يا ملا انت يا امي " شاورت بفمها لاحمد باش يسكت قبل ماتنحي يدها " وليت تتخيل خلاص ....هيا خنسكر توا ...لازم نتفقد كل شي قبل مانرقد "
"باهي ...وصوت صاحبتك علاش موش مسموع ليوم "
"تدوش...تحب نعديهالك كي تكمل !؟ "
"لا ...مادام موجودة موش مشكل ...هيا ليلتك زينة مالا ...تغطى مليح يعيش بنتي ..."
"حاضر عرفي ...على خييييير "
نفست براحة وقت علقت ،ضيق عينو احمد " ايلي يخدم في لوتيل قتلي "
ضحكت " وانت علاش داخل اكاكا ...تعرف امي مامعاهاش لعب من الناحية هاذي "
"يا للا ايلي يخدم في لوتيل جابلك الدواء...والباب كان محلول ...ع الاقل تفقد روحك قبل ما ترقد وشوف بالكي ناسية حاجة وراك ....وقلت فرد المرة نتفقدك "
تبسمت " ياخا قداش من مرة تتفقدني ...لاباس عليا ..."
"سايس روحك ....غدوة الصباح تو نجيك كابيتو "
تملمت بدلال "كابيتو "
ضحك ودار خارج ومن بعد ظهرلو يطل براسو "سكرو مليح ...تعملش كي من بكري ...بون نوي "
"بون راااف "
سكرت الباب وتعكزت بالعكاز ايلي عطاوهولها في السبيطار لين رجعت حذى فرشها .....حاسة روحها ميتة تعب ...حتى انها مانجمتش تخمم كيفاش باش تعدي الليلة وحدها ...دقايق واوب تعدت في سابع نومة ومشات مع احلام اول ماطلع خيط الضو نساتهم شنوة هوما .