💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🍇الحلقة 33 " القسم 1"🍇

🐬الحلقة 33 " القسم 1"🐬
❤✴❤

الايام كيف الترينو ايلي ماياقفش ،من محطة لمحطة وانت علاش تخلط...اول مرة ومن مدة بعيدة تطعم الايام و تحس بيهم كيفاش يدخلو وكيفاش يخرجو...اول مرة تقوم صباحها وفي مخها الف حكاية والف برغرام لازمها تكملهم ...اول مرة تحس بذاتها ،بقوتها ،بوجودها ...اول مرة تعرف شنوة حاجتها بالضبط وشنوة لازم تعمل ...اول خطوة ليها هي ام ...وبنتها هي اكبر اولوياتها ...ثانيهم هي مرا وقلبها يحب ويدق كيف المراهقة لراجلها ...ثالثهم هي هازة امانة شركة كاملة على اكتافها ...رابعهم هي بنت لزوز ضروري تعرفهم شكون مهما يصير ...في ها الدوامة هاذي الكبيرة هي  القلب والعرق النابض ...وبيها هي كل شي يشد بلاصتو و كل نقطة تتحط على حرفها ...

من هاذي لهاذي تعدت الايامات فيسع وكاينو الوقت يجري ويجاري فيها ...تعدو جمعتين في رمشة عين ...امس في الايام اركان حل عينو ورجع من غيبوبة طويلة  وليوم هو يحضر في روحو للخروج من غمة السبيطار كيف مايقول ...هو ايلي شد صحيح يروح ورغم انو طبيبو من الاول ماوافقش لكن قدام صحة راسو وعنادو مالقى مايعمل ...اما هي ...فمشات للادارة وين ريڨلت الاومور الكل وخلصت فلوس عمليتو وقعادو على داير مليم من بعد  رجعت لبيتو باش تخرجو ،على اساس هي ايلي تبدلو دبشو كامل لكن وقت خلطت لقاتو تقريبا كمل كل شي بعد ماعاونو واحد من الفرامل  وايلي اختارو اركان خصيصا باش يعاونو في المدة ايلي يكون فيها على كرسيه وعاجز يستعمل ساقيه ويحرك ظهرو...

حلت الباب لقاتو يلبس فيه في مريولو ،دوب ما دخلو راسو ومعمل يكمل يديه ،شاورت للفرملي  براسها باش يخرج ...وهو قعد متردد  ..وقت شاف اركان هارب بعينو عليهم الزوز مانجمش يعكس كلمتها ،خلى كل شي كيف ماهو  و خرج ...مالت عليه و كملت ايلي قعد ناقص ، تحسس  صوابعها الرقاق على اكتافو ومعاها غرق بدنو في سخانة خلت العرق البارد يلب على جبينو ، استوتلو التريكو كيف مايلزم وهبطت على ركايبها تلبس فيه في صباطو ...تبعها في كل حركة وكاينها كتاب يقرى في سطورو ...هزت راسها ناحيتو ،لقاتو مثبت فيها وفي عينيه بارشا كلام ...كل شي تقريبا حاضر ...قعد كان وجهو وشعرو ايلي داخل بعضو ...مدت يدها للحيتو  نيتها تمشط شعرها لكن هو بعد وجهو  ونطر " انجم نتلهى بيها  وحدي "

دورتلو راسو ناحيتها بقوة لين قريب تفصعهالو ،تأوه بين كفوفها وهي رشقت عينيها في خصلات شعرو ماعلى بالها بعينيه ايلي كلات وجها ماكلة ...رغبة كبيرة سيطرت عليه باش يعدي ذراعو على وسطها ويلزها ليه ...رغبة جامحة حكمت عليه باش يقرب من رقبتها وياخو نفس من ريحتها ...رغبة فتاكة خدرت حواسو وبدنو وماخلت فيه كان قلبو فايق ...ورغم رغباتو الكل مانجم كان يقعد يثبت فيها .

وخرت خطوة لتالي تشوف فيه ناقصش حاجة تكملهالو  ماتحبوش يخرج وحالتو حليلة ، قيمتو ومظهرو والكاريزما متاعو لازم تقعد كيف ماقبل ...تقريبا ماناقصو شي ،لفت اكتافو بغطاء خفيف و دزت الكروسة بيه خارجة ...عرضتهم وفاء وفريد وبعد خلط عبد الجليل ونزهة ...تقريبا الكل كانت الفرحة ظاهرة على وجوهم ،موش فرحة مجبورة انما فرحة صادقة خارجة من جوارحهم ،سأل روحو سؤال ،وين كانو ها الناس وقت كان يعاني وهو واقف على ساقيه ؟!...باش يحسو بوجيعتنا وجروحنا لازم يشوفو دمنا ينزف ؟!..باش يعرفو محنتنا و غصرتنا لازم تنوح العين وتشهد دمعتنا ؟!...باش يشدو يدينا بين كفوفهم لازم يشوفو رعشتها ؟!...ياخا ناسين والا موش فاهمين ...؟!...زعمة موش عارفين انا مستحقين حد يقرى داخلنا ويفهم عينينا ...قبل ماينطق لسانا يسمع هدرتنا ...واركان ...كان مدمر وعاجز في قفص مسكر عليه ،جوانح مقصوصة وهو يفرفط يحب يجنح ...ومالقاش شكون يفرد ريشو قدامو ويقولو شد فيهم وطير ...احساسو مخبل في بعضو  ...ومازادت عليه كان تصرفات تولين المتجبرة ...يكون كذب على روحو اذا مااعترفش انو فرحان بلهوتها وهاك النوع متاع السادية ايلي خلقتها... لكن كهف مظلم مغطي ضلوعو ...خوف متمكن بيه ،خايف لا يطلع هاكي لكل منامة ...خايف لا بمجرد تتحسن حالتو تتبخر كيف الضباب ومعادش يلحق عليها .