💐الحلقـ30ـــة "القسـ1ــــم "💐
❤✴✴❤
على اول خروج السطاف ايلي كان مع أركان تقص كل شي وكل حد ركز اهتمامو عليهم ، دخل عبد الجليل يزرب ووقف قدامهم ملهوف يحب يسمع نهاية السوايع الطويلة في بيت العملية شنية ،خزرلهم الجراح المسؤول واحد واحد وبعد سأل
"شكون فيكم من عايلة سي أركان سويدي"
تنطرت تولين قدامو " أنا ....أنا مرتو...يعيشك طمني عليه ...شنوة احوالو ...عايش موش هكا ؟! "
"اهدى مدام يعيشك ...العمليات ايلي عملناهالو تقريبا لكلها ناجحة ...لكن ..."
استغربت من وجود هاك الكلمة بالذات...اذا قال لكن يعني هذا موش كل شي و حالة اركان كيف ماتوقعت ماهيش ولابد "لكن !!؟؟."
تكلم الجراح بنبرة واضحة وموزونة من جهة حب يخفف فيها الخبر ومن جهة ثانية ماحبش يخبي عليها شي في ما يخص صحة راجلها "باش نكون واضح معاك ...جاتو ضربة مخطرة على راسو وقوية بارشا اثرت بدرجة كبيرة عليه ،مانجمنا نسيطرو ع النزيف و نصلحو الضرر كان بالسيف......وزيد فمة فقرة من فقرات سي اركان تكسرت وباش ترجع تتلحم لازمها وقيت ...وها الوقت مانعرفوش بالضبط ...ممكن تطول وممكن تقصر ...وقبل مايتلحم عظم ها الفقرة ...سي اركان موش باش ينجم يمشي "
الخبر هبط عليها كيف الصاعقة ،رجها بكلها وقلع قلبها من عروقو ، هبطت راسها وخلت دموعها تهبط ...خذى عليها عبد الجليل الكلام وسأل
"وقتاش انجمو نشوفوه !؟ "
"هو توا في البلوك ...مازال تحت الخطر ...لازمنا نستنو اربعة وعشرين ساعة باش نحكمو عليه ...ها السوايع هوما الفصل بالنسبة لحياتو ...ادعولو ربي يقومو لاباس"
تمتمت بحصرة " مايستاهلش ايلي جرى فيه ...مايستاهلش... "هزت راسها وخزرت لعبد الجليل " فمة غيرو يستحق بلاصتو ...لكن أركان مايستاهلش هذااا "
ربت على كتفها يواسي فيها "اهدى يعيش بنتي...موش توا تبكي ...في الشدة نبقاو واقفين شامخين ...مسموحلنا نبكو ونتفكرو همها كان كيف تزول . "
نفت براسها وخرجو كلماتها من اعماقها صريحين "ماعنديش ها القوة ..."
كان متفهم حالتها ورغم المصيبة ايلي سمعها مازال هادي وممكن هاكي بين فرق العبد الكبير وبين ايلي قليل خبرة في ها الدنيا "اذا ماعندكش اكسبها وتعلمها ..."
لوى أحمد فمو على جنب وخرج ...خليها تبكي وتمخط علي روحو معلقة ...خليها تعرف اختيارها لوين هزها ...يعني هي خيرتو عليه ...خليها مالا تعدي عمرها مع واحد مشلول ماينجم يعطيها كان الدمار والعقد النفسية...خليها تو بالوقت تعرف انها ماعرفتش تختار ...تتجبر ترجعلو ...تعرف قيمتو ...وتجيه بساقيها .
هزتو ساقيه للجنينة ،تصور غادي ينجم يركح مخو ...مشغشب بارشا وحاس بصدرو ضيق وبالكاد النفس يطلع ويهبط منو ...ايلي قالتو تولين زعمة صحيح ؟!...هي ماخاناتوش ؟!!!...لكن كيفاش يثبت ...لعل تكذب وتدافع على روحها باش يسامحها خاطر بعدت بنتو عليه ...تنجم زادا عملت هذا الكل خاطرو خوفها ياخو بنتها منها ؟!...نفخ هواء مثقل بافكارو المشوشة ايلي مانجمش ينظمهم ولا يرصي على بر صحيح بيهم .
"أحممممد "
تلفت ناحية الصوت لقاها امو واقفة وتخزرلو بعينين تايهة "أمي!؟..شنوة مجيبك هوني ...كيفاش طلعت بلاصتي "
مشات الخطوات ايلي تفصلهم وثبتت في وجهو الشاحب "القيامة تقيم وانا آخر من يعلمون ...وشنوة حكاية بنت تولين ايلي تخطفت "
صححلها "قصدك بنتي "
ضمت شفايفها لبعضهم "بنتك؟! ..." نفخت وهي تحك شعرها بعصب "احمد...يعيش ولدي ...ها التخريف عندك ليه دليل؟!.....عملت التحليل وتأكدت انها بنتك؟! "
"تو كيف تشوف البنية تفهم وحدك "
"وين باش نشوفها "
"هوني ...سيلين لقاووها يامي ...اما ...ماهيش لاباس"
شهقت برعب "ماتقليش ايلي خطفوها ضروها!؟ "
غمض عينو يتفكر في المشهد " لا ...اما ...حكاية طويييلة "
صرت سنونها " وانا نحب نعرف ها الحكاية الطويلة الكل ..."نبهتو "ورد بالك تخبي عليا حاجة فهمتني " مسدت كتفو وخفت نبرتها" انا هوني باش نعاونك راو موش لسبب اخر كيما انت متصور ...ياخا انا اش عندي في ها الدنيا غيركم ؟!"
جبدها لصدرو وباس راسها "لا ينحيك عليا يا زينوبة ...تو نحكيلك كل شي "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
