💐الحلقة 33 "القسم 2"💐
❤✴❤
من بيت لبيت وهي هاي دخلت هاي خرجت وفهمية وراها ،عادها بيها تطل من البلكونة ، تشوفها تجري هابطة دروج ...لحظة تخليها قاعدة تلعب ، تلقاها تزرفت في الباب تلوج براسها على ضيف يجيهم ...فرفطت بالفرحة وقت شافت الباب الكبير متاع الجنينة يتحل وتدخل منو كرهبة كحلاء شبابكها فيماي ...الف بالماية هاكي جايبة اركان ايلي عيات تستنى فيه ...نڨزت على بلاصتها بحماس ولعبت بساقيها ،معادش تتحمل واول ماراتهم يهبطوه ويقعدوه ع الكرسي متاعو تسيبت كيف الطير الح وجرات بساقيها الصغرونين ،تطايرت خصلاتها المذهبة مع الريح ومااستنتش حتى يستووه في قعدتو ...نڨزت عليه وتشعبطت في رقبتو وهي تضحك ...خافت عليه تولين طول جبدتها بعدتها" يابنيتي مازال تاعب راهو "
ع الكلمة هبتلت شفايفها وتعبت عينيها بالدموع غاضتها انها بعد مااستنتو وصبرت تجي امها و تحرمها منو ... قدام هاك المنظر والشوفة مانجمش قلبها يتحمل ،حاولت تفسرلها على قد عقلها " هو عندو احية والاحية توجع فيه بارشا ..نحن نبوسوه اكاهاو وكيف يولي لاباس نعملو ايلي نحبو " قرصت خدودها "تفاهمنا ؟!"
رغم ايلي مااقتنعتش بارشا لكن دموعها جفت ...وكملت زرعت تبسيمة واسعة على فمها في اللحظة ايلي مالت بيها تولين على اركان باش تخليها تبوسو وتاخو غرضها منو وهي لقاتها فرصة نزلت بشفايفها الصغار على خدو بقوة ...طبعت بوسة طويلة قعدت محفورة في قلبو ومعاها هفت روحو وخفت ...ما قال حتى كلمة ...وماعمل حتى ردة فعل ...مازالت فكرة انو ساقيه معادش تهزو مسيطرة عليه ومخليتو موش واثق في روحو خاصة قدام عينين الخدامة فم...ماحبش يخزر لوجوهم باش مايشوفش هاك الشفقة ولهى روحو بافكار اخرى باش مايسمعش كلمة مسكين منهم ...ساعات نحشمو من خزرات الناس لينا اكثر ملي نحشمو من عيوبنا ...وها المرة عيبو كان في بدنو ...شباب صغير خسر صحتو وولى عالة على سن صغرو ...
سحابات كحلة ملات راسو ومانجم يفرغو منها كان كيف دخلتو تولين لبيتو ...نفخ بقلة صبر وضرب على عجل الكرسي ...ماتدخلتش وما تلهفتش تسألو شبيك...تجاهلتو وحطت الفاليز على اطرف الفرش ...ورجعتلو ..كيف مالبستو التريكو باش تنحيهولو ...لكن ها المرة هو اعصابو تالفة وموش باش يتحكم فيها ...مدت يدها وخذات اطرف مريولو وهو دزها عليه ...شدت روحها بالسيف باش ما تطيحش لتالي لانو دزتو كانت قوية شوية واول مالقفت روحها شدتو من خناقو وجبدتو ليها
" ماتتصححش معايا ...تلعبها كاسح نلعبها محمد علي كلاي ...تضرب نضرب ...تدز ندز ... وااضح "
خزر لعينيها وتبع حركت حدقاتها ايلي يتحركو يمين ويسار ...شعل بدنو وولع اول ما صوابعها تحركو في جنبو ...حست ببدنو رعش تقولش عليه عروسة في ليلتها الاولى ...مانجمتش ماتضحكش ع الفازة ...معقول اركان ببلادتو وركاكتو تكون هي اول مرة تتلمس بدنو ...الفكرة خلتها تجنح وتطير وكاينها كسبت كنوز العالم ...عقد حواجبو مستغرب فيها ...لا الوقت وقت ضحك ولا حالها يستحق باش تضحك .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Truyện Ngắn★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
