💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌼الحلقة 17 : القســ3ــم🌼

🌌الحلقة السابعة عشر : القسـ3ـــم
🌌
رمشت بخوف وهي ترى في روحها ع المرايا ،خزرت بعينين جامدة  لصوابع يديها ايلي يرعشو وموش منجمة تتحكم في رعشتهم ...معقول ها اليدين تقتل !؟...حتى لو مازال في كرش امو ...ماهو الا روح ...ومادام عندو نبض يدق ...فمعناها بشر وبروح . ...ومهما كانت الطريقة ايلي قتلت بيها فهي بالاخير  قتلت عبد ...شهقت بخوف ورعشت بكلها وقت دقت جناة الباب وطلت براسها "مداام ...لاباس! ؟ "
حسب ماتشوف وعلى عينها ماهيش لاباس حتى طرف وعلى قد ما حاولت باش تنسنس وتعرف شنوة سبة تولين مانجمتش ، طلب منها الفاضل تطيبلو قهوة وتجيه للبيرو وقعد يخرفلها في قصة نزهة ايلي لازمها تخرج من حياتهم هي وبنتها وكيف كمل حداثتو لقات كل شي تفض ...تولين روحت و زينب طلعت لبيت نومها .
بلعت زينب ريقها بصعوبة وحاولت تسيطر على رجفة يديها وتكنترولي ملامح وجها باش مايبان عليها شي " جيب...جيبلي الدواء ...ايلي ...متاع النوم ..."
عقدت حواجبها " لاباس؟! لقيتك مطيبة تيزانة وشوية حشايش ؟!...كان مريضة تو نقول لسي الفاضل ..."
قصت عليها وهي تصيح " ماقتلكش افتيلي ولا اعطيني رايك تحرك جيب ايلي قتلك عليه فيسع "
بحلقت فيها مستغربة من ردة فعلها ومن بعد جبدت الباب وراها وهبطت للكوجينة وهي تنغنغ " الله لا كون فيكم واحد وراء واحد...يالندرا اش صار من بعدي باش تخرج من صينتك ...بعمري ماريتك بها الحالة ...اما  مافمة شي يغبى على جناة "
✴⭐✴⭐✴
مرة اخرى وفي نفس النهار يهزها للسبيطار ...مافهمش علاش كل ما تمرض وتصيرلها حاجة يجي هو في الصدافة وترصيلي يعاني فيها وفي عمايل طيشها ...لكن هذا مايمنعش ايلي هو مقهور عليها وعلي صار فيها ...هي غلطت والغلطة كبيرة ...اما لقات روحها وحدها وماعندهاش سند ياقف في ظهرها ...لو جاء بوها موجود والا عندها خوها ...كان احمد وعايلتو ايلي لعبو بشرفها توا يدفع في سوم عملتهم وبالغالي زادا ...
دافن راسو بين كفوفو و هو يحرك في ساقيه بعصبية وتوتر مانجمش يتحكم فيهم ...موش عارف يفرح لانو صغير الحرام باش يطيح والا يحزن عليه لانو ماعندو حتى ذنب فيلي عملوه والديه ،فبرا تاليفونو في جيب سروالو خلاه يمد ساقو لقدامو باش ينجم يجبدو ،لقاه نومرو مهم ولازم يجاوب عليه " اه شفمة ..لخص كل شي في كلمتين لانو مانيش فاضي تو "
"سي أركان...الشخص الثالث  لقيناه وهو يعيش في سويسرا توا ...و كيما توقعت هو نفس الشخص ايلي طلع حي معاك في الاكسيدون ايلي صارلك وانت صغير "
✴⭐💚⭐✴
كل شي بحذاها ...ضباب ...مشوش ...موش مفهوم...نجمت تشوف كان خيالات بيضاء دايرين بيها ووجوه موش واضحة من بعد دخلت في ظلام كبير مافاقت منو كان بعد ليلة كاملة ،مطت شفايفها الشايحين وخزرت ليلي واقفة بجنبها والتبسيمة مالية فمها  ،من الكازاك ايلي لابستو  ظاهرة طبيبة "الحمد الله على سلامتك مدام "
بصوت واطي بالكاد مسموع " طا...طا....ح ...الصــ...ـغـير !؟"
زمت الطبيبة شفايفها لبعضهم وقعدت في الكرسي ايلي بجنب فرشها ،خذاتلها يدها وضغطت عليها بين صوابعها " ليلة لبارح ماكانتش صعيبة عليك انت برك ...كانت صعيبة علينا احنا زادا "
شدت صحيح في سؤالها وكايني هذاكا الكل ما يعنيهاش" طاح ...الصغير !؟ "
تنهدت الطبيبة وجاوبت بكل صرتمة اما بلين كبير " لا ...ماطاحش "
شهقت بالبكاء و بدات تنوح بالصوت ،حبت تجبد يدها من يد الطبيبة لكن مانجمتش بحكم صوابع ايلي معاها كانو مكبشين فيها ع الاخير " انا نعرف انك حبيت تطيح ها الصغير ...لكن بها الطريقة البدائية متاع الحشايش خلفت دمار كبير ليك انت قبل ولدك ...وقت ايلي جيتنا كان عندك نزيف وبوادر اجهاض مبكر  ....اش باش نقلك ...كنت قاسية على بدنك اكثر من اللازم ...وكيف شفت الزروقية على يدك ورقبتك ...تخيلت راجلك عمل فيك هكا وهو ايلي لزك باش تطيح الصغير ...لكن قالولي ماكش معرسة وقتها فهمت علاش عملت في روحك هكا "
بكاها زاد ودموعها زادت على قدام لكن مانجمتش تقول حتى كلمة ،كملت الطبيبة حديثها بكل اصرار " كان عندنا حل واحد باش ننقذوك ...وهو انو  نجهضو الصغير بالوقت  ... لكن ايلي صار نسميه معجزة ...ولدك ايلي كان مجرد  خلايا صغيرة كان مكبش فيك ومغروس في الرحم متاعك بطريقة ماانجمناش انحوه ...ولو قعدنا نحاولو ...كنت تنجم تموت ...مانعرفش علاش ها الصغير شد صحيح فيك واختارك تكون امو بكل قوتو ...صحيح ...مجتمعنا ماهوش باش يسامحك ...اكثر حتى من روحك ..وممكن يعاقبك بطريقة اقسى من الطريقة ايلي حبيت تعاقب بيها روحك ...لكن هو اختارك بكل قوتو و انت تخليت عليه بكل بساطة........." مطت شفايفها وهبطت راسها "توا مانجموش نعملو شي ..نستنو لين بدنك يقوى شوية  ...ومن بعد انحوه ...حتى لو حاولت تصحح غلطتك هاذي وتخمم تخليه ...نقلك روتار بارشا ...لانو ...بمجرد ما يكبر ها الصغير معاك باش تكون عندو مضاعفات صحية ...و باش تخسر الرحم متاعك ...بمعنى ...ها الصغير يا تنحيه توا باش تكون عندك فرصة لصغار اخرين وفي ظروف اخرى تكون انت قابلتهم ومحضرة روحك باش تتلهى بيهم وتكونلهم ام كيف ما يكون ...يا ترضى بيه هو اكاهاو و تغامر بامومتك معاه...مع العلم...كيف يتولد موش باش يكون صغير عادي ...باش يكون صغير مريض "