💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💐الحلقة 4 : القســ2ــم💐

هذا الرجل.... أبيك💜💙💚
🎆الحلقة الرابعة : القسم 2 🎆
**"*****
تبسم موش مصدق الخطوة ايلي عملتها امو ...مسد لحيتو وهو يشوف فيها باش تدوخ بالفرحة ...حالتها وهي ترى في احلامها تتحقق كان من اجمل الحاجات ايلي شهدتهم عينو ....ضحكت جناة فرحانة ...عمال تزيد تاخو ثقة في روحها اكثر في هاك العايلة ...وحقيقة انو الملايكة البيضاء ايلي خلات الافام محلولة هي بنتها ربما تنفعها ....ريما كان تبلع في ريقها موش مصدقة...معقول ام الراجل ايلي تحبو تختار حد اخر لتصاميمها ...وشكون وحدة جاية من وراء البلايك...ماتسواش فرنك ....دخلت تجري للوج تحاول تتحكم في غشها ...عمال تغلي اكثر واكثر ...صحيح مازالت العارضة الرئيسية للتصاميم الاخرين ...لكن ...تصميم زينب بالرجب اهم بياااااسر ...
فرحتها ..وفرحة الناس ايلي معاها ...اعجاب الحاضرين ...قوى احساسو ناحيتو ...حطو على الطريق الصحيح ليلي يعاني منو قلبو .....شلق بروحو يتنفس بقوة ...والهواء باقي موش مكفيه ...صدرو يتهز ويتحط بطريقة حد لاهث ...رغم انو قاعد في بلاصتو ...دار خارج والاصح هارب ...هارب من ذاتو ومن احساسو ...يكذب في الحقيقة ايلي قراها في وجها ...وقف في الكلوار مغمض عينو ...كبس صوابعو باش ينحيها من بالو ...لازم ينساها ....ماهيش اامرا المثالية ايلي يستنى فيها ...ايلي منع قلبو باش مايحبش غيرها ها الوقت الكل ...ماهيش الاستثناء ،جاه صوت امو "أحمد ؟!"
تلفتلها وهو يحاول يخبي ربثتو ،شهقت وقت شافت وجهو ملخلخ واصفر ،مدت يدها لوجهو تقيسلو في سخانتو "شبي وجهك شاحب ،مريض!؟"
تبسم وبعدلها يدها "لاباس عليا ،تعب الخدمة "
"شنوة تعب هاذي!؟حالتك حليلة ...تفرج وجهك "
وصل ناظم وعينيه تلعب بخباثة "انا نعرف داه ...ودواه "
زينب مستفسرة "شبيه خوك !؟ "
خزرلو احمد ونبهو بعينو باش مايقول شي ،لكن هاذي فرصة ناظم باش يشيحلو ريقو " ااحكاية تخص ..."
سكت باش يعذبو ،سألتو بزينب " تخص شنوة !؟ " مسدت بيدها على صدرو تقول وليد صغير "شبيك يعيش ولدي قلي "
احمد "يا امي والله لاباس "
جات جناة تزرب والضحكة مالية فمها ،كانت قاصدة تجبد موضوع تولين بحضور احمد " تقتل ...تقتل ...ملا زين عندها ...يرحم ايلي جاب وسبحانو ايلي صور ...اوو....يا مدام زينب ...اخترت احسن وحدة ....والله موش غريبة عليك ...المامو مايختار كان المامو "
عوج احمد فمو ....قداش يكرها هاك المرا ...ويفد منها ...ساعات تكثرلها بهزان القفة "أمي ...انا باش نمشي توا ...هاني وريت وجهي ...باش مايقولوش ولدها وينو "
ناظم " اممم...قالو وريت وجهي "
زينب محتجة " مافماش مشي ...هاو نقلك وانبه عليك الليلة تبات كان حذايا ...شوف حالتك ...مانجمش نخليك وحدك في هاك الدار "
قبل مايقول كلمة قررت ساياي " وفى ..مانحبش نسمع حتى كلمة "
شاور ناظم لفمو وسكرو ...بمعنى اسكت زايد النقاش .
*****
كانت ليلة عالمية من احلى الليالي في عمرها ، مستحيل تفرح في حياتها قد الفرحة هاكي ...باب السماء تحل وربي رحمها وناولها ايلي طلبتو منو سنين ...وقت وصلت للدار عنقت نزهة وماسيبتها كان بالسيف ...تنڨز وتضحك ولو عندها جناحات كانت علت بيهم في السماء، الخبر مافرحش نزهة ع العكس ...زاد علتها ...كل ما تحاول تبعدها من هاك الطريق ...تمشيلو ويجبدها معاه...كيفاش باش تعمل توا ...وباما قوة تنجم تواجه جناة وخباثتها ...ماتتهنى الا ما تحطملها حياتها ،وقت رات وجها مدخن و شفايفها ترعش سألتها "امي شبيك !؟ ياخا مافرحتليش ..." عقدت حواجبها "نعرفك راو ...كل ما نفرح انا...انت تبوز وتكشبر هكا ...حالة لا تفرحلي وتشاركني فرحتي "
مسدت على كتفها ومثلت فوق من قلبها الفرحة والسعادة " لا ياروحي ...فرحانة ..اما باهتة ...سبحانو مبدل الاحوال ...امس في الايام تبكي خاطر طحت وانت تعرض ...وقلت البيبان تسكرو ...وتوا شوف...في لحظة وليت عارضة لاكبر مصممة ..."
عنقتها بقوة مخلطة بالفرحة "مادام ورايا نزهة كيف العسل ...شنوة تحب "
ضحكت ضحكة صفراء ...في القلب علة مايعلم بيها كان ايلي خلقو ...يا بنيتي اش نحكيلك واش نخلي ...علاش تحل في الجرح بيدك...لو وقفت ومنعتك نتسمى عدوة فرحتك ...لو خليتك وسيبت في هاك الطريق ...باش تبكي في عوض الليلة ليلتين .
💚💙💜

حك شعرو وكمل مسد لحيتو ...هاك الصنعة ايلي ماينحيهاش ...طقس ربيعي وشمس سخونة شجعتو يلبس تريكو نوار نص ...للا زينب شدت صحيح يقعد يبات و يصبح مرتاح ...منعت عليه يمشي للخدمة قال شنوة تاعب ولازم يرتاح ،لقاها في ااجنينة تشرب في قهوتها وتتبنن فيها ، جبد الفنجان من على الطاولة وشرب منو رشفة "نقول لجناة تحضرلك كيفو "
شاورلها براسو لا " كنت نفطر "
"باهي قلي رقدت مليح لبارح "
"نكذب عليك اذا نقلك رقدت مليح ،تعرفني مانرتاح الا في داري "
"اوووو...على ها الدار ...بربي عايش وحدك وتطيب وحدك و تقضي وحدك ...وانت وريث شركة ناز "
"هاك تبعث وحدة من البنات ساعات تنظف وتطيب ...يعني ماعنديش مشكلة من الناحية هاكي "
جات وحدة من الخديمات مسنترة روحها "مدام زينب وصلت ضيفتك "
"خليها تجي"
هز حاجبو "عندك ضيفة !؟ "
تبسمت "ايه ..."
هم باش يقوم شدتو من يدو "علاش تهرب ...ماهيش ريما "
قام رغم هذاكا "حتى لو موش ريما ...تعرفني مانحبش ريق الضياف "
تبسمت وخزرت وراه ليلي جات مع الخديمة ،دار يشوف لوين تخزر ...ياخا قريب يطيح مافي عينو بلة ...تولين ...هي الضيفة ...بلع ريقو بصعوبة ...بينما هي تبسمت ...اما دخلاني شادة روحها بالسيف ...ايلي خايفة منو صار وقت طلبوها وقالولها تمشي لزينب ...نبها عقلها من انها تتعارض معاه ...لكن صبرت روحها وقالت يخدم يستحيل تتصادف معاه ...زاد وجهو لخلخ وصفار ،يعني لا يزي هارب منها ولايزي لاحقتو حتى لفم ...شنوة ها الوحلة ،لازم تتصرف عادي وماتبينش ضعفها ،مدتلو يدها "عسلامة سي احمد "
مانجمش ما يمدش يدو "اهلا ...تولين "
استغربت زينب " تعرفو بعضكم "
كان لازم ينكر صيلتو بيها ،لكن هي سبقتو وجاوبت " سي أحمد هو ايلي اختارني "
زينب "اه...ذوق ولدي ديما بارفاي "
تبسم مجاملة ،شاورتلهم باش يقعدو "احمد ...مليح انك هوني ...فمة حديث باش نحكيه لتولين وماذبيا تكون حاضرلو ..." خزرتلها " الفرصة ايلي جاتك ...غيرك يدفع فيها شقا عمرو ...انا اخترتك اولا لانك مناسبة لخدمتي وثانيا لانو ريت قداش انت بنية حالمة وتحب توصل ...لكن هذا مايمنعش انو وصلت للقمة ..."تبسمت باش ماتخوفهاش اكثر " انا عندي ثقة فيك ...استدعيتك ليوم باش تشوف معايا التصاميم ونحكاو مع بعضنا شوية " خزرت لاحمد " حمودة ....انت لازم تهنيني على كل شي بخصوص العرض متاعي ...خاصة الضيوف ...تعرفني ...كل شي الا الناس ايلي تجي خصيصا ليا انا ..."
جات جناة تزرب ووشوشتلها "مدام ...سي فاضل حاجتو بيك ع التاليفون "
هزت عينيها ورات تولين قاعدة و احمد قريب منها ....فرصة باش يتقربو لبعضهم ،وقفت زينب وشاورت لاحمد " هاني راجعة ...رد بالك تمشي وتخلي ضيفتي وحدها "
تبسملها " حاضر عرفي "
مسدت كتفو و مشات تزرب باش تجاوب على راجلها ...موش عادتو يطلبها في الوقت هاكي .