💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌺❄الحلقة 1 : القســ3ــم ❄🌺

هذا الرجل .... أبيك 💚💜💙
🎆الحلقة الاولى : القسم 3 🎆

شنڨت راسها للبنيان العالية ، طوابق مانجمتش تعدهم ، اسم ناز مكتوب بالانجلزية والعربية مزخرف بلون الذهب ، لوڨو فيه مرا من غير ملامح واقفة ووراها راجل شاد وسطها وكيفها وجهو من غير ملامح ،حلت يدها بطريقة فيها بارشا فرحة "شوف يا ماااا....شوف العالم الجديد متاع بنتك....يا الله ....باش نموت بالفرحة "
كانت نزهة معاها ،ليلة كاملة وتولين تحاول فيها ،قالتلها ماتحبش تكون وحدها في حاجة مصيرية كيف هكا وما سكتت الا ما وصلت للحاجة ايلي حبت عليها ، وهاكي حاجة من طبيعتها ملي هي صغيرة ،اذا حرنت على حاجة ،يصير ايلي يصير وتوصللها . خزرت لامها لقاتها تتبسم "ان شاء الله بالتوفيق ،تره ايجا نركحلك شعرك شوية قبل ماندخلو ، ياخا شنوة ها الريحة البنينة ايلي فيه "
تبسمت راضية "هاكي الشمبوان ايلي وصيت عليه من فرانسا ،تفكرتو "
"اه ...اك ايلي كوتني في خدمة شهر "
احتجت "ماااااا"
"باهي اسكت واركح ...هيا هاو صفا ...امشي ندخلو "
★*******★
على طاولة بيضاء ، تفرشت اوراق و تحطت قلمات رصاص كل قلم ليه فوليمو و مهمتو وغمقو ، حركت صوابعها فماش ماتنحي التعب ، غمضت عينها واتكت على ع الكانابي ،ياحصرة وقت كانت في ليلة وحدة تنجم تطلع عشرة مودالات من غير ما تحس بالتعب هاكي ، جاتها بوسة على خدها خلاتها تتبسم ،حلت عينها وخزرت ليلي قدامها "ناظم "
"صباحو يا للات الكل "
خزرتلو لحظات من بعد قامت ، عدات يدها لكرفاتو استوتهالو "امك مصممة ازياء عالمية، وقت ولدها يخرج كرافاتو معوجة ...تتسمى فضيحة "
ضحكو الزوز ع الفازة "اما ناظم المسكين خاطيه الموضة والازياء ،راني مدير تنفيذي لناز لا اكثر لا اقل ....راجلك موش حابني نشد بلاصتو ...خايف نفكهالو " كانت في نبرتو نوع من الفذلكة خلى امو تعاود تضحك ،تحل الباب ودخل ولدها الثاني ، كان يشبه شوية لناظم من حيث الطول والبدن ،لكن لون العينين الاخضر كان ورثة من عند امو عكس خوه الكبير ايلي ورث اللون العسلي من عند بوه
ناظم "جاء عاد ولدك المفضل والمبحل "
قرب منها وباسها من خدها ومن جبينها ،ضرب ناظم على صدرو "الغيرة تذهب الشيرة ...موش هكا زينوبة "
ضحكت " الزوز اولادي ...لازم تعرفو انو كل حد عندو بلاصة في قلبي "
ناظم " اما بلاصة سي احمد اكبر شوية من بلاصتي "
زينب وهي تضحك " يزي ....خوك الصغير راهو "

احمد يحتج " اوهو....مرضتوني بخوك الصغير هاذي ...بيناتنا عام راو....انت جبتنا على روس بعضنا في فلسفة منك باش ما تقعدش تضيع في وقتك مرة اخرى.
،خدمت مخك ،تربي زوز مع بعضهم في عوض كل وحدو...و من بعد تتفرغ للابداع متاعك "
تبسمت وهي تلعب بيدها على لحيتو ،جبدت من يدو وكبست عليها " انتوما الابداع الحقيقي ايلي عملتو في حياتي ،زوز اولاد مزيانين ناجحين ...ويحبوني ..."
ناظم كمكوا قلبو وجعو " اي ...ملا كلام .. ضربتني في الصميم "
ضحك احمد "ديما مفسد علينا اللحظات الحلوة انت "
ناظم وهو يخزر لمنڨالتو "سي احمد ...هيا بابا ...ياخا ناسي ...ليوم نهار ازرق في الشركة ،باش يعملو انتروتيان للبنات ،خف روحك يلا "
أحمد" عاد انت المسؤول المباشر "
ناظم "أيوا....قولها انت المسؤول المباشر ...وانا الشاف نصحح واكاهاو ...برا على روحك فهمتك "
ضربو على كتفو ودار عنق امو "رد بالك على روحك ...تو نبعثلك جناة من بعد ما يكمل الانتروتيان "
"باهي ....سايسو رواحكم "
خرجو الزوز يتفارعو ويتدازو ،تبعتهم بعين راضية ،شافتهم يضحكو وشايخين ،ياريتكم تقعدو اكاكا يا وليداتي ....ومايبدلكمش الوقت .