هذا الرجل.... أبوك💙💚
🎆الحلقة السادسة : القسم 2 🎆
*******"***
هز يدو ايلي ترعش ومسد لحيتو وكمل عداها لشعرو ، خزر للسماء ونفخ بقوة وهو يحاول يخبي دموع عينو ، حس بيد تجبدو من ذراعو ،خزر بلهفة لقاها تولين تخزرلو بخوف ، من بعد خزرت للطفلة الممدودة والناس تحاول تسعفها لين تجي الاسعاف ، جبدها ليه وحضنها وهو يكبس عليها ، وساعت عينها شي من الدم ايلي راتو وشي من ردة الفعل متاعو ،بعدها عليه شوية وخذاها من يدها وخرج بيها من الحضبة وقت بعدو ،نطرلها يدها وبدا يصيح " وين كنت !؟...كيفاش تتحرك من غيري ومن غير لا تقلي !؟..."
وساعت عينها وتربثت ،شبيه يصيح عليها هذا " ك...كنت ...نستنى فيك ....ما ...حبيتش نمشي ...نسمع الموزيكا وحدي ...قلت نستناك ونمشاو مع بعضنا ...بعدت من هوني ع اللز والدز "
وقت شاف الخوف ماكنها وترعش بكلها ،رجعلو شاهد العقل وبدا يستوعب في حالتو ،هبل في راسو وقت تخيل انو هي ايلي ضربتها الكرهبة ، عاود عنقها وهو يوشوش في وذنيها " ماتخافش....كل شي صفا ...هاي جات الاسعاف ...هدي روحك "
كبشت فيه وحاولت ماتبكيش ، منظر الدم والطفلة شوكاها لكن هو عرف كيفاش يهديها ويريضها عندو ،وقت حس انها بدات ترجع طبيعية في نفسها ، بعدها عليه وخزرلها "صفا توا "
شاورتلو براسها ايه "هيا ...نرجعو ...تو نحوسو مرة اخرى "
وافقتو والمرة هاذي هي ايلي بادرت وشدتو من يدو ، كبس على صوابعها وتبسملها ونسى حتى باش يلم الصاك المفرت ايلي عباهولها بالشكلاطة.
مانجموش يحكاو حتى كلمة في الطريق وعجزت لساناتهم باش تخرج حتى كلمة ، وقت وصلو للبيت متاعها وقفت نقابلو وخزرتلو بلين "ديزولاي "
عقد حواجبو " علاش !؟ نرمالمون انا نقلك ديزولاي لانو ....وعدتك نوريك العاصمة وماوفيتش "
"ديزولاي خليتك تتفجع ...كنت متهيل انو انا ايلي ضربتها الكرهبة هاكي علاه تغششت عليا ولمت كيفاش بعدت من البلاصة ايلي خليتني فيها "
مازال وجها شاحب لمنظر الدم ،مد يدو لخدودها وقرصها فماش مايمشي فيهم الدم " بصراحة مانحبش نضيع الامانات ايلي بين يديا وانت كنت امانة وخفت تصيرلك حاجة "
ناسي انو معاناتها تشبه لمعاناتو وانو لمستو هامي حلت فيها شانطي وخلتها تذوب ،فيسع ما تبدلت البرودة في اطرافها لسخانة ورجع الدم لوجها "هيا ،امشي ارقد...تو نعوضو محواسنا مرة اخرى "
تبسمت " ليلتك زينة "
"بون نوي "
دارت وحلت الباب وقبل ماتسكرو تلفتتلو "موش باهي نسكر الباب في وجهك "
ضحك ودار قاصد بيتو ايلي في الطاق اللوطاني ...بون السويت متاعو ...لانو وريث ناز موش اي واحد باش ياخو مجرد بيت .
كيف وصل طيش روحو ع الكانابي و فرك شعرو بقوة خلاه يدخل بعضو ، شنوة ايلي يصير معاه ...هاذي ولت حقيقة ومعادش قادر ينسي احساسو معاها ...يحبها ...يعشقها ...مخليتو ضعيف وضايع ...وما يحس بقيمة نهارو ووقتو الا وهي معاه...وتوا كيفاش باش يتصرف وكيفاش باش يتعامل معاها ...اما يتناسى ايلي باش تقال عليهم و يعيش معاها حكاية راضي عليها والا يكذب مشاعرو ويعتبرها نزوة واعجاب ويخمم في مصلحة ناز ...بالاخير موش ساهل نائب مدير عام يطيح مع مودال مازالت كي بدات طريقها
💚💙
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
