💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌿الحلقة 34 "القسم 1"😘🌿

🌼الحلقـــ34ـــة "القســـ1ــم 🌼
✴⛅✴

غفات بجنبو و بعد ماتسكرت جفونها ماعاد ثبتت على شي ، قعد كان هو ساهر ليلو مرة يخزرلها ومرة يشيع عينو للسقف ،جافاه النوم وتملى راسو بالافكار والتخمام ، ماعرفش شنوة يعمل معاها يرضى بشفقتها ويحسبها حب والا يلقف ماقعدلو من كرامة ويكمل الثنية ايلي خذاها من اول مافاق من غيبوبتو ...

مع صباح جديد ،حلت عينها وتكسلت بجنبو ، اول شي عملتو تفقدتو وكيف لقاتو مغمض عينو وراقد طمانت ،على اساس تسهر ليلة كاملة عليه لكن غلبها النوم ،تسلسبت من جنبو وخرجت للبيت ايلي بجنبها وين المفروض كانت متاعها هي وسيلين ، لقات الفرش منظم والغطاء مطوي وكل شي نظيف ،  ظاهر فيها امها فاقت على بكري وبنتها تبعتها ،لف لف دوشت بزربة و شيحت شعرها ،لبست ايلي جاء قدامها وهبطت لوطة ، ماتتهنى الا ما ترى سيلين على عينها ، عرضتها فهمية تحضر في طاولة فطور الصباح وحايسة ،سألتها بشك وهي تشوف في ناب جديد و سربيس جديد "سيلا وينهي ؟! "

جاوبتها فهمية وهي تحط في فاز نوار صغير في وسط الطاولة " قامت بكري هي ومدام نزهة ووفاء وحلفو ليوم هوما ايلي يحضرو الفطور "

هزت حواجبها مستغرب "أبوون ..." لوات فمها " ماأقوى سعدو أركان "

تكلمت وفاء من وراها "وسعدك معاه ...خاطر هذا ليك وليه "

ضحكت تولين وهي تجبد كرسي و  تقعد  " حد مافرح بيا قبل وعملي قاوق كي هكا "

همزتها وفاء" مازلت قاعدة...قوم فيق راجلك "

احتجت " يابنتي راجلي في سابع نومة وزيد خلي يرتاح مايزيهش مسكين من غمة السبيطار "

على كلمتها دخل أركان و وراه الفرملي يدز بيه ، من زهرو جاء بالضبط مع كلمة مسكين ،غاص قلبو بين ضلوعو ...بالضبط كيف ماخمم ...ايلي تحسو ناحيتو  مجرد شفقة ورد دين ...

شهقت موش مصدقة "وقتاش حضرتو ولبستو " قامت من بلاصتها ومشاتلو ،قبل ماهي تاخو تدز بيه ،نزل على بوتونات الكروسة قدم بيها ناحية الطاولة من غير لا يستحق حد معاه ،عنقتو وفاء من اكتافو وباست قفاه " لايحرمني من ها الطلة "

صبتلو فهمية كاس حليب وركزتو قدامو "ان شاء فيه الشفاء سي اركان "

بعدو من قدامو ومد صوابعو للقهوة شدتلو تولين يدو وكبست عليها " خاطيتك القهوة "

نطرلها يدها بقوة بعدها على كفو ورجع مد صوابعو بتحدي واضح ، ضيقت عينها بعناد و خطفتها منو " والله لا تلكها مالا " مدتها لفهمية " هز كبها ...ليوم الكل شنشربو الحليب "

ڨحرلها بعينين تڨدح نار وهي شطحتلو حواجبها  تغزل فيه .
جات سيلين تتكعبر من الكوجينة وطلعت طول على ركايبو "باااااباااتتووووو "

شهقت تولين وهي تجبدها من فوق ساقيه " يابنيتي ...راك غلبت عليا ...قتلك الف مرة بااا مريض مالازمش تنڨز اكاكا "

كلمة مريض ...مسكين... مشلول ...مايقدرش .... يفورولو دمو هاكي علاه مانجمش يسيطر على اعصابو وضرب بكفو ع الطاولة بقوة ، ترعبت سيلين وتخبت وراء فهمية وهي تخزرلو بعينين محلولة على كبرها ، عضت تولين شفايفها بغل وشاورتلها للكوجينة " هز سيلا فطرها غادي "

حملتها فهمية و طارت بيها بعيد وهي ماشية عرضتها نزهة تتمشى في عقل عقلها وفي يدها بلا صغير وكاينو ماصار شي ، ركزتو قدام اركان وجبدت كرسي بجنبو وهكاكا  لقى روحو بين الام وبنتها  ، خذات مغرفة من الصحفة الصغيرة ايلي مازالت كي كملت خلطتها  "عسل وجلجان ولوز مرحيين طيبتهم مع شوية درع باهين يلحمو العظم ..."

دور وجهو للجهة الاخرى في رفص واضح ...لكن  بزهرو لقى تولين ع الجنب اخر ...هزت حواجبها بتهديد " كووول "

نفخ بقلة صبر وهو يرجع بكروستو لتالي ...عرضتلو  تولين ساقها  عطلتو " وين على خير بابا "

غلبت عليه ولو جاء صحيح كان رفسها وخلطها مع صحفة الدرع "راجع نتخمد نرقد ...ميسالش "

شاورتلو براسها لا " مافماش نوم...تكمل فطورك...تاخو دواك...ونخرجو نقعدو في الجنينة ...الطقس حلو "

جبدتو نزهة من كروستو عاودت قربتو للطاولة " تولين راسها كاسح و الاولى في العناد...لذا ننصحك كول وخلي الامور سلمية "

خبت  وفاء ضحكتها بكف يدها وهي تخزرلهم ....مالا ثنائي يا بوڨلب ...الرحمة لا ...اركان وصعوبيتو مانجمهمش ...اما للصراحة وفي محنتو هاكي ..هذاكا  ايلي يصلحلو ...