💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🔮الحلقة 9 : القسـ3ـم 🔮

هذا الرجل ....ابوك💚💚
🌺الحلقة التاسعة : القسم 3 🌺
★*****★
مشات زينب بانوثة كبيرة قدام تولين ونزهة وهي تشاور بصوابعها للاتولياي متاعها " هوني العالم الصغير متاعي "
دور راسها مبهورة بالخدمة والالوان "مدام....تحضر في كولكسيون جديدة "
تبسمت " يعني حوكي وحرايري ، مني نحضر في كولكسيون جديدة مني نحضر في مودالات طلبوهم كليوناتي ،ومني نصلح حاجات "
خزرت لنزهة ايلي بان عليها القلق " مدام نزهة ...يظهرلي فيك ماكش كيف بنتك ...تكره الازياء"
"بصراحة لا....اما انا نتبع فيها وبرا في خاطر بنتي "
جات عينين تولين على روب في الباج وطويلة ، وساعت عينها من الضخامة متاعها والحلاوة ،شلقت بيها زينب فخزرتلها هي زادا "عجبتك !؟ "
"تفتق ...تقتل ...هاذي في الكولكسيون الجديدة والا لكليون "
زمت شفايفها " اممممم. ..ولا واحد فيهم....هاذي سبسيال للمرا ايلي ...باش يختارها ولدي ....هدية المرا ايلي احمد باش يقرر يكمل معاها حياتو " ركزت مليح باش تشوف شنوة ردة فعلها ،رات خدودها يحمارو بالوقت وعينيها تلمع ...شافت هدف يترسم فيهم ...وعزيمة اكبر تتحط ...هكا هي تكون شجعتها اكثر من اللازم باش تكبش في احمد وما تسيبهوش .
********
قعد الفاضل يمسد في شلاغم بتوتر وسارح ،ركز معاه ناظم وحاول يفهم شبيه اكاكا يخمم !..شنوة ايلي صار خلاه مهموم وموش معاهم اصل ، جاء بجنبو وقعد "بابا ! ....يابابا نحكي معاك "
فاق بوه من سرحتو " اه...شفمة...رجعو الضياف !؟ "
"لا اما ....انت رجعت بيناتنا والا مازلت سارح في عالمك "
عقد حواجبو " شنوة !؟ "
نفخ " يعني ...يا سيد الوالد...شنوة ايلي خلاك هكا ،شارد...ضايع ...موش هوني ....ياخا نزهة وبنتها عندهم دخل في حالتك هاذي "
وقف بالوقت " شنوة ها الكلام ...اش دخلهم ....وشنوة يجمعني بيهم انا باش نسرح على خاطرهم ...ايا تره ريض وسيب عليك من الريق الفاسد متاعك "
مشى خارج وناظم حال فمو ببهتة ،خزر لخوه " أحمد !...هاو نقلك....حالة بوك ماهيش نرمال ...شفتو كيفاش عمل !؟...شعل فيا بلا مقدمات "
غمض عينو احمد ومط شفايفو بقلة صبر ،وكمل يشرب في قهوتو ، بالو موش معاه ولا مع بوه ...بالو توا مع الضيفة ايلي هزتها امو ولتوا لا رجعتها .
*********
مشاو من الاتولياي راجعين للصالة ، نجمت نزهة تشم ريحة الورد ايلي جايبتها نسمة الليل ، لوجت بعينها على بلاصتها ونجمت تشوف الجنينة ،جات زينب بحذاها وسألتها " اه....ماتقليش غرامك في الجردة "
"بالضبط "
"تحب تعمل دورة !؟ "
"مافماش قلق !؟ "
"لا ...بالطبيعة ...انت ضيفتي ...ماعليك الا تدلل "
تبسمت نزهة لرقتها ،الاقتراح رضاها اما ماعجبش تولين ، تي ماذبيها تعدي اكثر وقت معاه ...وهكا باش تضيع ايلي مازال وهي تتفرج في الحشيش ،لازمها تتصرف " أمي ...انا بردانة شوية ...باش ندخل وانتوما تفرجو على راحتكم "
نزهة " باهي عزيزتي ...شوية ونرجع ...ديجا وقيت مرواح "
زينب " لا عاد مدام نزهة ....هكا !....ع الاقل خنبروفيتو مليح في ها الليلة بحكم اول ليلة نتعرفو فيها على بعضنا "
"ولينا نعرفو بعضنا توا ....يعني مازالت الايام والليالي ايلي نبروفيتو فيها "
زينب " باهي .....هيا تفضل نوريك شتلات الورد "
مشات معاها نزهة خطيوة خطيوة وهي تحكيلها ع للانواع وتسأل كيفاش ومنين دبرت الشتلات النادرين وفهمت منها انو فيهم ايلي موصية عليهم وايلي جاووها كادو ، زربت تولين روحها ومشات راجعة لداخلة ....نجمت تسلك روحها منو ...وقفت وهي تشوف في احمد جاي ناحيتها ، دق قلبها بفرحة ....قداش تحبو وتفرح بشوفتو ،وصل بجنبها " وين كنت ...خليتني نستنى لتوا "
"كنا مع امك ...نتفرجو في خدمتها "
مد يدو لوجها وعدى صوابعو على شفايفها ،رعشت بكلها وبعدت " فاش تعمل !؟..."
"شنوة هاذي فاش نعمل ...تولين ...متوحشك راني ...بلفلاڨي معادش منجم نبقى بعيد عليك ..." عدى يدو الاخرى وراء ظهرها وجبدها ليه ، تملمت دزتو " تي احشم ...كان يتعدى حد ويرانا "
خطفها من يدها وحل اقرب باب ليه ،دخلها وسكرو وراه ،شهقت " فاش تعمل !؟ "
"موش كنت خايفة حد يرانا ، هانا وحدنا....مناش مازلت خايفة "
"أحمد...شبيك ...علاه تتصرف هكا "
قرب منها اكثر" كيفاش نتصرف"
تلعثمت " مانعرفش اما. .موش طبيعي "
لصقها ع الحيط "مانيش طبيعي لانو سهرية كاملة مطفيتني ...حتى باش تسلم عليا لا ...خزرة وحدة لا ...كلمة وحدة لا ....كايني مانيش موجود"
تمتمت " لانو ...مالازمش حد يعرف ايلي بيناتنا "
"علاش...."
"باش يكثر الكلام واحنا في اول الطريق "شم ريحتها وتبننها وهو يغمض عينو " تولين ...شنوة ايلي عملتو فيا !؟.."
ضرب قلبها بقوة ...انت شنوة عملت فيا ،هزت عينها فيه لقاتو حلهم ويخزرلها ، كل شي فيه يناديلها ،يقتل فيها اي مقاومة عندها " أحمد....ماتعملش هكا ..."
سمعو الباب تحل وبان ناظم ، تنطرت بعيدة عليه وعملت روحها تريڨل في شعرها وهي عاطيتو بالظهر ،اما احمد فضيق عينو بعصب ظاهر ،تبسم خوه وهو يشاور للشباك " حبيت نفيقكم ع الشباك المحلول ..." غمزو " ماك تعرف العينين بارشا "
حست بخدودها يشعلو نار من الحشمة ،شاورلو احمد بيدو باش يخرج "الحساب من بعد "
هز اكتافو " دوغياااان "
عاود جبد الباب وسكرو ومشى ،دارت واجهتو بعد ماتأكدت انو خوه مشى " شفت ...ناظم عرف توا ايلي بيناتنا "
"ناظم ...يعرف كل شي"
"كيفاش !؟...علاش تحكيلو واحنا مازلنا كي ...."
جبدها من وسطها " فك علينا من سيرة ناظم ...تولين انا ...."
بعدتو عليها بقوة " انا لازم نمشي "
جرات للباب هاربة منو ...في الواقع هاربة من احساسها وضعفها معاه ،حلتو وفيسع ماسكرتو واتكت عليه بظهرها ،استغرب من حالتها "شبيك !؟ "
وشوشتلو "امي وامك "
ضحك وهو يسمع صوت ساقيهم ،لقاها فرصة وقرب منها لين حصرها في بلاصتها "احمد "
"اشششش .....لا يسمعك حد "
"احمد وخر لتالي "
"يابنتي اسكت لايسمعوك "
"باهي امشي " دزتو بيديها الزوز لكن ماتحركش من بلاصتو ، شنوة باش تعمل في مصيبتها هاذي ...عمال تحارب وتحارب وتقاوم باش ما اتبعش قلبها لكن .. شي اقوى منها ..."أحمد ....."
هوني ضاعت محاولاتها ومشات مع الريح لانو وقت تحسست النفس متاعو قريب منها ...نجمت تبقى تحارب ،استسلمت ليه ولقات روحها تعدى يدها وراء رقبتو وتسهلو ايلي كان ناوي يعملو من الاول ،ضاع معاها وفي شفايفها ومانجم يبعد روحو عليها كان بالسيف ..لهثت وهي تحاول تسيطر على روحها ...مانجمتش حتى تخزر لعينو ،طول حلت الباب ومشات تجري ...مسد لحيتو وشعرو ونفخ بقوة ...شنوة عملتلو بالرسمي ...شي اقوى منو وموش منجم يسيطر ويتحكم في روحو في حضورها .
*******
وقت دخلت للصالة لقات امها محضرة روحها باش تروح ، استغرب من حالة بنتها و شعرها ايلي داخل بعضو ،لكن زينب تخيلت شنوة ينجم يخليها اكاكا ...وتأكدت من شكها وقت مالقاتش احمد ....ها الزوز فاش قاعدين يعملو ...وهي علاش تحس بالضيق كل ماتتخيلهم مع بعضهم....وين المشكل اذا حبو بعضهم ...بالاخير هي حبتو يبني حياتو ويشوف وخدة تكملو ...علاش حالتها ولت هكا مالا كيف شافتو يحب ويتحب !...ودعو العايلة وخذاو تاكسي وقصدو ربي لدارهم رغم ناظم اقترح انو يوصلها ،لكن نزهة ماحبتش وتولين بطبيعتها ساكتة ملي خرجت من بخذا احمد ،بدات تسترجع في ثقتها وقوتها وقت حطت راسها على كتف امها ودخلت يدها في ذراعها ،تمتمت بصوت مبحوح " نحبك بارشا امي ...نعرف ايلي انت عملت هذا الكل على خاطري ....تحملت ها الليلة الطويلة باش ماتخلينيش وحدي ...انت مرا عظيمة وانا نحبك ...نحبببلك "
باستها من كتفها خلات تولين تضمها اكثر ليها " وانا نحبك ياروحي....مستعدة ندخل حافية للنار ...المهم انت تكون فرحانة "
"لايحرمني منك "
"ويخليك ليا بنوتي "