هذا الرجل ..أبوك💚💙
🎆الحلقة السادسة : القسم 3 🎆
*********
خزر لركبتها الملفوفة في الابيض ، النفاخ كان ظاهر ،عاود خزرلها لقاها اتبع فيه وهي تبلع في ريقها ، بالنسبة ليها هاكي حاجة شوهت بدنها وفسدتو ، وهي اكثر حاجة تكرها انو تتشوه اي بلاصة من بدنها وتنقص من زينة ستيلها والا مظهرها ، قرب منها وعنقها ، هاذي ثاني مرة يعملها ، شمت ريحتو البنينة ايلي دخلت خشمها ومشات في عروقها ،خلاتها تتخدر اكثر ، غمضت عينها تستحلى في هاك اللحظة ، لحظة من الخيال ،انها تكون بين يديه و هو حاضنها اكاكا حاجة تمناتها في المنام وفي اليقظة ،وقت بعدت عليه ،ثبت فيه ،لقات عينيه تلمع بحاجة سبسيال ،نجمت تشوف فيهم حنيتو وخوفو عليها ، كيف تبسمتلو رات عضلات وجهو يترخفو ويتفرهد شوية ، موش عارفة شكون بيناتهم يستحق انو يصبروه وينحولو الخوف .
*******
جات ريما تتمايل ومعاها البنات ، وبان على وجها قداش كانت مرتاحة وفرحانة عكس ايلي معاها ، عملت روحها متقلقة عليها ومفجوعة لا تكون صارتلها حاجة ڨراف وفي الحقيقة تحب تتأكد انو ماهيش باش تشارك معاهم غدوة في الديفيلاي " طاااا....شنوة احوال تولين ؟!ان شاء الله مافماش حاجة خطيرة "
زمت زينب شفايفها " ريما ....ايجا على جنب حاجتي بيك باش نقلك كلمتين "
"بالطبيعة ...انا على ذمتك "
مشاو خطوات لين بعدو ع البقية ، وقتها باش عقدت زينب حواجبها وبدات تحكي في صلب الموضوع " لولا انك قريبة مني ومن عايلتي وبوك شريك سي الفاضل ، كنت نتصرف معاك بطريقة اخرى ...اما هذا ما يمنعش انو نوقفك عند حدك وقت تغلط "
"نغلط ؟! مافهمتكش طا ...في شنوة تقصد ...علاش تحكي بالضبط "
" نحكي علي عملتو في تولين ...طيحت الطفلة في الدروج قريب تكسرلها عظامها ...وغير هذا ...فسدتلي العرض متاعي ...برافو ...بسبب عملتك هاذي انا باش نأجل خدمتي الكل ...لانو ماقريتش حسابي انك باش تدز العارضة متاعي وتخلعلها ركبتها "
تمتمت "ياريت عظامها تكسرت ورتحنا منها "
صاحت بعصب " ريماااااا "
"طاااا...." قدمت منها خطوة " مانيش باش ننكر ...ايه دزيتها ...ومانيش نادمة ...وياريت كنت انجم نعمل اكثر من اكاكا ...ياخا شكوني هي !؟ وعلاه الناس الكل ماتحكي كان عليها ؟!... بين نهار وليلة ولات ناز كاملة تبجل فيها ...وانت !...انت يا طا وقفت معاها و حطيتها عارضة اولى ....علاه ؟!...ماخممتش فيا وقت عملت هكا !؟...ماقلتش بالكي ريما تتوجع مني ...!؟...خيرتها عليا ...وعاملتها خير مني ...جاش لبالك مرة شنوة انا نحس !؟..." تجمعت دموعها في عينيها وهبطو ، ما كلفتش روحها تمسحهم " شنوة كنت مستنية مني ...وقت ...طفلة تدخل حياة الراجل ايلي نحبو ...كيفاش نتصرف وقت تاخذو مني ...وقت هي تنجم تخليه يخزرلها ويضحكلها ويمدلها يدو ...وانا حتى كلمتين مايحكهمش معايا ....قلي ...شنوة نعمل وقت الراجل ايلي حبيتو ملي انا طفلة صغيرة وحليت عيني عليه نلقى وحدة بجنبو وعمال تشربلو في عقلو يوم بعد يوم ..."
تصدمت زينب من الكلام ايلي سمعتو " فاش تحكي ....شكوني ايلي ...فكت أحمد منك !؟ ....تقصد في تولين !؟ ...لكن ...تولين واحمد مابيناتهم شي "
"لااااا" حاولت تخفف حدة صوتها احتراما ليها " لا، بيناتهم ....طااا...أحمد هو ايلي خلاها تنجح في التاست ، واحمد ايلي وصلها لهوني ،واحمد ايلي واقف معاها في كل شي ،...احمد ....باش يضيع مني اذا مابعدتوش عليها ، المرا تقول ساحرتو ،مخليتو معاها اعمى مايشوف كان هي "
"مستحيل احمد يعمل هكا ، انت تعرفو مليح ...ريق البنات ماعندوش "
ضحكت بمرارة " وطلع عندو ....لو ريتو كيفاش يخزرلها ،وكيفاش يحكي معاها ،وكيفاش متبدل على خاطرها ...لازمني ندزها وكان لزم نقتلها قبل ماتزيد تغرقو ....انت يا طا قاعدة تقرب فيها منو وانت موش عارفة ...قاعدة تقتل فيا عرق عرق وانت موش دارية ،يعيشك يزي ، ماتعملش هكا فيا ، ماتزيدش تعقد الاومور الاكثر "
بصوت مبحوح متأثر "ريما !....انا ...ما نعرفش اذا كلامك صحيح والا لا ...لكن ...انا مستحيل نكون جرحتك عن قصد والا ...نقرب فيهم لبعضهم ع العكس ...كل الاومور ايلي تجمعنا هي خدمة ...صدقني "
خذات يدها عندها " طا...انا والله نحب احمد... نموت عليه ...ونعشقو اكثر حتى من روحي.... يعيشك...ماتبعدناش على بعضنا ..انت اكثر وحدة تعرف مشاعري ناحيتو ...انا اصلا وليت عارضة ودخلت لناز كان على خاطرو ...باش انجم نراه ونتقرب منو ...اما هي ...تتقرب منو باش تنجح وتوصل ليلي حاجتها بيه ...تحب تتشهر على حسابو وحساب اسمك...وانت عطيتها ع الفرصة ...همها الكل الفلوس وتنجح وتكون سوبار مودال في العالم الكل كان لزم...."
لازم تهديها خاصة انو هي تبكي ولات تشهق " عزيزتي يزي من البكاء، تو نحكي مع تحمد ونفهم منو شنوة علاقتو بيها ، ونتأكد اذا هو عندو دخل فيلي وصلتلو هي والا لا ...ماتخافش ...تو نفهم منو كل شي ونجي نقلك...باهي !؟ "
شاورتلها براسها ايه ،حضنتها زينب بامومة كبيرة ومسدت ظهرها ، برا توا هاي ولات مشكلة جديدة ...شنوة حكاية العلاقة ولدها وبين المودال متاعها
💚💙
وخر شوية لتالي ورجع لبلاصتو ايلي قعد فيها اول مرة على حافة فرشها وقت دخلت امو ، لاحظت انو مازال شاد يدها عندو لولا تولين سلت صوابعها منو ماكانش يفيق بالفازة ، تبسمت زينب و مسدت على شعرها " موجوعة بارشا !؟ "
"لا...ديجا الدواء عطى مفعولو "
عارف انها تكابر وتكذب لانو باين على وجها قداش هي موجوعة ،بلعت تولين ريقها وهزت عينها في امو " مدام زينب ....ماتخممش في العرض ....."
قصت عليها " اما عرض يا بنيتي ؟!...انت ابرى الساعة ومن بعد تو نعملو موش عرض ...الوف العروض "
تولين " لا طا...مستحيل نأجلو العرض ...هو مهم بالنسبة ليك على قد ماهو مهم بالنسبة ليا ...اكسيدون كيف هذا موش باش يخلينا نسلمو . .انت حطيت ثيقتك فيا باش انجح العرض وانا ماانجمش مانكونش في المستوى ...و ديفيلاي باريس مهم زادا لناز ...ولاسمك "
تدخل احمد " فاش تحكي !؟ ماكش ترى في ساقك ...انت اصلا ماتنجمش تاقف عليها ...خلي يا تمشي وتجي "
طمنتو " انجم نتحمل الوجيعة ومع الدوايات والبنداج والكبس كابابل نمشب ونجي عادي "
زينب " لا ...ماانجمش نغامر بصحتك على جال عرض"
شدت على يدها " مدام يعيشك...ماانجمش نفلت فرصة كيف هكا ....هاذي فرصتي باش نفرض روحي كعارضة ....يعيشك ماتحرمنيش ....اذا قصرت والا عملت حاجة موش هي تنجم تفسخ العقد ايلي بيناتنا "
تدخل احمد " المشكل موش العقد والنجاح والعرض ...المشكل انو ساقك تستحق راحة "
نجمت امو تفهم الدافع ايلي خلاه يحكي هكا ،ولدها كان خايف عليها اكثر من خوفو على ناز ومصلحتها
"انا قادرة نتحمل ...وزيد الوجيعة بدات تقل ...ومن هوني لغدوة نكون ارتحت ..." خزرت لزينب " يعيشك مدام...انت عطيتني فرصة قبل ...ماتحرمنيش من ها الفرصة...وزيد الازياء ايلي باش نعرضهم طوال موش باش يكشفو البنداج "
هوني قعدت امو باهتة وهي تثبت فيها ...الحق الشي بهتها ...ريما تقلها انو تستغل في احمد باش توصل بسهولة للنجاح ...لكن هي توا استغلت ضعفها وعملت منو قوة ...مستعدة تتناسى وجيعتها وتعفس ع الساق ايلي توجع قدام الكاميرا ،قبل ماتعطي كلمتها خزرت لولدها لقاتو يڨحرلها وينبه فيها بعينيه باش ماتوافقش ،عاودت خزرتلها هي لقاتها متأملة منها وتستنى في كلمتها تقول حياة او موت ...عارفة انها هكا تضر فيها ...لكن اصرارها هذا خلاها توافق بالسيف عليها " باهي ...اما ...باش انقصو من الازياء ...ماكش باش تعرضهم الكل "
قام احمد بغل وضرب الفرش بساقو وديراكت حل الباب وخرج ترعبت تولين كيف شافتو يتصرف اكاكا وزينب بدورها استغرب موش مستانس يتصرف هكا قدامها... هذا للكل خوف عليها ...يظهرلي احمد جدي في علاقتو مع ها العارضة ،حبت تغطي ع الوضع وتنحي شوية من التوتر " مرسي مدام ...ان شاء الله نكون في المستوى "
"تولين...مازالت عندك فرصة تبدل رايك...ساقك مخلوعة ...موش ساهل راهو ...الوجيعة باش تقتلك ومع ااطالون باش تلقى روحك ميتة "
تبسمت و لمعت عينها بتحدي " ماتخافش عليا ...بحول الله قدها "
خرج يفرك وحدو ومبين عليه على اعصابو ،اي حد يراه ينجم يعرفو ع الاخير لانو وجهو كان احمر وعروقو مكبوسة ، تعدى بحذا ريما وجبدها بقوة من ذراعها ،كركرها وراه لين بعدها ع البنات " ان شاء الله تكون ماعندك حتى يد فيلي صار لتولين ...والا معاملتي معاك باس تتبدل "
نطرلها يدها بقوة وكمل ثنية قدام بهتة البقية ايلي كانو يتخيلو انو علاقة الزوز هاكم خير ببارشا من انو يتصرف معاها بهاك الطريقة الاڨريسيف .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
