💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة 26 : القسـ2ــم💚

🎭الحلقــــ26ـــة : القســــ2ــــم🎭
♥❇♥

ليلة كاملة ماذاقتش النوم ، حتى بعد ماطمنها الطبيب هناها مازالت خايفة عليها وساعة ساعة تتفقدها وتتفقد النفس والسخانة متاعها ، نزهة تحملت قد مانجمت اما في الاخير غلبها التعب ورقدت حذى سيلين ، بالنسبة لتولين قعدت ساهرة طول الليل من غير ماتغفى عينها ،اول ما طلعت الشمس مشات للتوالاتات غسلت وجها ويديها فماش ما تتفرشك شوية و من بعد مشات للادارة وين ريڨلت اوراق خروج بنتها وخلصت الكلينيك .

حلت نزهة عينيها وفركتهم وهي تثاوب ،ملي حطت راسها تعدت في النوم ومافاقت كان الوقت هاكي ،خزرت للسرير متاع سيلين لقات كان الملحفة مخلوضة ومرمية فوقو وهي مافماش ،نڨزت من بلاصتها وجات واقفة ،تمتمت وهي تخزر في تراكن البيت
"وين مشات ؟! زعمة خرجتها امها؟! " نادتلها باش تقطع شكها لعل في بعض البلايص وتلعب "سييييلييييين. .."

اما ماجاها حتى رد ،قلبها ايلي ديما خبيرها قالها فمة حاجة في الوسط والحكاية تستحق منها تلوج عليها مليح وبكل جدية ،هي اكاكا داخلة بعضها وموش فاهمة شي دخلت وحدة من الفرامل ،تنطرت عليها وبدات تسأل بلهفة وفي جرة بعضو
"البنية الصغيرة ايلي كانت هوني وين؟! ....هزيتوها للكنترول ؟! والا مع امها ؟! ...شفتهاش وانت جاية ؟! "

خزرتلها الفرملية بضياع وهزت اكتافها "مانعرفش...موش على اساس راقدة حذاك؟!"

حست ببدنها الكل يرعش وبالسيف ما منجمة تاقف "كيفاش ماتعرفش؟! ...صحيح كانت راقدة بجنبي اما هاني فقت و مالقيتهااااش ..."

بحلقت فيها الفرملية وحاولت تلقى تفسير "ربما حد من الفامي جاء هزها "

صاحت نزهة بقلة صبر "فاش تحكي انت ...شكون ها الحد ؟! ..."

تحل الباب و دخلت تولين وفي يدها اوراق "شنوة ها الصيااااح " خزرت للسرير لقاتو فارغ ، سألت امها مستغربة "ياخا ما تقليش ويني سيلين؟!"

حطت نزهة كفها على جبينها تحاول تخلي عقلها يخدم وفماش ماتركز و تفهم ايلي صار وتستوعبو ...دارت نص دورة كيف المجنون وهي تقطر عليها بالكلمة بالكلمة من غير ماتخزر في عينيها "فقت نلقاها..... مافماش...في ....بالي... معاك... انت؟! "

ترخفت صوابع تولين ع الاوراق ايلي جابتهم و خلتهم يفلتو منها ...جاو ع القاعة مفرتين ...رعش صوتها برعب كبير "شنوة!!!!!!...شمعناها مالقيتهاش...؟! " تلفتت للفرملية وصاحت "بنتي ويييين؟!!!"

قعدت الفرملية تخزرلها باهتة وموش منجمة ترد ...الحكاية ظاهر فيها سريو وممكن تتعقد اكثر...الام مالقاتش بنتها المريضة ...وها الشي ينجم يشعل النار في الكلينك ..افترضت " ربما ...خرجت ...وانتوما ماشلقتوش بيها ولعل ... "