🍇الحلقة عشرون : القســ3ــم🍇
✳🐋✳
وهوما على طاولة العشاء ،خير اركان يظهر عايلتو بمظهر العايلة السعيدة والمتفاهمة.. وهي لقات روحها مجبورة تتصرف كيفو و تكافح اكثر من جهدها باش ماتبينش الكورون ايلي يضرب بينها وبينو قدام الضيف ...سيلين ايلي قعدت بيناتهم بقات اتبع في عبد الجليل وتحفظ في حركاتو بالتدقيق ، ثبتت فيه مليح وماخلت حتى حاجة من بدنو ما فرزتهاش ...جبدت امها من مرفقها ووشوشتلها "ماما ...عمو الراجل عندو عينين كيف عينيا "
في بالها موش باش يسمعها اما عبد الجليل وصلتو كلماتها و بوضوح ،ضحك برقة " اما عينيك انت احلى من لون عينين عمو الراجل "
نبرتو لينة طمنتها الشي ايلي خلاها تتشجع وتتسيب في الحديث قدام بهتة تولين وغزول اركان " انا عينيا لون البحر ...وانت عينيك لون السماء "
الصراحة تفاجأ من قدرتها على الوصف وماتخيلهاش بالفصاحة هاكي " اوووه...هاذي اميرة ذكية بااارشا ماشاء الله ...يكمل عليكم بيها "
تبسمت برضا وحمار وجها من الحشمة ، مسدت تولين على شعرها وهي فرحانة انو حد شكر بنتها " شفت ياسي عبد الجليل ...بنتي مازالت كي غلقت تلاثة سنين وتفرق بين الالوان وتعرف تحكي زادا رغم انها حشامة "
ظاهر انو عجبتو بارشا سيرين وشاخ عليها "هاذي علامات ذكاء ...لازم تتلهى بيها مليح من ها الناحية وبقدرة ربي تلقاها عالمة كبيرة وعلاش لا تكتشفلنا ظاهرة من الظواهر الطبيعية "
قص اركان طرف لحم وبعد ما اطعمو مليح حب يشارك معاهم في الحديث " سي عبد الجليل ...الذكاء في ها العيلة وراثي راو ...خوذ مثلا زوجتي الحبيبة تولين ...ذكية ومهفة شي عجب وحد ماينجم يعديها عليها ..."
فاهمتو وحافظتو ...هو يرمي في المعنى عليها ...وظاهر فيه موش ناوي يخلي وقت للهدنة بيناتهم وقاصد ينبزها ويفكرها انو ولد زينب عداها عليها وهي كيف البوهالية صدقتو ..مادام هكا الحكاية حتى هي لازم تكلاشيه وبالطريقة ايلي هو استعملها ضدها ، حطت كفوفها على بعضهم و سندت بيهم دڨنونتها "سيلين خذات مني انا الذكاء ...رغم الوقت الكل وهي معاه ...لو كان نقلك يا سي عبد الجليل قداشو بو مثالي ماتصدقش ...يرعش عليها و يخاف عليها حتى من النسمة ...نهار وطولو وهو يبشبش بيها،يلعب فيها و لاهي بيها اكثر من روحو ... واذا مالقاهاش وماشافهاش قدامو ...اوووهو...يعمل حالة وما يتهنى الا ما يعنقها ويشم ريحتها "
ضحك اركان ع الڨول ايلي مركتو عليه ...عطاتهالو من الركنية طول ...الشي خلاه يشرب كاس ماء كامل باش يعديها ...بالنسبة لعبد الجليل فهم رميان المعنى الكل ...وبخبرتو متاع سنين نجم يفهم انو ايلي حكاووه الكل موش صحيح والواقع متاعهم هو العكس ...اما بالطبيعة مانجمش يقول شي وقرر يجاملهم وفرد الوقت يعطيهم نصيحة بنفس الاسلوب ايلي حكاو بيه " ماشاء الله ...ظاهر فيكم زويز متفاهمين وعرستو عن حب كبير ...طبيعي نشوف بنوتة كيف العسل هكا بيناتكم ...اركان رغم وقتو الضيق نجم يتلهى ببنتو ويقوم بواجبو كبو وفهم بكري بارشا انو الابوة موش كان الفلوس ...ومدام تولين ذكية وفايقة وفاهمة مليح انو الطيبة بارشا بارشا موش باهية خاصة في وقتنا هذا "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Conto★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
