🌿 الحلقــ37ــةالقسـ4ــم🌿
💠✴✴💠
ما نجمتش تزيد تسمع...لا طاقتها تتحمل ...ولا قلبها ينجم يقاوم صدمة جديدة ...هربت هروب من وسطهم ودخلت للفيلا تجري ...بعد ايلي سمعتو ...والحقيقة ايلي كشفتلها المخبي ...مالقات ماتحكي ...مالقات ماتسأل. ..مالقات ماتتصرف ...كل ايلي عملتو خلاتهم واقفين وجرات بعيد عليهم ...وهوما ما عملو شي ومام با وقفوها ولا منعوها ...قعدو واقفين بنفس البوزيسيون وماتحركوش حتى صانتي ...هزت روحها هزان وكركرت ساقيها تكركير و كل بلاصة تقعد فيها تضيق بيها وتخنق انفاسها ...دارت كيف المجنون ...من بيت لبيت تدادي ومالقاتش ولا تركينة من هاك الدار الكبيرة تنجم تتخبى فيها ...لا اراديا لقات ساقيها تمشي طول لبيت اركان ..وايلي ولت بيتها ملي دهل للسبيطار ...حلت الباب ودخلت ...شافتو مغمض عينو وممدود على ظهرو...الظاهر انو راقد وفي سابع نومة والصياح ايلي صاحتو لوطة ما سمعهوش ...قعدت تمشي وتجي ...وعينيها ساعة ساعة تخزرلو تتفقدو فاق والا مازال ...غلبها قلبها ...وغلبتها وجايعها...والعطشان اذا شاف الماء يرمي روحو فيه حتى لو كان باش يغرقو...طلعت للفرش بجنبو وتمدت على ظهرها كيفو ...شدت في ذراعو وكبشت فيها بصوابعها ...وقعدت كابسة عليه بقوة موش حاسة بظوافرها ايلي تغرست في جلدو ...
مابكاتش كي واجهها احمد بحقيقتها ...ومابكاتش كيف واجهت بوها ...ومابكاتش كيف سمعت ماضيهم...لكن في هاك اللحظة وهي شادة يدو ...هبطت دموعها...سالت كيف المطر ...خيوط وراء خيوط ما قدرتش تحبسهم...وشوية شوية ...على صوت بكاها...و ولى نواح ...تشابكت آهاتها وتخلطت جفونها ببلل دموعها ...ومعادش منجمة تتحكم في روحها .
موش كيما تخيلت ...ولا كيما رات ...عينيه مغمضة ايه...لكن موش راقد...قصد يغمضهم ويخليها تاخو غرضها قد ماتحب في البكاء...اما ...قلبو ماتحملش صوت بكاها....ماطاوقش يشوفها موجوعة وهو ساكن وجامد ...ها المرة مستعد يخسر الحرب الكل ...لكن موش مستعد يرضى بوجيعتها ويقعد ساكت من غير ما يواسيها...تقلب على جنبو وعدى يدو وراء رقبتها ...وجبدها لصدرو ...
ماتصدمتش ...ما قاومتش ...ماخافتش...ع العكس ...تلهفت لحضنو ...دفنت راسها في صدرو و كملت بكاها ...عنقتو بقوة ولزتو ليها ...وهو زاد قربلها ...مسح على شعرها بكفو وحط راسو على راسها ...من غير مايقول حتى كلمة .
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
القصة القصيرة★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
