العشق السرمدي

الجزء 71

🍒 الفصل الأول: بدونك لا اهوى الوجود

حلت الباب بهدوء ودارت خطوة للأمام مدات يديها جيهة الحيط على المفاتيح لي كيشعلو الضوء فالمكتب غير كليكات على الزر تنور المكتب وتنور معاه جميع الذكريات وحتا الأوجاع والألام لي كاتماهم سنين حسات بيهم قريب يجيهم الفرج والدموع لي منعاتهم قريب ينقزو من عينيها
المكتب كان تصميمو هادئ عكس النار لي فقلبها لونو كان رمادي فاتح لون شخصيتها لي ماتقدر تعرف واش معصبة ولا فرحانة واش مرتاحة ولا مهمومة
كان نفس المكتب لي خلاتو سنين هادي ماتغيريش نفس الديكورات والأريكة لي فالجانب التاني من المكتب عاقلة نهار كانت كتجي مع باباها كتنعس عليه شادة الطابليط فيديها
قلبت عينيها لجيهة التانية فين كاين طابلة الإجتماعات صغيرة وهي كتسمع فوذنيها صوت قهقهات طفلة صغييرة كتموت بالضحك وكتدور على الطابلة وماماها كتجري وراها باغيا تاخدها معاها وهي رافضة باغيا تبقا مع باباها
سحر عينيها تغرغرو والنفس مابقاش بغا تطلع من ريتها كتحس بالخنقة والألم فحنجرتها فحالا شي حد ذبحها بموس حافي ،، ماقتلها بشكل نهائي ماخلاها عايشة بشكل طبيعي، علات يديها لي كيترعدو ومسحت الدمعة من جنب عينيها مانعاها تنزل ،، كارهة وماحاملاش تبان ضعيفة واخا غير بينها وبين راسها ... زاحت عينيها لجيهة المكتب وتنهدات بصوت مبحوح صوت قاهراه ومامخلياهش يخرج زمجرة الألم لي فيه .
جات بين عينيها صورة بابها جالس فالمكتب وهي جالسة على رجلو كتحاول تقلد جلستو باش تبان هي صاحبة الشي ..الشئ لي ضحك باباها وبدا كيهرها ويبوسها وهي كتلوا بين يديه و تكركر

قربات بخطوات مترددين جيهت المكتب ودوزات يديها علي سطح المكتب لي مرتب بنفس الطريقة لي كان كينضمو باباها مدات يديها وهزات الكوب لي كان هداتو ليه ماماها فأيام مراهقتهم مكتوب عليه I love you باللون الأحمر .. حطاتو ومدات يديها جيهة الكادر ديال لفوطو ليكان جامعهم بتلاتة كانت مبتاسمة فالصورة وماماها وباباها كيبوسوها من حناكها مدات يديها تانية بصعوبة كترعد مامتحكماش فيها فحالا جاها مرض الإرتجاف الغير إرادي ،، دوزات يديها علي واجهة الإطار كأنها كتحسس وكتلمس واليديها؛ يديها تفحصات الصورة كلها،، وأخيرا وبدون شعور نزلات دمعة من عينيها طاحت فوق الصورة قطرة تبعوها قطرات تزيرات نفسها وعضات على شنايفها كتحاول تكتم هاد الإحساس ولكن مقدراتش

#يتبع..

انا مشييت . غدا نلقاكم دايرين الماكسيمون من التعاليق حيت غدي نبداو الفيشطا الزيت والعافية 🔥🔥🔥