العشق السرمدي

الجزء 146

🍒 الفصل الأول: بدونك لا اهوى الوجود

بقات سحر كتجري مكسيريا الطوموبيل كانت قريبة تطير من قوة السرعة وهي ماحاساش . ضاغطة على الكسيراتور بقوة كبيرة وكل مرة كتهز يديها وتضرب لكيدون عاضة على سنانها مامصدقاش هادشي لي طرا ليها وهاد الشوهة لي تشوهات مرة أخرى قدام عائلتها هي موالفة الإهانات ديالو. لكن كتبقا منحاصرة غير بينهم مي باش تتهان قدامهم كلهم ماقدراتش تتقبلها.
هي كانت عارفة ردة فعلو بل متأكدة منها شنو غتنتاضر من واحد كيصبحها بقح*بة  ويمسيها بقح*بة. لكن للحضة ملي عاودات براءة وتذكرات الماضي فحالا تمنات تسمع منو كلمة شكرا. انا مدين ليك بحياتي. لكن هي لقات لعكس تجريح وإهانة وكره بقات زايدة فالسرعة كتجري حتا خرجات من الطريق السيار ودخلات لغابة وهي ماراداش البال لطريق ولا فين غادية ماحسات براسها حتى تخبطات سيارتها بقوة مع شجرة...
أما فالقصر كانو باقين واقفين على حالتهم مصدومين ، تجمع عليهم 2 أمور ، سحر لي دارت حاجة مكانوش متوقعينها ، وعصام لي استقبل هاد الشي بالجرح والإهانة فعوض الشكر
مراد موجه كلامو لعصام: ما كنتش عارف بلي وليتي قليل الحيى حتى لهاذ الدرجة
عصام بحدة: علاش شنو درت بالسلامة ، أنا عطيت غير رأيي مستحيل نتقبل فكرة نكون مدين لقح*بة بحالها بشي حاجة
يوسف تعصب : عصاااااااام احتارم راسك
مراد : بمجرد كتجرأ تنعت بنت عمك بهاذ الوصف قدام عائلتك كلها و قدام ختك و ليليان راك قليل الحيى نيت
سلمان : رااك ما شفتي والو أخالي من النهار لي جات   وهي كتسمع الإهانة من عندو ، حتى لإمتى غادي تبقى صابرة هاذ البنت ؟؟ . واخا كتبينلكم راه ماهامها والو ولكن راه كتبقى إنسانة ماشي حجرة .. الصراحة أكبر غلط درتوه هو ملي بززتو عليها تجي أنا لي عارف كيفاش كانت عايشة تما على الأقل ماكانت كتسمع والو منفردة براسها و مرتاحة
ذكرى ببكاء : أنا قلت ليها تبقى حيت مابقيتش قادرة نخليها بعيدة عليا  مازال ماكانش يسحابلي ولدي ولاا وحش لهاذ الدرجة ...
عنقاتها بلقيس : شووو صافي أ حبيبة
ذكرى كتنخصص :بنتي الحبيبة غير فيها و فالحيط مابقيتش كنشوفها ضاحكة من قلبها بمرة  (جرها مراد عندو ضمها بين دراعو وهي كتبكي ، علات راسها فيه ) عافاك مشوشة عليها عيطليها عنداك تدير شي حاجة
مراد : راه صردت وراها لي كارد غير كوني هانية شوية و ترجع
رجعت شافت ف عصاام لي غير متكي على الحيط: ماباغيهاش فهمناها وعندك الحق تبغيها ولا لا ، ولكن هاد كترة التجريح علاش ، هي فين عمرها آداتك ؟ ما عمرها جبداتك ب شي كلمة العيب ، علاش كتتعامل معاها هاكا إذن ،واش متأكد نتا هو عصاام ولا شي واحد آخر ماكانعرفوش؟ نتا ما كنتيش هاكا نتا واخا عصبي ولكن عمرك هنتي شي حد بسبب عصبيتك ، عصام ولدي كان كيقول شكرا ملي شي حد كيعاونو و كيبغي يبدلو الخير ، ولدي أنا كان هو الحامي لخوتو و عائلتو كلها ، شنو لي تبدل دابا ؟؟؟؟
عصام : طول عمري هاكاك و هذا لي حداك باقي هو نيت عصام لي كتعرفي ، ولكن لي مكاتعرفيهش هو هاديك لي خرجات هي لي مابقاتش بنتك لي تستاهل شي حد يقوليها شكرا ولا يحميها ، حامية راسها براسها ، حنا ماعندناش هنا دار الدعارة باش ندخلو معانا من هب و دب
ذكرى ب الغوااات : إذا هي كتكمي راه بسبابك ، كتشرب ب سبابك ، إذا كانت كتسبك و لا كتتجاهلك حيت نتا هو السبب ، وإذا لاحضتي شوية غادي تلاحظ بلي نتا هو الوحيد لي كتتعامل معاك هاكاك حيت نتا لي كتبداها ،أما ولاد عائلتك كلهم كتعاملهم بحال خوتها ، خسك تصلح الغلط منك ماشي نتا هو الملاك و لي دايرين بيك كلهم شياطيين ، و حاجة أخرى باش تقولها قح*بة و كتمشي مع الرجال مانسماحلكش، عمرك حصلتي عليها شي حاجة؟؟؟
عصاام : عارف بزااف و آخر دليل هي ملي كانت مع داك صحيبها فالدار مع 3 د الليل فنضرك شنو غادي يكون ولد و بنت كيديرو فالدار فداك الساعة؟؟؟
سلمااان : عصاااام نتا معارفش شكون هو داان...
قاطعو عصام: مكايهمني نعرف والو عليها مكاتهمنيش ، أنا كنعتبرها هاكاك و من حقي نشوفها كيف بغيت إذا نتوما عماتكم لدرجة وليتو تشوفوها ست الحسن و أنا لي غالط فتحماو مسؤوليتكم النهار لي تجيبلكم شي فضيحة ، و فداك الساعة ماتقولوش آااه أ عصام كان عندك الحق ، عومو فبحركم ( خلاهم و طلع ساخط لبيتو تابعاه أماني )