العشق السرمدي

الجزء 154

🍒 الفصل الأول :بدونك لا اهوى الوجود

أما عند ليليان فاقت كتكسل حلات عينيها مالقاتش حداها براءة دخلات لدوش قلعات حواجها باش تدخل تحت الماء وهي تشم فراسها ريحة غريبة . هي مأخرا ولات تقريبا ديما كتشم هاد الريحة. مدات يديها جيهة كرشها وهي تلقاها شوية فحالا فازكة.( حيت مع الزربة مامسحش مزياان) ماعرفاتش منين جاي هادشي مي الهبيلة مارداتش البال قالت يمكن عراقيت بليل . دوشات ولبسات سورفيت فالخزي وسبرديلة كحلة جمعت شعرها لفوق ونزلت تقلب على براءة باش يمشيو لا صال. ومع  كتبات بليل يحفضها يوسف ناضت معطلة مافطراتش معاهم . مشات جيهة الكوزينة شربات كاس دليمون وهزات كرواسة فيديها  وطلعات كتعض فيها وتقلب . دارت على البيوت كلهم مالقاتهاش مشات جيهة بيت أكرم. دخلات مخنزرة ومعليا نيفها لسماء غير شافت أكرم شنو كيدير قلبات تخنزيرة إبتسامة وجات كتجري عندو

ليليان: أكرااامي توحشتك

أكرم شاف فيها بنص عين ورجع يكمل جميع الحوايج: لاش جاية هاد المرة . ياكما جايبة تاني شي سراق الزيت راه نبغج مو ونخليك ترطاي .

ليليان: لا ماجبت والو. شنو كدير غادي تمشي تاني تخيم

أكرم : اممممم . خرجي خليني نكمل شغلي
ليليان: ديني معاك عافاااااك

أكرم:ليليان بعدي مني هاد الساعة وخرجي شوفي شنو ديري

ليليان: والا لا ديني معاك. ياك ديما كنتي كديني معاك

أكرم: كنت . كنت شحال هادا قبل مايجي راجلك. وزايدون عندك القراية سيري بريباري راه الإمتيحان قرب

ليليان: وا طلعتلي فراسي القرايا يدورو يدورو ويقولو ليا باش تولي طبيبة. ماعارفيش انا كنكره الطبة

أكرم خنزر فيها
ليليان: لا زعمة مابغيتش نكون طبيبة

أكرم : شنو باغية تولي بالسلامة

ليليان: باغية نولي أكبر نكاااافة

أكرم: ليليان خرجي ولا نضرب ديلمك مع داك الحيط

ليليان: وادابا ماتاخدنيش معاك
أكرم : لااا وسدي وراك الباب

ليليان خرجات من البيت كتبركم: إدا مامشيتش مانتسماش "ليليا" شافت فالسلسلة لي فعنقها مكتوب عليها "ليليا". هزاتها باستها ونزلات كتجري للساحة لي فيها الطموبيلات ؛ مشات كاتسلت بين الطوموبيلات مخبية من لي كارد حتى وصلات لطوموبيلة أكرم؛ ابتسامات بمكر حلات الكوفر و دخلت فيه، هادي هي ليليان إذا عملت شي حاجة فبالها مستحيل تمنعها عليها مكاتفكرش فالعواقب المهم تديرها

أما لداخل كان أطرم نازل فالدروج لابس الشكارة د الهايكنغ فيها داكشي لي غادي يحتاج كلو ، داز للصالون فين جالسة ذكرى و بلقيس ودعهم و مشا توجه لسيارتو ديماراها و زاد مارادش البال ن هاديك لي غادي تطير بالفرحة فالكوفر

💢لداخل💢

ملي خرج أكرم شافت فيه ذكرى بابتسامة و دارت عند بلقيس

ذكرى :تبارك الله كبر ، ماتقوليش هذا لي كان باقي كيلعب حدانا فالصغر ، الأيام كتطير

بلقيس تنهدات بحزن : لي عاش كلو يكبر ، حتى هي غادي تكون كبرات دابا الشهر الجاي غادي تكون قفلات 20 عام

شافت فيها ذكرى بحزن : باقي مابغيتيش تنساي حتا لإمتى غادي تبقاي تحرقي دمك

بلقيس : فنضرك كاين شي حد كينسى كبدتو ، لو كان وقعلك هاكا لبراءة كنتي غتقدي تنساي و تتصرفي بحال ماكاين والو

ذكرى : أنا أكتر وحدة فاهمااك أ بلقيس ، آه صعيبة و صعيبة بزااف باش بنتك تتخون و هي رضيعة و ماعارفاش حتا فيت داوها ولكن راه مكتوب الله دابا نتي ما فيدك والو

بلقيس : عارفا بلي مكتوب الله ولكن قلب الأم هذا ( زيرات على قلبها مقهورة) قلبي مامهنينيش مامخلينيش نكمل حياتي عادي ، بغيت غير نعرفها فين هي واش عايشة مزيان ولا لا

ذكرى شافت فيها بأسى : وإذا كانت بصح ماتت بحالي قالو

بلقيس حركاتليها راسها بلا : مستحيل تكون ماتت ، أنا حاسة بيها حاسة بيها عايشة و مابعيداش عليا ( بدات تبكي) تقدري تعتبريني حمقة ولكن أنا كتصدق قلبي شنو كيقول ماشي الدلائل ، مادام ماشفتهاش قدام عيني إذا هي باقي عايشة