العشق السرمدي

الجزء 168

🍒 الفصل الأول: بدونك لا اهوى الوجود

فالليل من بعد ما سالات العائلة وجبة العشاء مشاو للصالون تحت طلب مراد باش يشربو كافي و منها يتحدث معاهم فموضوع مهم كيخص سحر على حسب قولو، الشي لي خلا عصام و أماني يكونو من السباقين للمجلس

جلسو كلهم و كايساينو على أحر من الجمر مراد يبدى كلامو، خصوصا سحر حيت ما عندها أدنى فكرة شنو يقدر يكون الموضوع لي كيخصها، باقيا كتفكر حتى سمعو كلهم تحنحين مراد باش يبدى كلامو

مراد : المهم كيف ما قلتلكم أنا جمعتكم هنا باش ندوي فوحد الموضوع كيخص بنتي سحر، يعني، و سطرو مزيان على هاذ الجملة، ما نبغي حتا شي حد من غيرها يتدخل فهاد الشي من غيرها إلا إذا كان تدخل خير، هي الوحيدة لي عندها الحق تتناقش معايا مفهوم

ذكرى : مفهوم أ مراد أصلا ما عندنا علاش نتدخلو إذا ماكانتش شي حاجة فيها خير ليها

سحر ملي سمعاتو كيفاش دوى عاد زاد دخليها الشك مافهماتش المغزى من كلامو

مراد : ما علينا نبدى فالمهم ( شاف ف سحر) بنتي سحر، حنا كلنا عارفين المعاناة لي دوزتيها فحياتك، حالة الإكتئاب لي جاتك من مور موت والديك و نتي صغيرة ( سحر تنهدات)، ناهيك على الحاجات لخرين لي دوزتيهم و لي من الأحسن بلا ما نجبدهم

سحر : عمي بالنسبة ليا من الأحسن تجيني نيشان و تقولي شنو الهدف من هاذ الكلام ما كاين داعي للتمهيد

مراد : لا غير سمعيني حتا نكمل بلا ما تقاطعيني، كنت كنقوليك عانيتي فصغرك لدرجة داكشي لي دوزتيه كيأتر على شخصيتك دابا، شغلتي راسك ف شي أمور حتا ما بقيتيش كتعرفي للسعادة معنى و باش نكونو منطقيين حتا نتي مسؤولة، أنا مكانلومكش أ بنتي حيت لي دوزتي ماشي ساهل على بنت بحالك، ولكن كاينين أمور أخرى كانو ممكن ينسيوك فألمك غادي تقوليلي نتي تربيتي على برا يعني عقليتك متفتحة غادي نفهمك و بالعكس كنعطيك شابو أنك على الأقل ما عملتيش شي حاجة تندمي عليها حيت كون كان شي حد عايش حياتو كلها هنا ف بلاصتك كان غادي يدير نفس الشي لي عملتيه و لا أكتر لهذا حتا حد ما عندو الحق يلومك و هو ما دوزش شنو دوزتي، هاذي من جهة لي ما فيهاش النقاش، من جهة أخرى لي غادي نناقشك فيها هي إذا قلتيلي كنت صغيرة، آآه كنتي صغيرة عارف ولكن دابا شنو؟ دابا كبرتي وليتي كتفكري بعقلك كتعرفي لي مزيانلك و لي قبيح، إذا حتى لإمتى غادي تبقاي شادة عليك فهاذ القوقعة لي بنيتيها لراسك، علاش ماتتحرريش منها و تشوفي الحياة من جانب آااخر عكس الجهة لي كتطلي منها و كتبينلك غير الكحولة الكحولة، علاش، الحاجة لي بغيت نقولهالك هي كاينين بزااف د الفرص لي تشدي فيهم و تطلعي من هاذ الحبس لي بانياه، شوفي الحياة بالألوان جيت اللون الأسود واخا راقي ولكن كيحسس بالخنقة

سحر هو كيدوي و هي كتفكر فكل كلمة كايقولها، عندو الحق من واحد الناحية ولكن ملي كتجي تفكر هي دايرة لي فجهدها كامل ياك خدامة على راسها كاتسافر عندها صحاب، حتا عائلتها تجاهلات كلشي و رجعت لعندهم غير باش ما تبقاش حابسة راسها، إذن شنو الحاجة لي ناقصهاها؟ كتتمنى من قلبها مايكونش داكشي لي كتفكر فيه صحيح

سحر من بعد ما بقات مدة كتفكر : عمي من هادشي كلو فين باغي توصل؟؟

مراد : دابا غادي ندخل معاك فالموضوع كنضن كتعرفي أيمن ولد سي سليم و ديجا تلاقيتيه

سحر باستغراب : آااه علاش شدخلو فالموضوع؟

مراد : جاا دوى معايا عليك و نيتو حسنة، طلب يدك مني على سنة الله و رسوله

#يتبع