العشق السرمدي

الجزء 144

🍒 الفصل الأول: بدونك لا اهوى الوجود

سالات براءة الهدرة و شافت فيهم ،كلشي كان مصدوم حتى واحد ماكان متوقع أنه يقدر هادشي يكون وقع ، حيت فداك الوقت سحر كانت بيناتليهم واحد البرود وواحد الجمود كأنها مامهتماش يعيش و لا يموت عياو يرغبو فيها غير تجي و ماوافقتش ، حتى من سلمان أقرب واحد ليها فالعائلة معاوداتليه والو ،،كلشي واقف كيدورو ف عينيهم ماقادرين يخرجو حتى حرف ، أماني ماكرهتش كون كان لسانها تقطع قبل ما تدوي و لا كون كانو بصح ماسمعولهاش حاسة بالشمتة فين مكاتبغي تبينها خايبة كيتقلب كلشي عليها ، حاسة براسها ماكارهاش تمشي تخنقها و تخرجها من حياتهم حيت كتقول إذا بقات طال الزمان و لا قصار غادي تكون هي السبب فأن المستور كامل يتكشف ،

سحر غير كترد شعرها اللور معارفاش كيفاش تتصرف كانت حالفة هاد الموضوع عمرها تقولوليهم واخا يوقع لي وقع ، ماباغاش يشوفو فيها ب نضرة شفقة و لا يقولو عليها مسكينة شنو دار فيها و هي عاوناتو اظن مازالة كتبغيه ، أما عصام غير كيشوف شوفات مامفهومينش مقادرش يصدق بلي هادشي كامل لي كيدير ليها و كيفاش كيهينا و مع ذلك النهار لي كان محتاج خاطرت بحياتها و عاوناتو ، حس بواحد الإحساس فشكل ، بحالا قلبو كيقوليه راك غالط فحقها بزااف و را كاين شي حاجة غامضة ولكن بسرعة كيحاول ينفض أفكار قلبو و يسمع ل عقلو لي كيقول بلي هي غير كتمتل و هدفها من هادشي كامل هو تبين راسها حنينة قدام كلشي باش يحنو فيها و ينساو شي لي كتدير ، حاس بتلفة عمرو حس بيها ، ذكرى الدموع بداو كيسيلو من عينيها و مشات كتجري عنقاتها و هي كتبكي و تشهق

ذكرى : هادشي كامل دوزتيه أ حبيبة و حنا مسايقين للدنيا خبار ، هادشي كامل أ بنتي ، فالوقت لي كنت أنا مقلقة منك و ماباغاش حتا نصوني عليك و لا نطمن عليك حيت ماسمعتيليش هدرتي نتي كنتي كتصارعي الموت بوحدك بين 4 د الحيوط هئ هئ ، علاش درتي هادشي كلو علاش ، علاش قلبك حنين و مزيان حتى لهاد الدرجة و نتي كتبغي تبينيه قاسح علاش هئ هئ  علاش ضحيتي براسك و بسعادتك ، إذا كانت وقعاتليك شي حاجة عمري نسمح لراسي ( كتدوي و بين كلمة و كلمة كتخرجليها شهقة من أعماق قلبها)

سحر حتا هي معنقاها و الدموع بداو كيسيلولها و كاتحاول تمسحهم باش ما تبينش ضعفها ، حاسة بديك المعاناة لي دوزاتها بوحدها كاملة رجعتليها دابا  الخنقة ديال ديك الغرفة ، مكانتش باغية تتفكر الوحدة لي حسات بيها ، كانت باغا تنسى أنها فاكتر وقت كانت محتاجة لام تمسحليها على راسها و أب يشد بيديها هي مالقات حتا شكون يعطيها كاس د الماء ، كانت باغا تنسى كلشي و تكمل حياتها كأن عمر شي حاجة وقعات ، هي ولفات بزاف على القهرة حتى بدات كتجيها عادية ، ولا كيسحابليها بلي هادي هي الحياة عند كلشي ، بحال شي واحد إذا تولد فقير مغاديش يعاني بزاف حيت مامجربش الغنى كي داير ، هادشي لي وقعليها واخا عانات حيت بالنسبة ليها كانت عارفة شنو هي السعادة و من بعد تحرمات منها و لكن من شدة الحرمان و من شدة الضربات المتتالية نسات أصلا معناها ، حاولات تجمع راسها و ماتبينش شنو فداخلها و تكلمات بصوت كيبان عادي واخا هي المواس كيدوزولها فحنجرتها

سحر : ماما علاش كتبكي آااا ،أنا مابغيتش نقولهالكم غير باش ماتشوشوش عليا حيت كنت عارفاك ماغاديش تخليني نتبرع لولد عمي و أنا مستحيل نشوف شي حد من العائلة مضرور و نبقا مربعة يدي واخا يوقع لي وقع

مراد : لاا أ بنتي على الأقل من بعد العملية كنتي تخبرينا ، نتي أمانة من عند خويا روحك ماشي بوحدك لي مسؤولة عليها

سحر : كنت باغا نقولهالكم أ عمي و لكن راه دازتلي العملية مزيان ماحسيتش حتى بها على غدا نضت بحالا ما واقع والو . وقلت مكاين لاش نشطنكوم

براءة : على غذا نضتي ؟؟ علاش ماشي نتيا لي 3 أيام و نتي ف غيبوبة مكتحركيش ، لا عسك أ بابا والله كان بينها و بين الموت  خطوة وحدة، الايام لي كنت معاها كانت صفرة حتى يديها مقادراش تحركها ، الماا مكاينش لي يمدوليها إذا ماجاوش الممرضين...

سحر كتشوف فبراءة مغددة باغا غير تسكت ، حالفة عمرها تعاود تشارك شي واحد بشي حاجة دارتها باش عمرها ما تحط فهاذ الموقف ؛ عصام بقا مدة غير ساكت و كيسمع عاد قرر ينطق ب شي لي استفز سحر

عصام مربع يديه : و علاش درتي هادشي كلو؟

شافت فيه سحر بنص عين : بغيييييت ، تقلت عليا كلية و قلت اللهم فولد عمي

عصام : مالكي مكاتعرفيش تجاوبي بحال الناس ؟

سحر : حيت حضرتك مكاتعرفش تسول بحالهم