حب نتيجة خطأ طبي

الجزء السابع

زمرد مقدراتش تحبس الدموع و بدات تتنخصص بقات مدة تماك حتى ارتاحت شوية عاد دخلات تتقلب على طواليط.. غسلات وجهها و شافت فالمرايا

زمرد بحزن: مستحيل نقدر نسمح ليك أبابا نتا ظلمتيني!!

فالآخر مشات دخلات لواحد البيت فوق ناموسية تكات وهيا تستسلم للنوم و هي مواكلة والو من غير داكشي لي داز لجسدها عن طريق السيروم..

《بعد مرور اسبوع🍃》

اسبوع لي داز على بطلتنا دوزاتو كامل غير فالدار مكتخرجش حتى من لافاك مبقاتش كتمشي ليها ولات غير سادة على راسها ماباغة تشوف حد

حتى من منصف لي من داك نهار فاش حطها فالدار مبقا رجع عندها  حتى هي كاع متسوقات ليه تناسات الامر و لماكلة غير تتنقب شوية متتقدرش تكمل.. النعاس عاطياه قتلة تتفيق و تتعاود تنعس غير لما لي تتشرب فيه بزااف..

فواحد الدار بالضبط عند عائلة ديال زمرد

فاطمة لي كانت جالسة فصالون حاطة يد على يد وساهية عينيها لي منفوخين وعندها الهالات تحت عينيها وهادشي عادي وهي اسبوع لي داز و معرفات بنتها فين كاينة واش واكلة واش شاربة وفين كتنعس ( هادشي لي يوميا كيشغل بالها )

شوية تسمع الدقان فالباب ناضت كتجر فرجليها حلات وهيا تبان ليها سارة لي عاودات ليها اشنو واقع{ حيت جات سولات عليها شافتها غبرات حتى لافاك مكتمشيش ليها} و بقات فيها صاحبتها كتجي مرة مرة كطل على فاطمة لي كتعتابرها بحال ماماها وكتواسي فيها
دخلو لصالون جلسو مجمعين

ساره بحزن: مديريش اخالتي فراسك هاد الحالة راه زمرد باقي غترجع انشاء الله كوني هانية

فاطمة تنهدات تنهيدة طويلة: اااه ابنيتي اعلم الله بنتي مسكينة فين كاينة وشنو كدير ، الله بوحدو لي عالم شحال راني محروقة عليها.

ساره كطبطب على كتفها: كلنا اخالتي مكرهناش ترجع

فاطمة لي تغرغرو عينيها: هئ هئ وحتى الا رجعات يصحاب ليك غيخليها سي براهيم تعاود تحط رجليها هنا فهاد الدار  هئ حاقد على الدرية وخا انا متأكدة بلي مدارت والو

بقاو جالسين كيواسيو فبعضياتهوم حتى جا سي براهيم وهيا تنوض سارة مشات لدارهوم

براهيم جلس فوق سداري مخنزر و فاطمة قالبة وجهها من داك نهار مبقات كدوي معاه عيات معاه بلي راك كضلمها بنتي وانا متأكدة بلي مغديرش بحال هكاك ولكن هو والو لي فراسو فرااسو خصوصا ملي سمع نفس الهضرة من عند الاطباء لي مشا لعندهم..

براهيم بعصبية: حتى لين غتبقاي بحال هما
فاطيمة بحدة: حتى ترجع بنتي ونشوفها صحة سلام قدامي
سي براهيم  بنفاذ صبر: عوتاني نفس الموضوع حتى لإمتى غتبقاي كل نهار تجبديها ليا البنت لي توسخ ليا شرفي معندي منديربيها
فاطمة بعصبية: بنتي هاديك لي تربات على يدي  زمرد مستحيل دير شي حاجة بحال هاكا
سي براهيم بصوت عالي: اوا راه تربيتك هيا لي خرجات  عليها...

بغا يكمل قاطعو تيليفون وهوا كيصوني  جبدو وهو مخنزر لقا واحد نمرة مداخلاش فتيليفونو وهوا يجاوب

سي براهيم: الو؟

ممرض لي فالاستقبال: الو واش سي براهيم بناني؟

سي براهيم: آه! هو هدا! كاين منقضيو؟

ممرض لي فالاستقبال: معاك ممرض من مختبر التحاليل لي كنتي جيتي عندنا شي سيمانة هادي على قبل تحاليل ديال بنتك

سي براهيم عقد غوباشتو: اه كاين شي مشكيل

الممرض كيدوي وهو كيتصنت ليه شويا ظهرو ملامح الصدمة على وجهو ممتيقش اشنو كيسمع

سي براهيم بصدمة وعصبية: اشنووو اش هادشي كتقول نتا ااش هاد الهضرة..

#يتبع

فنضركم شنو غيكون قال طبيب ل سي براهيم؟!!