حب نتيجة خطأ طبي

الجزء المئة و السادس و الأربعون

حب نتيجة خطأ طبي
#بارت146♡♡

أصبحنا وأصبح الملك لله🌼

عند بطلنا لي فاق لبس عليه وهبط يفطر مع العائلة لي كانو مجموعين التحت من غير زمرد لي باقي خامرة...

داز الوقت وهاهي زمرد يالاه فاقت منبعد ما شبعات نعاس مشات غسلات وجهها وطرفات حالتها. مشات البالكون تشم الهوا حتى بانت ليها سارة داخلة مع البوابة ديال الفيلا..
استغربات شنو جابها وهبطات التحت تشوفها...

وصلات عندها لقاتها يالاه دخلات...

زمرد: سارة؟؟ صافا
سارة: صافا احبيبة ونتي كي بقيتي!
زمرد: بيخير.. شنو جابك عندي فالصباح؟ ياكما كاينة شي حاجة
سارة: لا جيت غير باش نودعك حيت غنمشي فالعشية..
زمرد د: فين غتمشي اسارة؟
سارة: غنمشي لفرنسا فايت قلتها ليك بلي قرايتي غنكملها تما وراه بابا وجد ليا كلشي فالعشية غتمشي طيارة...
زمرد باسى نفخات شفايفها: واش صافي حتى نتي غتمشي!!! غتوحشك بزاف اصاحبتي

عنقاتها سارة و زمرد حتى بادلاتها العناق بقاو هكاك شحال معانقين عاد بعدو على بعضياتهم...

سارة: وصافي مبغيتكش تبكي عوتاني بالعكس نتي خاصك تفرحي ليا حيت غنمشي نبني مستقبلي و انشاء الله غنرجع...

زمرد: انشاء الله نتي سيري خدمي على مستقبلك الله يوفقك..

سارة: امين اختي يالاه تهلاي ليا فراسك..

عاودو تعانقو ومشات سارة فحالها اما زمرد لي بقات غير كتشوف وقلبها تقبط عليها حسات بشي حد موراها دارت لقاتو منصف...

منصف: شنو كديري هنا؟
زمرد: جات عندي سارة و يلاه مشات.
منصف: علاش جات عندك؟
زمرد: حيت غتمشي لفرنسا تكمل قرايتها وجات تسلم عليا...
منصف: يالاه دخلي من البرد..

دار هو مشا لخدمتو اما زمرد لي مشات الصالون جابو ليها الفطور باش تفطر نقبات منو شوية و بقات كتفرج فيه معندهاش شهية الماكلة...

'بعد مرور 4 أيام'

4ايام لي متبدل فيهم والو من غير زمرد لي ولات عاطياها غير نعاس حتى من الماكلة مكتكلهاش.. ومنصف ديما تابعها و مضارب معاها باش تاكل وتولي تديها فصحتها وهي غير كدير ليه الخاطر وصافي... خافها ترجع تدخل للحالة لي كانت فيها فاش تلاقاها أول مرة

اليوم فاقت بطلتنا كتحس براسها بعدا شويا مشات دخلات لدوش خدات واحد تحميمة من داكشي لبسات عليها حوايجها نشفات شعرها وهبطات التحت ملقات حتى واحد من غير الخدامات لي فالكوزينة خرجات لجردة بقات كتمشى وتشم الهوى لي صابح زوين كيفتح نفس... بقات كدور فالاخير مشات لواحد الجليسة تما فالجردة..

جلسات حطات راسها على الفوطوي مغمضة عينيها كتسنشق الهوا.. حتى حسات بشي حد جلس حداها عند بالها منصف ولكن منين دارت لقاتو امجد لي جلس حداها

زمرد: امجد!!
امجد: زمرد.. كي بقيتي صافا..
زمرد: صافا
امجد: زمرد بغيت نهضر معاك!!
زمرد: وي كنسمعك...
امجد جمع الشجاعة كاملة لي عندو و هضر و هو تيشوف فيها فعينيها

أمجد: زمرد انا من اول نهار شفتك عجبتينيي.. عرفتك غتقولي كفاش عجبتك و نتي مرات خويا !! و لكن انا عارف بلي زواجكم على الوراق وصافي وانا بغيتك قبل متزوجو اصلا وكون عرفت بلي هادشي غيوقع كون خديتك قبل منو ولكن هو سبقني وانا لحد الان باقي كنفكر فيك...

زمرد هاد الهضرة كاملة لي قال بقات غير مخرجة عينيها وتشوف فهاد المخلوق لي قدامها كفاش كيهضر ويعبر بلا حشمة بلا حية...

زمرد: واش هنا عارف اشنو كتقول ولا لا؟؟ واش عارف بلي هادي لي كتهضر عليها هكا راه مرات خوك!؟؟

#يتبع...