حب نتيجة خطأ طبي

الجزء المئة و الثامن و الثلاثون

حب نتيجة خطأ طبي
#بارت138♡♡

عند منصف لي باقي كيحاول يسكت فزمرد نوضها من الأرض شادها من خصرها كيتمشى بيها جهة البيت... هي لي مسكتاتش من البكى جاتها صعيبة وبزاف... قلبها مزير عليها رافض فكرة موت فاطمة...

زمرد: فيناهيا؟ واش دفنتوها!
منصف:حتى العشية عاد غادي تدفن..
زمرد:هئئئى بغيت نشوفها قبل مدفنوها هىئ هي غتبقا بوحدها تما فالضلام هئئى بغيت ندفنوها حدا بابا عافاك هئئى مبغيتش نفارقوهم بغيت ابقاو ديما مع بعضياتهم...
منصف: صافي كوني هانية ميكون غير خاطرك...

دازو من حدا أمجد لي كيبحلق فعينيه ويشوف فيهم كفاش مشادين حتى تخطاوه ومشا دخل لبيتو يكمل الخدمة...
اما منصف لي مشا دخل زمرد جلسها فالناموسية عينيها دبلو وتنفخو ومزال دموعها دايزين هو لي كيشوف فيها معندو ليها جهد الحاجة الوحيدة لي اقدر ايديرها دبا هي يبقا واقف معاها حتى تجاوز هاد الفترة لي كتمر منها..

منصف:زمرد دخلي دوشي حيدي عليك العيا...
زمرد: لا هئئ مقديتش بغيت نرتاح...
منصف: نعسي باش ترتاحي..
زمرد:(طلعات فيه عينيها لي رموشهم فازكين بدموع) نعاس مغاديش ينسيني هادشي لي دزت منو!! مغاديش ينسيني فماما وبابا مغينسينيش فنهار لي كان خاصني نكون فرحانة بحال أي عروسة فرحانة فنهارها!! مغاديش ينسيني العداب لي دوزوه عليا... واش انا انسانة خايبة امنصف!؟ واش ماشي من حقي نكون فرحانة ولو غير نهار؟

منصف لي كلامها عاد مكيزيد اشعل النار فقلبو... تمنى كون هو لي كان فبلاصتها اه!! تمنى كون كان هو لي داز من ضروفها تمنى ليها الخير ومفكرش فراسو!!! مفكرش واش غيقدر اتحمل ولا لا ولكن مكيهموش هادشي...
من بعد تفكير طويل وهو ساهي فيها كيقرا الحزن لي مرسوم فعينيها..
منصف: نتي ماشي خايبة ازمرد بالعكس نتي قلبك بيض... وديما الإنسان كيدوز من ضروف لي كيخليوه ارجع قوى من الأول.. نتي هادشي مغاديش اهزموك كاع هاد الضروف لي عشتي أي حاجة دارها الله إلا وأنه فيها خير...

زمرد لي كتصنت ليه وتحاول تفهم هضرتو وشنو بغا يوصل ليها...
زمرد:كون ماما بقات معايا كنت غنرجع ديك زمرد القوية لي حتى حاجة مكتغلبها...
منصف:ماماك مكتاب عليها هادشي شوفي غير انا.. معرفتش واش الواليدة ديالي غتفيق ولا لا... ولكن كنتمنى تفيق مباغي نخسر حتى واحد.

زمرد(مسحات دموعها):علاش مال خالتي حتى هي!؟
منصف:جاتها ازمة قلبية وهي كاينة فالغيبوبة باقي مفاقت...
زمرد: الله يشافيها فعلا ماشي كلشي لقاها كيف بغاها... مهيم بغيت نتكى باش نرتاح..
منصف:واخا نعسي..

ناض و خرج اما زمرد لي مشات تخشات فالفراش طلقات العنان لدموعها ينزلو على راحتهم لعل وعسى تبرد الكية لي فقلبها...
عند منصف لي مشا طل على ماماه لقاها كيف ديما تمنى يدخل عليها ويلقاها حلات عينيها لكن متأكد بلي غيجي هاد نهار وغتفيق...

مشا جلس جنبها شد يديها باسها..
منصف: الياقوت باقي مغتفيقي خلاص فيقي ياعمارة الدار دار بلا بيك راه مساوية والو... متوحشتيش ولادك زعما..؟!
بقا كيهضر معاها ويخرج الهضرة لي باغي يقول حتى سالا باس جبهتها طلع ليها ليزار غطاها بيه وتم خارج...

#يتبع...