حب نتيجة خطأ طبي

الجزء المئة و الواحد و الثمانون

حب نتيجة خطأ طبي
#بارت181♡♡

عند زمرد لي غير تتشوف فالباب وعاقدة 11 مكرهاتش تقوليه شكون ديك ختنا لي كتهضر عليها ولكن مقدراتش.. شافت حتى عيات فاللخر دخلات للدريسينغ بدلات حوايجها وطرفات حالتها.. وهبطات لتحت لقاتهم يالاه تجمعو على الطابلة ديال الفطور وحتى منصف جالس كيشوف قدامو مشات جرات كرسي وجلسات حداه وباشرو فالفطور ديالهم... حتى قاطعهم صوت الياقوت...

الياقوت(بحزن): بقات بلاصة رانيا..

سي محمد: الله يهديك البنت مشات لدار راجلها كي كيقولو البنات غير ضيفات فدار واليديهم...

الياقوت: واييه مكدبتيش الله يفرحها فحياتها...

طل واحد محني على طبسيلو كياكل بهدوء...

عند رانيا لي خرجات من الدوش لاوية عليها فوطة بيضة وشعرها فازك لقات معاذ مكاينش فالبيت غيكون خرج.. مشات حلات البلاكار جبدات سروالو ديال كيطمة فالبيج لبساتو مع تيشورت فالبيض حتى هو بحكم غتجلس غير فالدار وبغات شي حاجة لي ترتاح فيها نشفات شعرها غير بالفوطة خلاتو باقي فازك..

قلبات عينيها جيهة الناموسية بان ليها الفطور محطوط تبسمات فرحانة.. مشات هزات داك البلاطو حطاتو فوق الكوافوز وبدات كتجمع فالبيت وتقاد فالفراش حلات ريدوات باش الشميسة ديال الصباح دخل.. جمعات البيت كامل وختماتها بمعطر الجو لي كيخلي ريحة زوينة فالبيوتة...
تسمع حس الباب تحل دارت لقاتو معاذ لي مسند على الكادر ديال البيت ويشوف فيها وكيضحك...

رانيا : مالك كتشوف فيا..

معاذ تقدم عندها بخطوات تابتين وعنقها من خسرها..

معاذ: ماشي من حقي نشوف فمراتي امم..

رانيا: ههه لا من حقك... يالاه نفطرو راه جاني جوع..

معاذ: نفطرو هنا ولا نخرجو البالكون..

رانيا: امم من الأحسن نخرجو البالكون الجو صابح زوين اليوم...

مشا معاذ هز داك الفطور خرجوه البالكون لي كان كيطل على الجردة حطو فوق الطابلة ورجع الكوزينة جاب الخبز وجلس باش افطرو...

داز الوقت نرجعو الفيلا عند زمرد لي خرجات الجردة جامعة يديها عندها وساهية بعيد كتفكر..
موراها كان واقف منصف لي مراقبها فاش ساهية ويحاول افهم مالها...

منصف: مالك فاش ساهية؟!

زمرد دارت مخلوعة حتى بان ليها منصف واقف عليها..

زمرد:احم لا والو...

منصف: غير قولي متحشميش..

زمرد: بغيت نرجع لافاك نقرا مبغيتش نفرط فقرايتي كفاية العام لي ضاع ليا شحال هدا مبقيت مشيت...

منصف: بغيتي تقراي... وخا حتى انا مغاديش نمنعك ولكن بشرط..

زمرد(شافت فيه ديك شوفة ديال شنو)..

منصف: غادي تبدلي المدرسة غنشوف ليك مدرسة حسن وغادي يبقا الشيفور اوصلك وغادي تواعديني تديها فاحلامك ومستقبلك...

زمرد بتاسمات فرحانة: اه نشاء الله..
منصف: نخليك غادي للشركة..
هبط باسها فحنكها وتم غادي خارج وزمرد متبعة ليه العين وقلبها كيخبط بالجهد.. تنهدات بارتياح ومشات دخلات للصالون لقات الياقوت جالسة بوحدها وقالت مع راسها تمشي تجلس معاها تونسها غيطون طايح عليها الضيم باقي مغادي تولف على غياب رانيا...

نمشيو عند منصف لي راكب سيارتو وكيهضر فالتيليفون...

منصف: صافي نتلاقاو فالشركة و أنا غادي نعلم السيد باش تافقو نتا وياه وتسنيو على الوراق لي خاصين باش تبدا معاه..
قطع عليه الاتصال وصونا لنمرة خرا..

منصف: راه داك الولد لي قلت ليك خويا وافق على داكشي فاش هضرنا وغادي يجي للشركة باش تافق معاه نتلاقاو تما نص ساعة ومتنساش فاش هضرنا..(تسناه حتى هضر عاد جاوب).. لا هو غيكبر المشروع انا تايق فيه..

قطع عليه وركز قدامو فالطريق متاجه للشركة...

#يتبع...