حب نتيجة خطأ طبي

الجزء المئة و الخامس و الستون

حب نتيجة خطأ طبي
#بارت165♡♡

لفوق فالبيت عند البنات

رانيا لابسة ومقادة وجالسة كتسنى فماماها تجي باس يهبطو لتحت التوتر واضح عليها ويديها كتفركهم مع بعض وحناكها مزنكين بلا فاغاجو واللبسة شحال مواتياها...

حدا المرايا واقفة زمرد كتقاد شعرها كانت كتبان اية فالجمال داك القفطان لي جاها عبار ومع داك الحزام عاد مزاد برز الفورمة ديالها.. الكرش لي مكايناش والخسر منحوت الشعر طالقاه على طولتو واصل لنص ضهرها.. والميكاب لي دارت عرفات كفاش تقادو برز ملامحها دارت اللمسات الأخيرة رشات ريحتها ودارت كشتوف فرانيا...

زمرد: رانيا؟ كي جيت!!
رانيا طلعات عينيها فزمرد و ابتاسمات: جيتي كتحمقي تبارك الله..
زمرد: حتى نتي جيتي زوينة غير خاصك تشدي راسك متبينيش بلي راك متوترة...
رانيا(دارت شهيق زفير): افف صافي مغاديش نتوتر...

سمعو حس الباب تحل دارو كلهم بانت ليهم الياقوت لي داخلة وعينيها على رانيا وفيهم واحد اللمعة مخلطة الفرحة مع البكية... تقدمات عندها حتى وصلات حداها وحطات يديها على خدها...

الياقوت: بنتي اليوم كتاب ليا نشوفك عروسة ونفرح بيك... اليوم غتمشي لدار راجلك وتخوي عليا دار..

رانيا: لا اماما ماشي وقت البكا دبا نتي مخاصكش تبكي بالعكس خاصك تفرحي ليا انا غنبقا نجي عندك كل مرة مغاديش نغبر عليك..

سالات هضرتها وعنقاتها عندها الياقوت لي بادلاتها العناق وبقاو شحال على داك الحال...

اما زمرد لي غير كتشوف فيهم وفحلقها مخبية غصة ديال البكاء لي مبغاتش تخرجو كتفكر حتى هي ماماها ولكن مبغاتش تبكي دبا ماشي وقتها واصلا البكاء معندو باش ينفعها...

رانيا بعدات على ماماها مسحات دمعة لي طاحت ليها وشافت فالمرايا حتى سمعات ماماها كتهضر...

الياقوت(بابتسامة): ويالاه يالاه راه عائلة العريس جات وخاصك تهبطي راه نتوما لي بقيتو...

تقادو البنات وحلو الباب و خارجو..

رانيا دايرين بيها الياقوت وزمرد.. هابطين والضحكة واضحة على وجههم وصلو للحديقة.. زمرد لي كضحك مع رانيا كتحاول تنسيها الستريس لي عايشاه دبا.. ممتابهاش لمنصف لي كان واقف مع الرجال كيهضر معاهم، حتى طاحت عينيه على زمرد لي كضحك بقا ساهي كيشوف فيها شحال ويعبر فيها.. سرعان ماجمع ضحكة ملي شاف شنو لابسة داك القفطان لي مبين كاع تقاسيم جسمها.. عقد غوباشتو وبقا كيضور فعينيه يشوف ياكما شي حد كيشوف فيها...

عند زمرد لي وصلو رانيا لبلاصتها حدا معاذ وبعدو مشاو عند الحضور عائلة العريس لي جات حتى هي كل من عمامو وخوالو و ولادهم كلشي حاضر لخطوبتو...

اما زمرد لي مشات جلسات فواحد الطابلة فيها بنات العائلة نص فيهم مكتعرفوش غير جالسة وساكتة...

جاو سربايا كيضيفو الحضور كل واحد شنو هاز كيضورو على الطبالي وحدة بوحدة..

نمشيو عند العرسان رانيا ومعاذ لي مشادين اليدين ومعاذ كيوشوش فودن رانيا..

معاذ: اخيرا جا الوقت لي غتقولي ديالي ومراتي...
رانيا لي حشمات كتافات فقط تبتاسم ليه اما معاذ غمزها ودور وجهو كيبتاسم...

عند منصف لي باقي مجمع مع الرجال عين عندهم وعين عند زمرد لي مراداش ليه البال.. كان واقف مع إياد لي مجمع هو وياه...

إياد: منصف قلتي بلي باغيني؟؟
منصف: اه غذا دوز عندي للشركة باغي نهضر معاك فواحد الموضوع..
إياد: اه وخا..

إياد لي دور عينيه كيقلب عليها حيت عارفها بلي غادي تكون حاضرة فالخطوبة ديال خوها بقا كيضور عينيه حتى لمحها واقفة مع شي بنات وهو يبتاسم وبقا حاضيها كيشوف فيها ويطلع وينزل فيها...

#يتبع...